អ្នកស្រុកសំឡូតទទួលបានផ្លូវកៅស៊ូមួយខ្សែទៀត បន្តភ្ជាប់ពីគម្រោងចាស់
បាត់ដំបង៖ក្រសួងអភិវឌ្ឍន៍ជនបទ រួមជាមួយរដ្ឋបាលខេត្តបាត់ដំបង ក្នុងសប្ដាហ៍នេះបានបើកការដ្ឋានសាងសង់ផ្លូវក្រាលកៅស៊ូ ប្រភេទឌីប៊ីអេសធី(DBST)មួយខ្សែប្រវែង៤គីឡូម៉ែត្រ ដែលជាជំហានបន្តភ្ជាប់ជាមួយគម្រោងចាស់ឆ្នាំ២០២៤ ស្ថិតនៅភូមិអូររាំងខេន ឃុំស៊ុង ឆ្ពោះទៅភូមិអន្លង់ពួក ឃុំតាសាញ ស្រុកសំឡូត ខេត្តបាត់ដំបង ។ការដ្ឋាននេះអនុវត្តដោយកងកម្លាំងវិស្វកម្មនាយកដ្ឋានស្ថាបនានិងវិស្វកម្ម នៃអគ្គនាយកដ្ឋាភស្តុភារ និង ហិរញ្ញវត្ថុក្រសួងមហាផ្ទៃ។
ជាការកត់សម្គាល់ក្នុងសប្តាហ៍ទី៤នៃខែកុម្ភៈនេះ ក្រសួងអភិវឌ្ឍន៍ជនបទមមាញឹកក្នុងការបើកការដ្ឋានសាងសង់ផ្លូវក្រាលកៅស៊ូDBST ,ផ្លូវបេតុងនិងផ្លូវល្បាយថ្មភ្នំចំនួន៣ខ្សែ តាមនៅឃុំមួយចំនួនស្ថិតក្នុងរដ្ឋបាលនៃស្រុកសំឡូត ដែលមានប្រវែងសរុបជាង១០គីឡូម៉ែត្រ ក្នុងនោះជាប្រភេទផ្លូវកៅស៊ូចំនួន៨ គីឡូម៉ែត្រ ,ផ្លូវបេតុង៣០០ម៉ែត្រនិងកែលម្អស្តារឡើងវិញផ្លូវល្បាយថ្មភ្នំ ប្រវែង ៤គីឡូម៉ែត្រ ព្រមទាំងសំណង៎សិល្បការមួយចំនួនទៀត ។
ឯកឧត្តម ជី ស៊ីថា រដ្ឋលេខាធិការក្រសួងអភិវឌ្ឍន៍ជនបទតំណាងឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទក្នុងពិធីបើកការដ្ឋានសាងសង់ផ្លូវក្រាលកៅស៊ូខាងលើបានបញ្ជាក់ថា ផ្លូវក្រាលកៅស៊ូដែលនឹងស្ថាបនាពីពេលនេះទៅ ជាជំហានបន្តភ្ជាប់ជាមួយគម្រោងចាស់ឆ្នាំ២០២៤កន្លងទៅស្ថិតនៅភូមិអូររាំងខេន ឃុំស៊ុង ឆ្ពោះទៅភូមិអន្លង់ពួក ឃុំតាសាញ ស្រុកសំឡូត ។ឯកឧត្តមបន្តថា នេះជាការងារលើកកម្រិតគុណភាពផ្លូវក្រាលកៅស៊ូពីរជាន់(DBST)ប្រវែង៤គីឡូម៉ែត្រ,ទទឹង ៦ម៉ែត្រ។រៀបចំចិញ្ចើមផ្លូវក្រាលដីល្បាយក្រួសសងខាងម្ខាងៗ០,៥ម៉ែត្រ។
សូមជម្រាបថា ប្រជាពលរដ្ឋរស់នៅភូមិអូររាំងខេន ឃុំស៊ុង មានចំនួន៥៥៩គ្រួសារ ស្មើមនុស្សរាយចំនួន ២ ០២០នាក់ ។មានមុខរបរសំខាន់ដំណាំចម្ការដូចជា ដំណាំកៅស៊ូ ទុរេន ម្រេច ស្វាយកែវរមៀត ដំឡូងមី ស្វាយចន្ទី និងដំណាំរួមផ្សំ
។ល។
ឯកឧត្តមរដ្ឋលេខាធិការបានពណ៌នាថា ការលើកកម្ពស់កម្រិតគុណភាពផ្លូវជនបទនៅទីនេះពិតជាផ្តល់សារប្រយោជន៍សម្រាប់ប្រជាពលរដ្ឋ ដែលរស់នៅភូមិ ឃុំនេះនិងភូមិឃុំក្បែរខាង និងសេដ្ឋកិច្ចជាតិ ដោយសារផ្លូវនេះចូលរួមកម្ពស់ជីវភាពប្រចាំថ្ងៃរបស់ប្រជាពលរដ្ឋ និងការផ្លាស់ប្តូរសេដ្ឋកិច្ចតាមច្រកទ្វារតំបន់៤០០ ព្រំដែនកម្ពុជា-ថៃ៕
អត្ថបទ-រូបភាព៖ អ៊ុក សំអាន បប.
