កំពង់ឆ្នាំង៖ក្នុងពិធីប្រារព្ធខួបអនុស្សាវរីយ៍លើកទី ១១៤ទិវាអន្តរ​ជាតិ​នារី៨ មីនា ប្រារព្ធនៅសាលាស្រុករលាប្អៀរ ខេត្ត​កំពង់ឆ្នាំង​ឯកឧត្តម​បណ្ឌិតសភាចារ្យ  អ៊ុក រ៉ាប៊ុន ទេសរដ្ឋមន្រ្តី ទទួលបន្ទុកបេសកកម្ម​ពិសេសបានមានប្រសាសន៍ថា ទិវាសិទ្ធិនារីអន្តរជាតិបានធ្វើ​ឡើងជា​រៀងរាល់ឆ្នាំដើម្បីរំលឹកដល់វីរភាពរបស់នារីសកលលោកក្នុងការទាមទារសិទ្ធិស្មើគ្នារវាងបុរសនិងស្ត្រី ។

ដោយមានវត្តមានលោកជំទាវ កែ ច័ន្ទមុនី តំណាងរាស្ត្រមណ្ឌល​ខេត្ត​កំពង់ឆ្នាំងផង ឯកឧត្តមបណ្ឌិតសភាចារ្យបានបន្តថា ទិវានារីអន្តរជាតិ​៨មីនា ឆ្នាំនេះធ្វើឡើងក្រោមប្រធាបទ «សិទ្ធិសមភាព និងភាពអង់​អាចចំពោះស្ត្រី និងក្មេងស្រីគ្រប់រូប »។ដូចនេះការចូលរួមរបស់​ស្រ្តីនា​ពេលបច្ចុប្បន្នទាំងវិស័យឯកជន និង វិស័យសារធារណៈ នៅក្នុង​សង្គមកម្ពុជាកាន់​តែបង្ហាញ​ឱ្យឃើញអំពីកាតព្វកិច្ច ភារកិច្ច តួនាទី និងការអនុវត្តនូវសិទ្ធិពេញលេញ។

លោក សេង វិចិត្រ អភិបាលស្រុករលាប្អៀរ បានរាយការណ៍ពី​សកម្មភាពនានារបស់ស្ត្រីក្នុងស្រុក​រលាប្អៀរ​បាន​ចូលរួម​ជាមន្ត្រីរាជការដោយស្ត្រីខ្លះមានឋានៈតួនាទី ជាអភិបាលរងស្រុក ប្រធានការិយាល័យ លោកមេឃុំ និងជាមេភូមិ​ជាច្រើននាក់ផងដែរ៕
ដោយ៖សុខ គឹមសៀន