តំណាងរាស្រ្តមណ្ឌលតាកែវ៖បច្ចុប្បន្នស្រ្តីបានរួមចំណែកកាន់តែខ្លាំងឡើងក្នុងការចូលរួមអភិវឌ្ឍន៍ប្រទេស
តាកែវ៖ លោកជំទាវ និន សាផុន ប្រធានគណៈកម្មការទី៩នៃរដ្ឋសភានិងជាតំណាងរាស្រ្តមណ្ឌលខេត្តតាកែវ បានលើកឡើងថា ដោយសារប្រទេសមានស្ថានភាពល្អប្រសើរ មានសុខសន្តិភាព បានជំរុញឱ្យស្រ្តីមានឱកាសកាន់តែច្រើនឡើងក្នុងការចូលរួម ចំណែកកាន់តែខ្លាំងជួយកសាងនិងអភិវឌ្ឍប្រទេស។
លោកជំទាវថ្លែងបែបនេះក្នុងឱកាសអញ្ជើញអបអរសាទរខួបលើកទី១១៤ ទិវាអន្តជាតិនារី ៨ មីនា ឆ្នាំ២០២៥នៅសាលប្រជុំ សាលាខេត្តតាកែវកាលពីព្រឹកថ្ងៃទី៥ ខែមីនា ឆ្នាំ២០២៥។លោកជំទាវបន្តថា ប្រមុខរាជរដ្ឋាភិបាលកម្ពុជាអាណត្តិមុនៗ និងអាណត្តិទី៧នេះតែងតែយកចិត្តទុកដាក់ជានិច្ចចំពោះស្រ្តី ព្រមទាំងបានចាត់ទុកស្រ្តីជាឆ្អឹងខ្នងនៃប្រទេសជាតិថែមទៀតផង ព្រោះស្រ្តីមានតួនាទីសំខាន់ណាស់ក្នុងសកម្មភាពជួយអភិវឌ្ឍន៍សង្គមជាតិដែលមិនអាចខ្វះបាន ។
ក្នុងឱកាសនេះដែរឯកឧត្តម វ៉ី សំណាង អភិបាលខេត្តតាកែវបានលើកទឹកចិត្តដល់ស្រ្តីដែលជាថ្នាក់ដឹកនាំ នៅតាមមន្ទីរអង្គភាព និងបណ្ដាក្រុងស្រុក ត្រូវខិតខំពង្រឹងសមត្ថភាពរបស់ខ្លួនឱ្យបានល្អប្រសើរបន្ថែមទៀត តាមរយៈការខិតខំរៀនសូត្រ និងសិក្សាស្រាវជ្រាវលើមុខជំនាញរបស់ខ្លួន ពិសេសជំនាញបច្ចេកវិទ្យាឌីជីថលដើម្បីឆ្លើយតបទៅនឹងបរិបទសង្គមបច្ចុប្បន្ន។
ដោយ៖តាកែវ
