សាខាកាកបាទក្រហមកម្ពុជាខេត្តបន្ទាយមានជ័យ ប្រារព្ធសន្និបាត
បន្ទាយមានជ័យ៖សន្និបាតសាខាកាកបាទក្រហមកម្ពុជា ខេត្តបន្ទាយមានជ័យអាណត្តិទី៦ បានប្រារព្ធនៅសាលប្រជុំ សាលាខេត្តបន្ទាយមានជ័យកាលពីថ្ងៃទី២៦ ខែកុម្ភៈ ឆ្នាំ២០២៥ ក្រោមអធិបតីភាពលោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា ឯកឧត្តម អ៊ុំ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យព្រមទាំងថ្នាក់ដឹកនាំនិង មន្ត្រីថ្នាក់កណ្តាល ក្រុមប្រឹក្សាខេត្ត គណៈអភិបាលខេត្ត គណៈកិត្តិយសសាខា សមាជិកសមាជិកាគណៈកម្មាធិការសាខា មន្រ្តីមកពីមន្ទីរ អង្គភាពជុំវិញខេត្ត នកពីអនុសាខាកក្រកក្រុង ស្រុកទាំង៩ អ្នកស្ម័គ្រចិត្ត យុវជនស្ម័គ្រចិត្តកាបាទក្រហម មន្ត្រីក្រុមប្រតិបត្តិសាខា ប្រមាណ៣៨៦នាក់។
មានប្រសាសន៍ក្នុងឱកាសនេះឯកឧត្តម អ៊ុំ រាត្រី បានលើកឡើងពីអាណត្តិទី៥កន្លងទៅ ទោះបីមានផ្ទុះរាតត្បាតជាសកលនៃជំងឺកូវីដ-១៩ និងគ្រោះមហន្តរាយ ការប្រែប្រួលអាកាសធាតុ ការកើនកំដៅផែនដីជាដើម ធ្វើឱ្យប៉ះពាល់ដល់សេដ្ឋកិច្ចគ្រួសារ សេដ្ឋកិច្ចជាតិ និងធ្វើឱ្យស្ថានភាពចំណូល និងចំណាយមានការប្រែប្រួលពីមួយឆ្នាំទៅមួយឆ្នាំយ៉ាងណាក៏ដោយ ក៏សាខាកាកបាទក្រហមកម្ពុជាខេត្តបន្ទាយ មានជ័យនៅតែអាចមានលទ្ធភាពខិតខំប្រឹងប្រែងចូលរួមចំណែកជាមួយរាជរដ្ឋាភិបាលក្នុងប្រតិបត្តិការទប់ស្កាត់កាត់បន្ថយ និងឆ្លើយតបចំពោះហានិភ័យនៃគ្រោះមហន្តរាយៗ បានជាបណ្តើរផងដែរ។
ឯកឧត្តមបន្តថា ជាទិសដៅសម្រាប់អាណត្តិទី៦ ២០២៥ -២០៣០ គឺយកចិត្តទុកដាក់បន្ថែមទៀតដោយ បង្កើនការចូលរូមពីយុវជនស្ម័គ្រចិត្ត កាកបាទក្រហមលើការងារ មនុស្សធម៌ឆ្ពោះទៅសម្រេចបានទិសដៅយុទ្ធសាស្ត្រ របស់សាខាកាកបាទក្រហមកម្ពុជា, បន្តពង្រឹងរចនាសម្ព័ន្ធគ្រប់គ្រង និងអភិវឌ្ឍចំណេះដឹង សមត្ថភាព ជំនាញរបស់មន្ត្រី បុគ្គលិក អ្នកស្ម័ត្រ ចិត្ត និងយុវជនស្ម័គ្រចិត្តកាកបាទក្រហមកម្ពុជា ។លើកកម្ពស់ការចូលរួម និងការទទួលខុសត្រូវរបស់សហគមន៍។ ជាមួយគ្នានេះ ពង្រឹងសកម្មភាពកៀរគររកមូលនិធិសម្រាប់ទ្រទ្រង់សកម្មភាពមនុស្សធម៌។
ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ បានឱ្យដឹងថា បច្ចុប្បន្នខេត្តមានយុវជនស្ម័គ្រចិត្តកាកបាទក្រហមខេត្តបន្ទាយមានជ័យសរុបរួមមាន១ ៥៤៤នាក់ (នារីឬស្ត្រី១០៦២នាក់ )កំពុងធ្វើការងារមនុស្សធម៌យ៉ាងសកម្មឆ្លើយតបនឹងទិសដៅសាខាកាកបាទក្រហមកម្ពុជា ខេត្តបន្ទាយមានជ័យអាណត្តិទី៦នេះ។
លោកជំទាវ ពុំ ចន្ទីនី អគ្គលេខាធិការកាក បាទក្រហមកម្ពុជា បានគាំទ្រចំពោះសកម្មភាពកាងារកាកបាទក្រហមរបស់គណៈកម្មការសាខា អនុសាខាពិសេស ការបង្កើនចងក្រងបណ្ដាញអ្នកស្ម័គ្រចិត្រ ពិសេសយុវជនដែលចូលរួមធ្វើការងារមនុស្សធម៌របស់សាខាកាកបាទក្រហមកម្ពុជា ខេត្តបន្ទាយមានជ័យ ដ្បិតយុវជនជាអ្នកបន្តវេនលើការងារកាកបាទក្រហម ។លោកជំទាវបន្តថា សូនមយុវជនត្រូវបន្តខិតខំផ្សព្វផ្សាយអប់រំបានទូលំទូលាយទៅដល់សហគមន៍មូលដ្ឋានឱ្យកាន់តែយល់ច្បាស់ពីអនាម័យ បរិស្ថាន និងការថែទាំសុខមាលភាព រួមទាំងចៀសឱ្យឆ្ងាយពីគ្រឿងញៀន។ទាំងនេះកាត់បន្ថយបន្ទុករបស់កាកបាទក្រហមក៏ដូចជាការចំណាយថវិការជាតិផងដែរ ៕
ដោយ ៖គៀន ច័ន្ទហ៊ីន
