សៀមរាប៖បន្ទាប់ពីអនុវត្តដោយជោគជ័យប្រកបដោយភាពម្ចាស់ការបាន នៅអាកាសយានដ្ឋានអន្តរជាតិភ្នំពេញ កាលពីថ្ងៃទី២៧ ខែកុម្ភៈ ​ឆ្នាំ២០២៥ អាកាសយានដ្ឋានអន្តរជាតិសៀមរាប អង្គរបានរៀបចំ​លំហាត់សមយុទ្ធ​ទ្រង់ទ្រាយធំក្នុង​ប្រការ មានយន្តហោះធ្លាក់នៅ​ក្នុងអាកាសយានដ្ឋាន ដើម្បីត្រៀមឆ្លើយតបផ្នែកពាក់ព័ន្ធ​នានាឱ្យ​បានរហ័ស ប្រសិនមាន​ឧបទ្ទវ ហេតុកើតឡើងជាយថាហេតុ ។

នៅអាកាសយានដ្ឋានអន្តរជាតិសៀមរាប អង្គរ រដ្ឋលេខាធិការដ្ឋាន​អាកាស​ចរស៊ីវិល សហការជាមួយ​អាជ្ញាធរខេត្ត​សៀមរាប និងអង្គភាព​ស្ថាប័នពាក់ព័ន្ធ បានធ្វើលំហាត់សមយុទ្ធទ្រង់ទ្រាយធំក្រោមប្រធានបទ “យន្តហោះធ្លាក់នៅ​ក្នុង​អាកាសយានដ្ឋាន” ដើម្បីធ្វើការហ្វឹកហ្វឺន និងសាកល្បងសមត្ថភាពពីគ្រប់អ្នកពាក់ព័ន្ធក្នុងការឆ្លើយតបទាន់ពេលវេលា រហ័ស និងមានលក្ខណៈត្រឹមត្រូវ ជួយសង្គ្រោះជនរងគ្រោះពេល​មាន​គ្រោះ​មហន្តរាយ និងឧបទ្ទវហេតុគ្រោះថ្នាក់​យន្តហោះដោយប្រការណា​មួយ។

លំហាត់សមយុទ្ធនេះមានការចូលរួមពីអាជ្ញាធរខេត្ត ស្រុក តំណាង​ក្រុមហ៊ុន ក្រុមការងារពាក់ព័ន្ធប្រមាណ ២០០​នាក់ ក្នុងនោះមាន ផ្នែករាយការណ៍ឧបទ្ទវហេតុ ក្រុមពន្លត់អគ្គិភ័យ ក្រុមសង្រ្គោះនិង​ក្រុមគ្រូពេទ្យ ក្រុមកម្លាំងការពារ​សន្តិសុខ​​សណ្តាប់ធ្នាប់​ជាដើម ។

ឯកឧត្តម ជា អូន រដ្ឋលេខាធិការប្រចាំការ និងជាអ្នកនាំពាក្យរដ្ឋលេ​ខា​ធិការដ្ឋានអាកាសចរណ៍ស៊ីវិលបានវាយតម្លៃ​ខ្ពស់​ចំពោះ​ភាពជោគជ័យ​នៃលំហាត់សមយុទ្ធទ្រង់ទ្រាយធំ និងជាលើកដំបូងនៅក្នុងអាកាស​យានដ្ឋាន​អន្តរជាតិសៀមរាប អង្គរ (SAI)។ភាពជោគជ័យ​នៃការធ្វើ​លំហាត់សមយុទ្ធនេះ ជាតឹកតាងដ៏សំខាន់ និងជាអ្វីដែលក្រុមហ៊ុន​អាកាស​ចរណ៍ធំៗតម្រូវ មុននឹងភ្ជាប់ជើងហោះហើរ។ ក្រុមហ៊ុនទាំង​នោះចង់ឱ្យមានការធានាសុវត្ថិភាព សន្តិសុខ ប្រសិនបើមានគ្រោះ​អាសន្នកើត​ឡើងជាយថាហេតុ និងការឆ្លើយតបជួយសង្រ្គោះ​ភ្លាមៗ​ពីខាងព្រលានយន្តហោះ។ 

ចំណុចឆ្លើយតបដែលមានភាពខ្វះខាតនៅឡើយ ដូចជាចម្ងាយផ្លូវឆ្ងាយ​ពីមន្ទីរពេទ្យមកកាន់អាកាសយានដ្ឋាន ដោយ​រថយន្តសង្រ្គោះបន្ទាន់​ត្រូវការរយៈពេលជិត១ម៉ោង ទម្រាំមកដល់។ឯកឧត្តមបានបង្ហាញ​ពីគម្រោងរៀបចំទីតាំងសង្រ្គោះ​បន្ទាន់នៅតាម​មណ្ឌលសុខភាពជិត​ព្រលានយន្តហោះ ក៏ដូចជាគម្រោងវិនិយោគផ្លូវល្បឿនលឿនបន្ថែម ដើម្បីបង្ខិត​ព្រលានឱ្យ​កាន់តែ​ជិតទីក្រុងសៀមរាប ។ 

លោក ប៊ុន រដ្ឋា ប្រធានអាកាសយានដ្ឋានអន្តរជាតិសៀមរាប-អង្គរ បានឱ្យដឹងថា លំហាត់សមយុទ្ធនេះធ្វើឡើងស្របតាម​គោលការណ៍របស់អង្គការអាកាសចរណ៍អន្តរជាតិ ដែលតម្រូវឱ្យគ្រប់អាកាសយានដ្ឋានអន្តរជាតិ ធ្វើរយៈពេល២ឆ្នាំម្ដង។ អាកាសយានដ្ឋានអន្តរជាតិសៀមរាប អង្គរ ជាព្រលានយន្តហោះកម្រិត 4E ហើយទៅអនាគតនឹងមានយន្តហោះខ្នាតធំៗ ដែលនឹងផ្ទុកអ្នកដំណើររហូតដល់ជាង៣០០ទៅ៥០០នាក់ ។ ដូច្នេះការត្រៀមក្នុងការឆ្លើយតបនៅពេលមានអាសន្ន គឺចាំ​បាច់​ត្រូវធ្វើឲ្យបានល្អប្រសើរនិងធ្វើឲ្យមានភាពជឿជាក់បំផុត ។ 

សូមជម្រាបថា បច្ចុប្បន្ន​មានអ្នកដំណើរចូលមកកាន់ខេត្តសៀមរាបតាមរយៈអាកាសយានដ្ឋានអន្តរជាតិសៀមរាប អង្គរ ប្រមាណ ៦.០០០នាក់ក្នុងមួយថ្ងៃ។តាមការលើកឡើងរបស់មន្រ្តីអាកាសចរណ៍ស៊ីវិល មាន​ក្រុមហ៊ុនធំៗ​ដែលគ្រោង​ភ្ជាប់ជើងហោះហើរត្រង់មកកាន់អាកាសយានដ្ឋានអន្តរជាតិខេត្តសៀមរាប អង្គររួមមាន​ក្រុមហ៊ុនមកពីប្រទេស​តួកគី ,កាតា ,អូស្រ្តាលី ដែលនឹងនាំភ្ញៀវពីតំបន់​អឺរ៉ុប និងមជ្ឈឹមបូព៌ា ៕ 

ដោយ៖ប៊ុន រដ្ឋា