(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយក​រដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីពិធី​បើកកិច្ចប្រជុំកំពូលឥស្លាម ជាលើកដំបូងនៅកម្ពុជា ដែល​រៀបចំដោយអង្គការ សម្ព័ន្ធពិភពឥស្លាម ក្រោមប្រធានបទ «ឥស្លាម និងពុទ្ធសាសនា» នាព្រឹកថ្ងៃទី២៧ ខែកុម្ភៈ ឆ្នាំ២០២៥ នៅសណ្ឋាគារសុខា រាជធានីភ្នំពេញ ។

ឯកឧត្តម អ្នកឧកញ៉ា ដាតុ បណ្ឌិត អូស្មាន ហាស្សាន់ ទេស​រដ្ឋមន្ត្រីទទួលបន្ទុកបេសកកម្មពិសេស បានថ្លែងថា កិច្ចប្រជុំ​កំពូលលើកទី១ របស់អង្គការសម្ព័ន្ធពិភពឥស្លាមនៅលើទឹកដី កម្ពុជា គឺជាការបង្ហាញយ៉ាងច្បាស់ ពីសាមគ្គីភាព និងសុខដុម​នីយកម្មជាតិសាសន៍ និងសាសនានៅព្រះរាជាណាចក្រកម្ពុជា ដែលសម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រ​ធានព្រឹទ្ធសភា បានខិតខំកសាងមកយ៉ាងលំបាក និង ថែទាំ​យ៉ាង​យកចិត្តទុកដាក់ជាទីបំផុត ដោយហេតុថា កត្តាទាំងនេះ គឺជាធាតុផ្សំមិនអាចខ្វះបាននៃសន្តិភាព និង ស្ថិរភាពយូរ​អង្វែងរបស់កម្ពុជា ។

ឯកឧត្តម អ្នកឧកញ៉ា បានបញ្ជាក់ថា លើសពីនេះ កិច្ចប្រជុំដ៏មានសារៈសំខាន់នេះនឹងបង្ហាញដល់បណ្តាប្រទេសដែលជាសមាជិករបស់អង្គការសម្ព័ន្ធពិភពឥស្លាម បណ្តារដ្ឋ ៥៧ប្រទេស ដែលជាសមាជិក នៃអង្គការសហប្រតិបត្តិការ ឥស្លាម(OIC) និងប្រទេសនានានៅលើសាកលលោក បាន​ឃើញថា កម្ពុជាអាចចាត់ទុកជាប្រទេសគម្រូមួយ ក្នុងការ​បញ្ចប់សង្គ្រាមរ៉ាំរ៉ៃទាំងស្រុង និងទទួលបានសុខ​សន្តិភាព​ពេញលេញ និងបានលើកកម្ពស់សិទ្ធិសេរីភាពជំនឿ សាសនារបស់ប្រជាពលរដ្ឋទូទៅ ជាពិសេស បងប្អូនសាសនិកឥស្លាម ។

សម្ដេចបវរធិបតី ហ៊ុន ម៉ាណែត បានមានប្រសាសន៍ថា កម្ពុជា មានសុខដុមនីយកម្មជាតិសាសន៍ និងសាសនាពេញលេញ ដល់ប្រជាជនរបស់ខ្លួន ដែលមានវប្បធម៌ និងប្រពៃណីចម្រុះ​ជាតិសាសន៍។

សម្ដេចបវរធិបតី បានបន្តថា សមាជិកអង្គការសហប្រតិបត្តិការ​ឥស្លាម (OIC) ដែលមានរដ្ឋជាសមាជិកចំនួន ៥៧ប្រទេស មាន​​ប្រជាជនជិត ២ពាន់លាននាក់ និងអង្គរការសម្ព័ន្ធពិភព​ឥស្លាម រួមទាំងបណ្តាប្រទេសជាច្រើនទៀត គឺថ្នាក់ដឹកនាំ​ប្រទេស និងអង្គការទាំងនេះ បានវាយតម្លៃខ្ពស់ និងបាន​កោត​សរសើរដល់កម្ពុជា ដោយប្រៀបយកកម្ពុជា ធ្វើជាគំរូដ៏ល្អ នៃ​ប្រទេសដែលមានសុខដមនីយកម្មជាតិសាសន៍ និងសាសនា រវាងឥស្លាម ៥% ព្រះពុទ្ធសាសនា ប្រមាណ ៩៣% និង​សាសនាផ្សេងៗ ២% ដែលមានសាមគ្គីភាពនឹងគ្នា ប្រកប​ដោយការអត់ឱន ដើម្បីជាការបញ្ជាក់ពីវឌ្ឍនភាព​សាសនា​នៅកម្ពុជា ទើបសម្រេចចិត្តមករៀបចំកិច្ចប្រជុំកំពូល​នេះ​នៅកម្ពុជា ដែលជានេះជាលើកទី១ ៕

អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ