រមណីយដ្ឋានកម្សាន្តឆ្នេរកោះប៉ែន និងស្ពានប្រដឺសប្ញស្សី ប្រារព្ធខួប១៥ឆ្នាំ
កំពង់ចាម៖ រដ្ឋបាលខេត្តកំពង់ចាមកាលពីថ្ងៃទី៨ ខែមីនា ឆ្នាំ២០២៥បានប្រារព្ធពិធីអបអរខួប ១៥ឆ្នាំ (២០១១-២០២៥)នៃការបង្កើតកន្លែងកម្សាន្តឆ្នេរកោះប៉ែន ,ស្ពានឫស្សី(ប្រដឹស)ដ៏ទាក់ទាញរបស់ខេត្តកំពង់ចាម ហើយក៏ត្រូវចំថ្ងៃ នៃទិវាអន្តរជាតិនារី ៨មីនា ឆ្នាំ២០៥ ខួបលើកទី១១៤ ។ក្នុងព្រឹត្តិការណ៍នេះក៏មានការរៀបចំពិធីកម្សាន្តនានាជាច្រើន អមដោយការបាញ់កាំជ្រួចផង។
លោក ស៊ាន សុគុន ប្រធានមន្ទីរទេសចរណ៍ ខេត្តកំពង់ចាមបានឱ្យដឹងនៅព្រឹកថ្ងៃទី៩ ខែមីនាថា ពិធីបុណ្យ «ឆ្នេរកោះប៉ែន» ត្រូវបានម្ចាស់រមណីយដ្ឋានរៀបចំចាប់ពីថ្ងៃទី៧ ដល់ថ្ងៃទី១២ ខែមីនា នៅបរិវេណរមណីយដ្ឋានធម្មជាតិឆ្នេរខ្សាច់កោះប៉ែន ។ ការរៀបចំពិធីបុណ្យនេះ មានបំណង ដើម្បីលើកកម្ពស់វិស័យទេសចរណ៍ បង្កលក្ខណៈកម្សាន្តជូនដល់ប្រជាពលរដ្ឋ នៅក្នុងខេត្ត និងក្រៅខេត្ត ក៏ដូចជាភ្ញៀវទេសចរជាតិ និងអន្តរជាតិ ឱ្យមកកម្សាន្តឱ្យបានកាន់តែច្រើន។ ព្រឹត្តិការណ៍នេះ ក៏មានរៀបចំកម្មវិធីកម្សាន្តជាច្រើន ដូចជា ការប្រកួតបាល់ទាត់លើវាលខ្សាច់ ការតាំងពិព័រណ៍ ការប្រគំតន្ត្រី ប្រដាល់គុនខ្មែរ និងការបាញ់កាំជ្រួច ជាដើម។
លោកប្រធានមន្ទីរបន្តថា គិតត្រឹមថ្ងៃទី៩ ខែមីនា ខេត្តទទួលបានភ្ញៀវទេសចរសរុប ៥៤.៧០៧នាក់ ក្នុងនោះ ភ្ញៀវទេសចរជាតិចំនួន ៥៤.៦០៥នាក់ និងភ្ញៀវទេសចរបរទេសចំនួន ១០២នាក់។
ចូលរួមអបអរ និងបង្កលក្ខណៈឱ្យកាន់អធឹកអធមថែមទៀតកាលពីព្រឹកថ្ងៃទី៨ ខែមីនា ឯកឧត្តម អ៊ុន ចាន់ដា អភិបាល ខេត្តកំពង់ចាមបានដឹកនាំក្រុមការងារ ចុះពិនិត្យការរៀបចំសណ្តាប់ធ្នាប់ និងសោភណភាព កន្លែងរៀបចំពិធីបុណ្យជាមួយការណែនាំដល់អាជ្ញាធរ និងសមត្ថកិច្ច នៅក្នុងមូលដ្ឋាន ក៏ដូចជា ម្ចាស់រមណីដ្ឋាន សូមយកចិត្តទុកដាក់ខ្ពស់ លើសន្តិសុខ សណ្តាប់សាធារណៈ និងសោភណភាព ៕
ដោយ៖លី ពៅ
