ឯកឧត្តម ហ៊ុន ម៉ានី អញ្ជើញចូលរួមពិធីបើកវគ្គបណ្ដុះបណ្ដាល”គ្រូបង្គោលលើការងារមហាជនរាជធានី -ខេត្ត “
ភ្នំពេញ៖ ឯកឧត្តម ហ៊ុន ម៉ានី សមាជិកគណៈអចិន្រ្តៃយ៍គណៈកម្មាធិការកណ្តាលនិងជាអគ្គលេខាធិការគណៈចលនាមហាជននៃគណៈកម្មាធិការកណ្តាលគណបក្សប្រជាជនកម្ពុជា បានអញ្ជើញជាអធិបតីប្រកាសបើកវគ្គបណ្ដុះបណ្ដាល គ្រូបង្គោលលើការងារមហាជន រាជធានី-ខេត្ត កាលពីចុងសប្ដាហ៍នៅវិមាន ៧ មករា ទីស្នាក់ការកណ្តាលគណបក្សប្រជាជនកម្ពុជា រាជធានីភ្នំពេញ។
មានប្រសាសន៍ទៅកាន់សិក្ខាកាម ឯកឧត្តម ហ៊ុន ម៉ានី បានថ្លែងអំណរគុណចំពោះការអញ្ជើញមកចូលរួមវគ្គបណ្តុះបណ្តាល។ឯកឧត្តមក៏បាននាំយកការផ្តាំផ្ញើការសាកសួរសុខទុក្ខ និងសេចក្ដីនឹករលឹកពីសំណាក់សម្ដេចសង្គហបណ្ឌិតម៉ែន សំអន អនុប្រធានគណបក្សប្រជាជនកម្ពុជា និងប្រធានគណៈចលនានៃគណៈកម្មាធិការកណ្ដាលនៃគណបក្សប្រជាជន ។ ឯកឧត្តមបានរំលឹកថា គណៈចលនាមហាជន នៃគណៈកម្មាធិការកណ្ដាលត្រូវបានបង្កើតឡើងក្នុងមហាសន្និបាតទូទាំងប្រទេសរបស់គណបក្សនាថ្ងៃទី៣០ -៣១ ខែមករា និងថ្ងៃទី១ ខែកុម្ភៈ ឆ្នាំ២០១៥ ដើម្បីអនុវត្តការងាណែនាំ ដឹកនាំ តម្រង់ទិស និងសម្របសម្រួលការងារចលនាមហាជន ក្នុងស្រទាប់យុវជន ស្រ្តី កម្មករនិយោជិក និងអង្គការសមាគមនានា ។
ឯកឧត្តមបានសង្កត់ធ្ងន់ថា ការរៀបចំវគ្គបណ្ដុះបណ្ដាលជនបង្គោលថ្ងៃនេះគឺជាជំហានមួយដើម្បីលើកកម្ពស់ គាំទ្រការងារមហាជននៅថ្នាក់ក្រោមជាតិឱ្យកាន់តែមានប្រសិទ្ធិភាពតាមរយៈការពង្រឹងបន្ថែមសមត្ថភាពមន្រ្តីគណបក្ស ដែលឆ្លើយតបទៅកាន់សំណូមពររបស់គណៈចលនាមហាជនរាជធានី-ខេត្តផងដែរ ជាពិសេសគឺអនុវត្តតាមអនុសាសន៍សម្ដេចអគ្គមហាសេនាធិបតីតេជោហ៊ុន សែន ប្រធានគណបក្សប្រជាជនកម្ពុជានៅក្នុងសន្និបាតគណៈមហាជនកាលពី ថ្ងៃទី ១៧ -១៨ ខែធ្នូ ឆ្នាំ២០២៤ កន្លងទៅ។
ឯកឧត្តម បានគូសបញ្ជាក់សារជាថ្មីនូវប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន ដែលបានលើកឡើងថា «ទំនុកចិត្តរបស់ប្រជាពលរដ្ឋត្រូវធ្វើឡើងជាប្រចាំ ហើយទាមទារពេលវេលា» ជាការផ្តាំផ្ញើដល់សិក្ខាកាមដែលជាមន្រ្តីគណបក្សទទួលបន្ទុកការងារចលនាមហាជនត្រូវប្រកាន់ខ្ជាប់ក្នុងការបំពេញភារកិច្ចការងារជូនគណបក្ស។
សូមជម្រាបថា នេះជាជុំទី១ នៃវគ្គបណ្តុះបណ្តាលគ្រូបង្គោលលើការងារមហាជន ដែលសិក្ខាកាមអញ្ជើញមកពីខេត្តព្រះសីហនុ កោះកុង កំពត កែប តាកែវ និងខេត្តកំពង់ស្ពឺ ។វគ្គនេះសិក្ខាកាម សរុប ៤៦ នាក់៕
ដោយ៖ ជាវ ចន្ធូ
រូបភាព៖ស.ស.យ.ក.
