កំពង់ចាម៖អភិបាលខេត្តកំពង់ចាម ឯកឧត្តម អ៊ុន ចាន់ដា បានថ្លែង ថា កត្តារួបរួមថែរក្សាសុខសន្តិភាពគឺនាំមកនូវការ​អភិវឌ្ឍរីក ចម្រើនឥតឈប់ឈរ។ដូច្នេះយើងត្រូវបន្តរួបរួមគ្នា​ដើម្បី​កសាង​សង្គមជាតិ និងកសាងនូវជីវភាពសម្រាប់ខ្លួន​យើងនិងកូនចៅ របស់យើងគ្រប់ជំនាន់ទៅមុខទៀត។ឯកឧត្តមបានថ្លែង​បែប​នេះក្នុងពិធីសម្ពោធផ្លូវកៅស៊ូ​ប្រភេទ​DBST និងផ្លូវបេតុង​ប្រវែង៥,៥ គីឡូម៉ែត្រ និងសមិទ្ធផល​នានានៅវត្តភ្នំព្រះវិហារ​តម្លៃជាង២លានដុល្លារអាមេរិក ស្ថិតនៅភូមិព្រះវិហារ ឃុំតាំង​ក្រសាំង ស្រុក បាធាយកាល​ពីចុងសប្ដាហ៍កន្លងទៅ។

ក្នុងពិធីសម្ពោធផ្លូវក្រាលកៅស៊ូ និងផ្លូវបេតុងប្រវែងជាង ៥,៥គីឡូម៉ែត្រក្រោមវត្តមានឯកឧត្តម ខ្លូត ផនប្រធានក្រុម​ប្រឹក្សា ខេត្តកំពង់ចាមផងនោះ ឯកឧត្តម អ៊ុន ចាន់ដា អភិបាល​ខេត្តកំពង់ចាម បានថ្លែងថា ផ្លូវក្រាលកៅស៊ូ និងផ្លូវបេតុងដែល​​ដាក់សម្ពោធនាពេលនេះពីភ្នំព្រះវិហារ ឆ្លងកាត់ភូមិចំនួន៣​រហូតដល់ភូមិបឹងវែង ឃុំតាំងក្រសាំង។ក្រៅពីផ្លូវនៅមាន​សមិទ្ធផល ចំនួន១៥មុខផ្សេងទៀតដែលចំណាយថវិកា​ប្រមាណ​២លានដុល្លារ។ឯកឧត្តមបញ្ជាក់ថាទាំងនេះសបញ្ជាក់​ឱ្យឃើញពីការរីកចម្រើននៃសេដ្ឋកិច្ចជាតិ ក៏ដូចជាបង្ហាញអំពី​ប្រាក់ចំណូលរបស់​ប្រជាពល​រដ្ឋមានការកើនឡើង ។

ក្នុងពិធីនេះដែរឯកឧត្តមអភិបាលខេត្ត ក៏បានទូលប្រគេន​ដល់​ព្រះសង្ឃ លោកគ្រូ អ្នកគ្រូក៏ដូចជាប្រជាពលរដ្ឋសូមជួយ ផ្សព្វផ្សាយ​អំពីផលប៉ះពាល់នៃគ្រឿងញៀន និងបញ្ហាគ្រោះថ្នាក់​ចរាចរណ៍ ៕
ដោយ៖លី ពៅ