(ភ្នំពេញ)៖ ដើម្បីអបអរសាទរទិវាសិទ្ធនារីអន្តរជាតិ ៨មីនា ខួប​លើក​ទី១១៤ ឆ្នាំ២០២៥ ក្រសួងរៀបចំដែនដី បានរៀបចំ​កម្ម​វិធី​បរិច្ចាគឈាម ក្រោមប្រធានបទ “ផ្តល់ឈាម ផ្តល់ក្តីស្រ​លាញ់” ។ កម្មវិធីនេះ បានធ្វើឡើងពេញ ១ថ្ងៃទី៤ ខែមីនា ឆ្នាំ២០២៥ នៅទីស្តីការក្រសួងរៀបចំដែនដី នគរូបនីយកម្ម និងសំណង់ ដែលសហការរួមគ្នារវាងសហភាពសហព័ន្ធ​យុវជន​កម្ពុជារាជធានីភ្នំពេញ, សហភាពសហព័ន្ធយុវជនកម្ពុជា វិស័យ​រៀបចំដែនដីនគរូបនីយកម្ម និងសំណង់ និងមជ្ឈមណ្ឌល​ជាតិ​ផ្តល់​ឈាម ។

យោងតាមអ្នករៀបចំ អ្នកដែលបានចូលរួមបរិច្ចាគឈាម​មានប្រ​មាណ ៣០០នាក់ គឺជាមន្ត្រីរាជការ នៃក្រសួងដែនដី, សមាជិក​សហភាពសហព័ន្ធយុវជនកម្ពុជា បុគ្គលិកមកពីស្ថាប័នឯកជន និងប្រជាពលរដ្ឋទូទៅផងដែរ ។ ការរៀបចំកម្មវិធីផ្តល់ឈាម ដើម្បីអបអរសាទរទិវាសិទ្ធនារីអន្តរជាតិ ៨មីនា ឆ្នាំនេះ ប្រៀប​ប្រដូចជាការដឹងគុណដល់ស្រ្តីជាម្តាយគ្រប់រូបទាំងអស់ នៃអ្នក​បរិច្ចាគឈាម ដែលបានលះបង់ឈាមដើម្បីបង្កើតរូបកាយ​ពួកគេមក ។

យោងតាមអ្នកជំនាញ ការបរិច្ចាគឈាម គឺមិនមានគ្រោះថ្នាក់អ្វី​ទាំងអស់ ហើយមនុស្សគ្រប់រូបដែលមានសុខភាពល្អ និងស្ថិត​នៅ​ចន្លោះអាយុអាចបូបឈាមចេញបាន អាចស្ម័គ្រចិត្តបរិច្ចាក​ឈាមបានមួយឆ្នាំ ៣ដង ចំ ពោះស្រ្តី និង៤ដង ចំពោះបុរស ដែលនឹងធ្វើឲ្យចរន្តឈាមនៅក្នុងខ្លួនមនុស្សអាចសង្គ្រោះបាន និងមានសុវត្ថិភាពបំផុត ថែមទាំងបានជួយសុខភាពខ្លួនឯងផង រួមទាំងជួយជីវិតអ្នកដទៃផង ហើយទាំងនេះ គឺជាមូលហេតុ​ដែល​​នាំ​ឲ្យគេបង្កើតជាពាក្យស្លោកមួយទៀតថា «ខ្ញុំផ្តល់ឈាម​ថ្ងៃនេះ សុវត្ថិភាពឈាមសម្រាប់យើងទាំងអស់គ្នា» ។

តម្រូវការឈាមសម្រាប់សង្គ្រោះជីវិតមនុស្សជាតិ ត្រូវបានមន្ត្រី​ជំនាញ​បញ្ជាក់ថា គ្រប់ប្រទេសទាំងអស់នៅជុំវិញពិភពលោក គឺមានតម្រូវការឈាម១% ធៀបនឹងចំនួនប្រជាជនសរុប​នៃប្រ​ទេសនីមួយៗ គិតជារយៈពេលមួយឆ្នាំ ក្នុងនោះកម្ពុជាក៏ត្រូវ​បាន​គេគណនាដូចគ្នាផងដែរ ។ កម្ពុជាបច្ចុប្បន្ន បើគិតពីចំនួន​ប្រជាជនធៀបជាមួយនឹងតម្រូវការឈាម គឺកម្ពុជាត្រូវការ​ឈាមចំនួន ១៨ម៉ឺនកំប្លោក ក្នុងមួយឆ្នាំ ។ នៅជាមួយគ្នានោះ មជ្ឈមណ្ឌលជាតិផ្តល់ឈាមបានផ្គត់ផ្គង់ឈាមទៅអ្នកជំងឺបានជាង ១៧ម៉ឺនកំប្លោកហើយ ក្នុង១ឆ្នាំ ដែលស្មើនឹង ៩០% នៃតម្រូវការសរុប ។ ហើយចំនួនឈាមដែលមជ្ឈ​មណ្ឌលជាតិ​ទទួលបានទាំងនោះ ត្រូវបានលោកស្រីវេជ្ជបណ្ឌិត មើក សាមាន បញ្ជាក់ថា គឺទទួលបានមកពីអ្នកស្ម័គ្រចិត្តផ្តល់​ឈាមចំនួន ២៣% និងទទួលពីការផ្តល់ឈាមតាមរយៈ​ការប្តូរចំនួន ៧៧% ៕

អត្ថបទ ៖ គង់ សុផុល
រូបភាព ៖ គ្រី សម្បតិ្ត