ជ្រើសរើសបេក្ខជនអ្នកខ្លាំងលេខ១ និង លេខ២ ដើម្បីចូលរួមប្រកួតអុកចត្រង្គ ក្នុងមហាព្រឹត្តិការណ៍អង្គរសង្ក្រាន្ត ឆ្នាំ២០២៥
(ភ្នំពេញ)៖ ក្រុមការងារអុកចត្រង្គ នៃគណៈកម្មការរៀបចំព្រឹត្តិការណ៍អង្គរសង្ក្រាន្ត បានចេញសេចក្តីជូនដំណឹងមួយដល់ និស្សិត នៅតាមគ្រឹះស្ថានឧត្តមសិក្សារដ្ឋ និងឯកជនពីព្រឹត្តិការណ៍ជ្រើសរើសរកបេក្ខជនប្រកួតអុកចត្រង្គ ដើម្បីចូលរួមអបអរសាទរមហាព្រឹត្តិការណ៍អង្គរ សង្ក្រាន្តឆ្នាំ២០២៥ ដែលនឹងប្រព្រឹត្តទៅនៅថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ នៅខេត្តសៀមរាប ខាងមុខ នេះ ។
ក្នុងសេចក្តីជូនដំណឹងនេះបានបញ្ជាក់ថា គណៈកម្មការរៀបចំព្រឹត្តិការណ៍អង្គរសង្ក្រាន្ត នៃសហភាពសហព័ន្ធយុវជនកម្ពុជា នឹងរៀបចំការប្រកួតកីឡា អុកចត្រង្គកម្រិតសាកលវិទ្យាល័យ មហាវិទ្យាល័យ វិទ្យាស្ថានរដ្ឋ និងឯកជនទូទាំងប្រទេស ដើម្បីស្វែងរកអ្នកឈ្នះលេខ ១ ដល់លេខ២ ដើម្បីចូលរួមប្រកួតនៅក្នុងមហាព្រឹត្តិការណ៍អង្គរសង្ក្រាន្ត ឆ្នាំ២០២៥ នៅខេត្តសៀមរាបខាងមុខ ។
ប្រភពខាងលើនេះបានឱ្យដឹងដែរថាគណៈកម្មការរៀបចំ ព្រឹត្តិការណ៍អង្គរសង្ក្រាន្ត នៃសហភាពសហព័ន្ធយុវជនកម្ពុជា នឹងរៀបចំការប្រកួតកីឡាអុកចត្រង្គនៅទូទាំងប្រទេស ដោយធ្វើការបែងចែកជា៧តំបន់ (ខេត្តព្រះសីហនុ ខេត្តកំពង់ស្ពឺ ខេត្តស្ទឹងត្រែង ខេត្តកំពង់ចាម ខេត្តសៀមរាប ខេត្តបាត់ដំបងនិង រាជធានីភ្នំពេញ) ដែលអ្នកឈ្នះចាប់ពីលេខ១ ដល់លេខ៣ តាមតំបន់នីមួយៗនឹងត្រូវប្រកួតជម្រុះនៅរាជធានីភ្នំពេញ ដើម្បីយកអ្នកឈ្នះចំនួន ៨នាក់ មកប្រកួតនៅក្នុងមហាព្រឹត្តិការណ៍អង្គរសង្ក្រាន្ត ឆ្នាំ២០២៥ នៅខេត្តសៀមរាប ៕
ដោយ៖ម៉ាដេប៉ូ
