កំពង់ធំ៖ប្រតិភូក្រសួងបរិស្ថាន និងអ្នកសារព័ត៌មានមកពី២០ស្ថាប័ន កាល​ពីថ្ងៃទី២១ ខែកុម្ភៈ ឆ្នាំ២០២៥ បានទៅកាន់​សហគមន៍តំបន់ការ​ពារធម្មជាតិ​ជាំធ្លក ស្ថិតក្នុងដែនជម្រកសត្វព្រៃបឹងពែរ នៃឃុំងន ស្រុកសណ្តាន់ ខេត្ត​កំពង់ធំ ខណៈសមាជិកសហគមន៍​កំពុងចូលរួមយ៉ាងសកម្មក្នុងការការពារ និងអភិរក្សធនធានធម្មជាតិ ។ពួកគេក៏​បានបង្កើន​ជីវភាពប្រកបដោយនិរន្តរ​ភាពដែរ តាមរយៈការងារដាំស្តារព្រៃ និងការគិតគូរចំណូលសម្រាប់​ទ្រទ្រង់​ដល់សហគមន៍។

លោក កែវ វិបុល ប្រធានសហគមន៍ព្រៃឈើជាំធ្លក បានលើកឡើងថា កន្លងមកសហគមន៍បានចូលរួមពង្រឹង​ការគ្រប់គ្រង​ធនធានធម្មជាតិ ការធ្វើផ្លូវភ្លើងជុំវិញតំបន់ព្រៃសហគមន៍ ការបណ្តុះដាំស្តារព្រៃឈើដើម្បី​បង្កើនគម្របបៃតង និងការរៀប​ចំឱ្យសមាជិកមានជីវភាពផ្លាស់ប្តូរពី​ការពឹងអាស្រ័យលើព្រៃឈើ ងាកមកចាប់យក​មុខរបរថ្មី ដូចជា ការដាំដុះ​បន្លែលក្ខណៈ​គ្រួសារ ការបង្កើតជាក្រុមសន្សំ និងការបើកហាងកាហ្វេ​សហគមន៍ជាដើម ។មុខរបរថ្មីបន្ថែមនេះ​កំពុងទាញបានចំណូល​យ៉ាង​ប្រសើរ​ដល់សហគមន៍។

សូមជម្រាបជូនថា ការអភិវឌ្ឍរបស់សហគមន៍ បានទទួលការគាំទ្រពី​ក្រសួងបរិស្ថាន ទាំងស្មារតីនិងសម្ភារៈជាបន្តបន្ទាប់ ជាពិសេសក្នុងឆ្នាំ២០២៤ ពីគម្រោង “ការបញ្ជ្រាបការគ្រប់គ្រងធនធានធម្មជាតិ ទៅក្នុងតំបន់ទេសភាព នៃព្រៃធម្មជាតិ និងផលិតភាពធម្មជាតិ នៅតំបន់ភាគខាងជើងនៃប្រទេស​កម្ពុជា(INRM Project)” ក្នុងនោះគម្រោង INRM ដែលបា​នផ្តល់មូលនិធិ​ដល់អង្គការមូលនិធិព្រះពុទ្ធសាសនា និងអភិវឌ្ឍន៍សហគមន៍ ដើម្បីធ្វើការជា​មួយសហគមន៍ ក្នុងការពង្រឹង​សមត្ថភាព និងជំនាញក្នុងការពង្រឹងជីវភាព​សហគមន៍ និងការថែរក្សាព្រៃឈើសហគមន៍ ឱ្យបានល្អសម្រាប់​កូនចៅរបស់​គាត់។

សហគមន៍តំបន់ការពារធម្មជាតិជាំធ្លក បានបង្កើតឡើងជាផ្លូវការនៅថ្ងៃទី២៣ ខែកក្កដា ឆ្នាំ ២០១០​លើទំហំផ្ទៃដី​ចំនួន៥.២០៤ហិកតា ស្ថិតក្នុងភូមិចំនួន៧ និងមានប្រជាជនរស់នៅរហូតដល់១ ១១៣គ្រួសារ។

កន្លងមកតាមរយៈការគាំទ្រពីគម្រោង សហគមន៍តំបន់ការពារធម្មជាតិមួយនេះ បានលើកទឹកចិត្តគណៈកម្មការសហគមន៍ ខិតខំប្រឹងប្រែងក្នុងការងារគ្រប់​គ្រង​សហគមន៍ និងថែរក្សាធនធានធម្មជាតិ ប្រកបដោយនិរន្តរភាព គិតគូរលើវិធាន​ការ​ប្រកបដោយនិរន្តរភាព និងការកែច្នៃផលិតផលកសិកម្មនានា ជាងនេះទៅ​ទៀតក៏មានការសាងសង់ហាងកាហ្វេ លក់​ភេសជ្ជៈ និងអនុផលព្រៃឈើ និង​ផ្លែឈើ កែច្នៃជាដើម ដើម្បីបង្កើនជីវភាពមូលដ្ឋាន។

ពេលនេះដោយមានការគាំទ្រពីក្រសួងបរិស្ថាន គម្រោង INRM និងការសម្រប​សម្រួលពីអង្គការសុខិតកាល ប្រតិភូក្រសួង​បរិស្ថាន និងក្រុមអ្នកសារព័ត៌មាន បានចូលរួមធ្វើដំណើរទេស្សនកិច្ច ទៅកាន់សហគមន៍តំបន់ការពារ​ធម្មជាតិ​មួយចំនួន ស្ថិតនៅក្នុងខេត្តកំពង់ធំ ព្រះវិហារ និងខេត្តសៀមរាប។ដំណើរ​ទស្សនកិច្ចនេះនឹងអាចឱ្យក្រុមអ្នកសារព័ត៌មាន បានស្វែង​យល់សិក្សាកាន់តែ ស៊ីជម្រៅពីការងារចូលរួម របស់សហគមន៍នៅក្នុងកិច្ចការងារអភិរក្ស​ធនធន​ធម្មជាតិ ការដាំស្តារព្រៃ ជាពិសេសគឺនិរន្តរភាព ផ្នែកហិរញ្ញវត្ថុ សម្រាប់ប្រតិបត្តិ​ការ​ការងាររបស់សហគមន៍។

ឯកឧត្តម ខ្វៃ អាទិត្យា អនុរដ្ឋលេខាធិការនិងជាអ្នកនាំពាក្យក្រសួងបរិស្ថាន បានសង្កេតឃើញថា ប្រជាពលរដ្ឋភាគច្រើន​ក្នុងតំបន់ កំពុងកែប្រែឥរិយាបទ លើការពឹងពាក់លើជម្រើសមុខរបរដែលមិនពាក់ព័ន្ធនឹងព្រៃឈើ កាន់តែ​ច្រើន​ឡើងៗ ដែលជាលទ្ធផលគួរជាទីមោទនៈ។

កិច្ចការពារបរិស្ថាន ចាំបាច់ត្រូវការចូលរួមពីភាគីពាក់ព័ន្ធ ជាពិសេសពី​សហគមន៍​នៅតាមតំបន់ការពារធម្មជាតិ ដែល​ពួកគាត់ត្រូវតែមានជីវភាព​ល្អប្រសើរ មិនពឹងលើការពឹងលើធនធានធម្មជាតិ។ឯកឧត្តម ខ្វៃ អាទិត្យា បានវាយ​តម្លៃខ្ពស់​ចំពោះការចូលរួមគាំទ្រ ការអភិវឌ្ឍជីវភាពសហគមន៍ ពីគម្រោង INRM ក៏ដូចជាជាអ្នកពាក់ព័ន្ធទាំងអស់ ជាពិសេសពីមន្ទីរ​បរិស្ថានខេត្តនានា អាជ្ញាធរមូលដ្ឋាន ដែលបច្ចុប្បន្នប្រជាពលរដ្ឋ នៅក្នុង​សហគមន៍តំបន់ការពារធម្មជាតិជាំធ្លក និង​សហគមន៍​តំបន់ការពារធម្មជាតិ​មួយចំនួនទៀត បានទទួលការគាំទញរ ធ្វើការដាំដុះបន្លែ ឈើហូបផ្លែ សាងសង់ថ្នាល​បណ្ដុះកូនឈើ ដើម្បីដាំស្តារព្រៃ និងជម្រើសមុខរបរថ្មីៗ​មួយចំនួនទៀត ដែលមិនពាក់ព័ន្ធនឹងព្រៃឈើ។

អ្នកនាំពាក្យក្រសួងបរិស្ថានរូបនេះ បានសំណូមពរឱ្យមានការបន្តកិច្ច​សហប្រតិ​បត្តិការនិងការគាំទ្រពីដៃគូសហគារនានា​ជួយបង្កើត​តំបន់អេកូទេសចរណ៍​ធម្មជាតិ ដល់សហគមន៍ សម្របនឹងយុទ្ធសាស្រ្តអភិវឌ្ឍន៍គោលដៅ​លំហបៃតង នៅតាម​សហគមន៍ដែលមានសក្តានុពលទេសចរណ៍ធម្មជាតិ ដើម្បីធានា​និរន្តរភាព​ព្រៃឈើ និងជីវភាពប្រជាពលរដ្ឋមូលដ្ឋាន៕
ដោយ ៖ង៉ាន់ ទិត្យ
រូបភាព ៖សែម បូរិន