បាត់ដំបង ក្លាយជាខេត្តទី១៧ ដែលទទួលពានជ័យលាភី “បញ្ចប់ការបន្ទោបង់ពាសវាលពាសកាល”
បាត់ដំបង៖ជាមោទកភាពមួយថ្មីទៀតសម្រាប់ខេត្តបាត់ដំបង បន្ទាប់ពីខេត្តប្រកបដោយសក្តានុពលសេដ្ឋកិច្ចនិងទេសចរណ៍មួយនេះ ត្រូវបានប្រកាសទទួលស្គាល់ និងប្រគល់ពានជ័យលាភី”បញ្ចប់ការបន្ទោបង់ពាសវាលពាសកាល “(ODF)ដល់រដ្ឋបាលខេត្តដោយឯកឧត្តម ឆាយ ប្ញទ្ធីសែន រដ្ឋមន្រ្តីក្រសួងអភិវឌ្ឍន៍ជនបទ។ ជ័យលាភីនេះ បានដំឡើងថ្នាក់ខេត្តបាត់ដំបង ក្លាយជាខេត្តទី១៧ ក្នុងចំណោមរាជធានី ខេត្តចំនួន២៥របស់ព្រះរាជាណាចក្រកម្ពុជាជាខេត្ត”បញ្ចប់ការបន្ទោបង់ពាសវាលពាសកាល” ។
ក្នុងពិធីប្រកាសជ័យលាភី”បញ្ចប់ការបន្ទោបង់ពាសវាលពាសកាល “ឬហៅកាត់ថា អូឌីអេហ្វ (ODF)ដែលប្រារព្ធនៅសួនយុវ័ន នៃក្រុងបាត់ដំបង ដោយមានអ្នកចូលរួមរាប់ពាន់នាក់ និងមានការដង្ហែក្បួនអបអរផងនោះ ចំពោះវត្តមាន ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ ឯកឧត្តម អ៊ុយ រី ប្រធានក្រុមប្រឹក្សាខេត្ត ឯកឧត្តម សុខ លូ អភិបាលខេត្តបាត់ដំបងបានប្រកាសដោយអំណរថា នេះជាសមិទ្ធផលរួម ជាកិត្តិយស កេរ្តិ៍របស់អ្នកខេត្តបាត់ដំបងទាំងមូល មិនមែនជាសមិទ្ធិដោយឡែករបស់អ្នកណាមួយឡើយ។ ប្រសិនជាពុំមានការចូលរួមសស្រោកសស្រាំរបស់ប្រជាពលរដ្ឋទូទាំងខេត្តទេ ជាខេត្តបញ្ចប់ការបន្ទោបង់ពាសវាលពាសកាល ក៏ពុំអាចសម្រេចបានដែរ ។
បន្ថែមលើសពីស្នាដៃនៃការខិតខំរបស់រដ្ឋបាលខេត្តបាត់ដំបង ឯកឧត្ដមរដ្ឋមន្រ្ដីក្រសួងអភិវឌ្ឍន៍ជនបទ ឆាយ ប្ញទ្ធីសែន បានគូសរំលេចថា គុណបំណាច់នៃ “សុខសន្តិភាព” ដែលកើតចេញពីការលះបង់ដ៏ធំធេង និងការខិតខំប្រឹងប្រែងឥតឈប់ឈរដើម្បីជាតិ និងប្រជាជនដោយយកជីវិតធ្វើជាដើមទុនរបស់សម្តេចតេជោ ហ៊ុនសែន ” ជាបិតាសន្តិភាព ស្ថាបនិកមគ្គុទេសក៍ឯក និងប្រតិបត្តិករនយោបាយឈ្នះឈ្នះ និងសន្ដិភាព” និងក្រោមការបន្តវេនដឹកនាំប្រកបដោយភាពឈ្លាសវៃ និងភាពប៉ិនប្រសប់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជាមូលដ្ឋានគ្រឹះធ្វើឱ្យខេត្តបាត់ដំបងសម្រេចបាននូវផ្លែផ្កានេះ។
ឯកឧត្តមរដ្ឋមន្រ្តីបានលើកសរសើរអភិបាលខេត្តបាត់ដំបង ដែលបានដឹកនាំធ្វើឱ្យមាន ការផ្លាស់ប្តូរកម្រិតជីវភាពរស់នៅរបស់ប្រជាពលរដ្ឋកាន់តែមានភាពប្រសើរឡើងជាបន្តបន្ទាប់ និងការកែលម្អលក្ខខណ្ឌ នៃការរស់នៅ តាមរយៈការលើកកម្ពស់ការផ្តល់សេវាទឹកស្អាតនិងអនាម័យ។ជាក់ស្ដែងការសម្រេចនូវ”ការបញ្ចប់បន្ទោបង់ពាសវាលពាសកាល” នៅទូទាំងខេត្តនាពេលនេះ។
មួយវិញទៀត កត្តាជួយជំរុញឱ្យខេត្តបាត់ដំបងសម្រេចបានជោគជ័យថ្មីនេះ ក៏មានការចូលរួមពីដៃគូអភិវឌ្ឍន៍ផងដែរ ។លោក យី គឹមថាន នាយករងប្រចាំប្រទេសរបស់អង្គការភ្លែនអន្ដរជាតិ និងជាតំណាងអង្គការដៃគូអភិវឌ្ឍន៍វិស័យផ្គត់ផ្គង់ទឹកស្អាតនិងអនាម័យជនបទនៅកម្ពុជាបានលើកឡើងអំពីកិច្ចខិតខំប្រឹងប្រែងរបស់អង្គការភ្លែនអន្ដរជាតិ និងអង្គការដៃគូអភិវឌ្ឍន៍នានា ក្នុងការចូលរួមចំណែកជាមួយរាជរដ្ឋាភិបាល ដើម្បីគាំទ្រខេត្តបាត់ដំបងជាខេត្តគោលដៅអភិវឌ្ឍន៍ លើការអនុវត្តគម្រោងផ្គត់ផ្គង់ទឹកស្អាត និងអនាម័យដែលជាផ្នែកដ៏សំខាន់ធ្វើឱ្យខេត្តបាត់ដំបងទទួលបាននូវជ័យលាភីនៅថ្ងៃនេះ។
សូមជម្រាបថា តាមរបាយការណ៍របស់ឯកឧត្តមសុខ លូ អភិបាលខេត្តបាត់ដំបង បានបង្ហាញថា ទូទាំងខេត្តបាត់ដំបង មានស្រុកចំនួន១៣និងក្រុង១, ឃុំចំនួន៩៣និង១០សង្កាត់,និងមានភូមិចំនួន៨៤២ភូមិ។មានផ្ទះសរុប ២៤៧ ៨៥៨ខ្នង។មានគ្រួសារ ២៩៧ ២៥៥គ្រួសារ ក្នុងនោះ ផ្ទះដែលមានបង្គន់ប្រើប្រាស់ផ្ទាល់ខ្លួនស្មើនឹង ៩៥,៥៩ភាគរយ។ផ្ទះប្រើបង្គន់រួមស្មើនឹង ៤,៤១ភាគរយ។ ខ្នងផ្ទះមានកន្លែងលាងដៃនឹងសាប៊ូស្មើនឹង១០០ភាគរយ។ ខ្នងផ្ទះទុកដាក់ទឹកសម្រាប់ផឹកមានសុវត្ថិភាព ស្មើនឹង១០០ភាគរយ។ខ្នងផ្ទះទុកដាក់សំណល់ ខោលាមកកូនក្មេង លាមកសត្វ និងសំរាមមានរបៀបរៀបរយស្មើនឹង ១00ភាគរយ៕
អត្ថបទ-រូបភាព៖ អ៊ុក សំអាន បប.
