បរទេស ៖ លោក មហាសេដ្ឋីបច្ចេកវិទ្យា Elon Musk បានប្រកាសពីការ វាយប្រហារតាមអ៊ីនធឺណិតធ្ងន់ធ្ងរ លើបណ្តាញទំនាក់ទំនងសង្គម X។

ដៃស្តាំរបស់ប្រធានាធិបតីអាមេរិករូបនេះ បានអះអាង កាលពីយប់ថ្ងៃចន្ទថា «ការវាយប្រហារតាមអ៊ីនធឺណិតដ៏ធំ កំពុងផ្តោតលើ X ដែលពីមុន ត្រូវបានគេស្គាល់ថា Twitter»។ នៅក្នុងសារបង្ហោះ នៅលើគណនីផ្លូវការ លោក Musk បានបន្ថែមថា «យើងទទួលរងការវាយប្រហារ ជារៀងរាល់ថ្ងៃ ប៉ុន្តែ លើកនេះ ត្រូវបានវាយប្រហារ ក្នុងទ្រង់ទ្រាយដ៏ធ្ងន់ធ្ងរ វាយប្រហារទាំងក្រុមធំ, ទាំងក្រុមសម្របសម្រួល ឬ អាចនិយាយថា សឹងតែមួយប្រទេស ប៉ះពាល់»។

របាយការណ៍ នៃបញ្ហាវាយប្រហារ តាមអ៊ីនធឺណិត ឬ cyberattack លើបណ្តាញសង្គម X បានចាប់ផ្តើម ជាមួយនឹងការណ៍ដែលអ្នកប្រើប្រាស់នៅតំបន់អាស៊ី អឺរ៉ុប និងអាមេរិកខាងជើង កាលពីថ្ងៃចន្ទ ដោយពួកគេអះអាងថា មិនអាចចូលប្រើ X បានទេ នេះបើយោងតាមគេហទំព័រតាមដាន Down Detector។

កាយវាយប្រហារនេះ បានកើតឡើង ក្រោយពេលដែលលោក Trump ទើបបានឆ្លើយតប ចំពោះការរិះគន់ កាន់តែខ្លាំងឡើង លើការកាត់បន្ថយ ដែលមិនធ្លាប់មានពីមុនមក ចំពោះរដ្ឋាភិបាលសហរដ្ឋអាមេរិក ដែលគ្រប់គ្រងដោយទីប្រឹក្សាមហាសេដ្ឋី លោក Musk។ លោក Trump បានសង្កត់ធ្ងន់ថា ទាំងលោក និង Musk អាចត្រូវបានកំណត់គោលដៅ ដូច្នេះ ត្រូវតែប្រុងប្រយ័ត្នខ្ពស់៕

ប្រភពពី AFP ប្រែសម្រួល៖ សារ៉ាត