កែប៖ខេត្តកែបកាលពីឆ្នាំ២០២៤កន្លងទៅប្រមូលផលអំបិលបានចំនួន ៤០ ៤០៨តោន លើផ្ទៃដីជាង៣០០ហិកតា​។ចំនួន​នេះបានកើនឡើង ៣៧ ៣៨២តោន ស្មើនឹង ១.២៣៥ភាគរយបើធៀបនឹងឆ្នាំ២០២៣ ដែល​ផលិត​បានត្រឹមចំនួន ៣ ០២៦​តោនប៉ុណ្ណោះ។

ក្នុងពិធីបិទសន្និបាតប្រជុំបូកសរុបលទ្ធផលការងារឆ្នាំ២០២៤ និងលើក​ទិសដៅ​អនុវត្តការងារឆ្នាំ២០២៥ របស់មន្ទី​រឧស្សា​ហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ខេត្តកែបកាលពីថ្ងៃទី២៤ ខែកុម្ភៈ ឆ្នាំ២០២៥​ឯកឧត្តមបណ្ឌិត សោម ពិសិដ្ឋ អភិបាលខេត្តកែបបានលើកឡើងថា សកម្មភាព​សេដ្ឋកិច្ចរបស់ប្រជាពលរដ្ឋក្នុងខេត្តបានដំណើរការយ៉ាងមមាញឹក​ តាម​រយៈ​ការ​បង្កើត និងបន្តដំណើរការសហគ្រាស សិប្បកម្ម និងសេវាកម្មនានា ។ជាក់ស្តែងទូទាំងខេត្តមានមូលដ្ឋានផលិតកម្ម, រោង​ចក្រ, សហគ្រាស និងសិប្បកម្មចំនួន ១៩៩ទីតាំង និងបង្កើតការងារជិត៧០០នាក់ ។បណ្ដាសកម្មភាពសេដ្ឋកិច្ចទាំងនេះ​ប្រើប្រាស់ទុនវិនិយោគប្រមាណជាង ២,៩លានដុល្លារ ជាពិសេសគឺសិប្បកម្មផលិតអំបិល កំពុងធ្វើសកម្មភាព​ផលិត​យ៉ាង​ផុលផុស សម្រាប់ផ្គត់ផ្គង់លើទីផ្សារទូទាំងប្រទេស។

លោក ភោគ សុខេន ប្រធានមន្ទីរឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានឱ្យដឹងថា ខេត្តកែបមានផ្ទៃដីស្រែ​អំបិលសរុប ៤៩៧.៨៧ ហិកតា ផ្ទៃដីស្រែផលិតជាក់ស្តែងមានចំនួន ៣៥១.៥ហិកតា ខណៈដីស្រែ​អំបិលផ្សេង ទៀតទុក​ចោលមិនផលិត ។ កាលពីឆ្នាំ២០២៤អំបិលលក់ចេញមានចំនួន ៣៧ ៤៣៣តោន កើនឡើង​ចំនួន ៣៦ ៧៩៧តោន ស្មើនឹង ៥ ៧៨៦ភាគរយ ។ក្នុងនោះតម្លៃអំបិល​ក្នុងមួយប៉ាវ(៥០គីឡូក្រាម) លក់បានចន្លោះពី ៥ ០០០រៀល ដល់ ១០ ០០០រៀល។ បច្ចប្បន្ន អំបិលសល់ក្នុងឃ្លាំង មានចំនួន ២ ៩៧៥តោន៕

ដោយ ៖សិលា សារិន