ការបណ្ដុះបណ្ដាលជំនាញវិជ្ជាជីវៈដល់យុវជនក្នុងវិស័យទេសចរណ៍ គឺដើម្បីឱ្យទទួលបានការងារធ្វើ និងប្រាក់ចំណូលសមរម្យ
បន្ទាយមានជ័យ៖ការបណ្ដុះបណ្ដាលជំនាញវិជ្ជាជីវៈក្នុងវិស័យទេសចរណ៍ដល់យុវជន កម្មករ បុគ្គលិក ឱ្យទទួលបានការងារធ្វើ និងប្រាក់ចំណូលសមរម្យក្នុងសេវាកម្មទេសចរណ៍ ជាគោលដៅសំខាន់រួមនៃសិក្ខាសាលាផ្សព្វផ្សាយពិគ្រោះយោបល់ ការបណ្តុះបណ្តាលបដិសណ្ឋារកិច្ចកម្ពុជា(ហូកា)ដើម្បីជ្រើសរើសសិក្ខាកាម និងគ្រូបង្គោលប្រចាំខេត្តបន្ទាយមានជ័យ ។
ក្នុងសិក្ខាសាលាកាលពីថ្ងៃទី២១ ខែកុម្ភៈ ឆ្នាំ២០២៥ នៅសាលប្រជុំខេត្តបន្ទាយមានជ័យ លោក ឈឿន សេរីវុធ ប្រធានមន្ទី ទេសចរណ៍ខេត្តបន្ទាយមានជ័យ បានលើកឡើងថាសិក្ខាសាលានេះសំដៅអភិវឌ្ឍន៍ជំនាញបច្ចេកទេស ជំនាញទន់ និងជំនាញសហគ្រិនភាពដែលជាជំនាញវិជ្ជាជីវៈ ក្នុងការបង្កើនឱកាសការងារសមរម្យ និងប្រាក់ចំណូល ដល់យុវជន និងបុគ្គលិកដែលមានជំនាញទាប។ នេះក៏ជាដំណាក់កាលទី៣ ដែលមានសិក្ខាកាមមកពីខេត្តគោលដៅចំនួន៤រួមមានខេត្តពោធិ៍សាត់ ប៉ៃលិន ឧត្តរមានជ័យ និងខេត្តបន្ទាយមានជ័យ មកទទួលការបណ្តុះបណ្តាលបដិសណ្ឋារកិច្ចកម្ពុជាលើមុខជំនាញ ឆុងកាហ្វេ ចុងភៅ និងភេសជ្ជៈ រួមទាំងផ្នែកគេហកិច្ច និងជំនាញការិយាល័យជួរ ។
បើតាមលោកប្រធានមន្ទីរ សិក្ខាកាមភាគច្រើនជាយុវជន កម្មករ បុគ្គលិក មកពីសេវាកម្មទេសចរណ៍មាន សណ្ឋាគារ ភោជនីយដ្ឋាន ផ្ទះសំណាក់ អាហារដ្ឋាន និងផ្ទះស្នាក់សហគមន៍ទេសចរណ៍ជាដើម។ការបណ្តុះបណ្តាលបដិសណ្ឋារកិច្ចនេះបានពីរដំណាក់កាលមកហើយ ពីឆ្នាំ២០២២ ដល់ ឆ្នាំ២០២៤ ។
លោក ប្រាក់ ប៉ូលី អភិបាលរងខេត្តបន្ទាយមានជ័យ បានបញ្ជាក់ពីសារៈបណ្ដុះបណ្ដាលជំនាញវិជ្ជាជីវៈ ដល់យុវជន កម្មករ បុគ្គលិក ដែលបម្រើការងារផ្នែកទេសចរណ៍នេះ ឱ្យទទួលបានទាំងជំនាញវិជ្ជាជីវៈ និងក្រមសីលធម៌វិជ្ជាជីវៈ៕
ដោយ៖ គៀន ច័ន្ទហ៊ីន
