រកឃើញកូនផ្សោតកើតថ្មីទី៤ មួយក្បាលទៀតនៅចន្លោះអន្លង់កាំពី-ជ្រោយបន្ទាយ ខេត្តក្រចេះ
(ភ្នំពេញ)៖កូនផ្សោតទើបកើតថ្មីមួយក្បាលទៀតដែល មានអាយុប្រមាណ២ថ្ងៃ ត្រូវបានប្រទះឃើញដោយក្រុមការងារស្រាវជ្រាវនៃរដ្ឋបាល ជលផលនិងអង្គការ WWF នាថ្ងៃទី២៥ ខែកុម្ភៈ ឆ្នាំ២០២៥ នៅចន្លោះអន្លង់កាំពី-ជ្រោយបន្ទាយ ភូមិសំបុក ឃុំសំបុក ស្រុកចិត្របុរី ខេត្តក្រចេះ។
ក្រសួងកសិកម្មបានឱ្យដឹងនៅថ្ងៃទី២៦ ខែ កុម្ភៈ ឆ្នាំ ២០២៥ថា កូនផ្សោតនេះស្ថិតនៅក្នុងក្រុមសត្វផ្សោតពេញវ័យចំនួន ៧ក្បាល ផ្សេងទៀត។ គួរបញ្ជាក់ថា នេះគឺជាកូនផ្សោតទី ៤ហើយ ដែលបានកើតនៅដើមឆ្នាំ២០២៥នេះ។
ជាមួយការរកឃើញនេះដែរក្រសួងកសិកម្ម រុក្ខាប្រមាញ់ និងនេសាទ ថ្លែងអំណរអរគុណចំពោះឆ្មាំទន្លេ អាជ្ញាធរមូលដ្ឋាន និងប្រជាពលរដ្ឋដែលបានចូលរួមថែរក្សានិងការពារធនធានជលផលដ៏មានតម្លៃ។
ទន្ទឹមនេះក្រសួងកសិកម្មបានបញ្ជាក់ប្រាប់ដល់ប្រជានេសាទដែល បានប្រទះឃើញសត្វផ្សោត ពិសេសកូនផ្សោត ឱ្យផ្តល់ព័ត៌មានមកសមត្ថកិច្ចជលផល ដែលមានលេខទូរស័ព្ទ ០១២ ៨៩៧ ៩៤៣ ០១១ ៣៥៥ ៨៨៣ ០៩៩ ៧៩១ ៩១៩ ០៩២ ៩១៨ ១៤៤ និង ០១៧ ៨១៨ ៣៨២៕
ដោយ៖ម៉ាដេប៉ូ
