(ភ្នំពេញ)៖ សម្ដេចនាយករដ្ឋមន្ដ្រី ហ៊ុន ម៉ាណែត បានថ្លែងឆ្លើយ​នឹង​ការចោទប្រកាន់ថា រៀបចំអង្គរសង្ក្រាន្ដ ចំណាយលុយ និង​ជារឿងអត់ប្រយោជន៍ ខណៈសម្ដេចបវរធិបតី បង្ហាញការ​យល់​ឃើញថា ការរៀបចំអង្គរសង្ក្រាន្ដនេះ ដើម្បីបង្កើតព្រឹត្ដិការ​ណ៍​ទេសចរណ៍ ទាក់ទាញភ្ញៀវឱ្យទៅកម្សាន្ដ ហើយម្យ៉ាងវិញ​ទៀត ប្រជាពលរដ្ឋនៅខេត្ដសៀមរាប ក៏ពេញចិត្ដនឹងការរៀបចំ​នេះដែរ ។

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរា​ជា​ណា​ចក្រកម្ពុជា ថ្លែងដូច្នេះនាឱកាសអញ្ជើញជាអធិបតី ក្នុងពិធីចែកសញ្ញាបត្រ និងសំណេះសំណាលជាមួយនិស្សិត​ថ្នាក់បរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ បញ្ចប់​ការសិក្សានៅវិទ្យាស្ថានវ៉ាន់ដា ប្រមាណជាង ៤ ៤២៦នាក់ មកពីរាជធានីភ្នំពេញ សាខាខេត្តសៀមរាប និងសាខាខេត្ត​បាត់ដំបង ក្នុងនោះក៏មាននិស្សិតបរិញ្ញាបត្រ ផ្នែកអាហារូបករ​ណ៍​​របស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចំនួន ៥០នាក់ នាព្រឹកថ្ងៃទី១១ ខែមីនា ឆ្នាំ២០២៥ នៅមជ្ឈមណ្ឌលកោះពេជ្រ រាជធានីភ្នំពេញ ។

សម្តេចបវរធិបតី ហ៊ុន ម៉ាណែត បានគូសបញ្ជាក់ថា រាជរដ្ឋាភិ​បាល ខិតខំប្រឹងប្រែងក្នុងការពង្រឹងវិស័យទេសចរណ៍ តាមរយៈ​ការរៀបចំព្រឹត្តិការណ៍អង្គរសង្រ្កាន្ត នៅខែមេសា ឆ្នាំ២០២៥ ខាងមុខនេះ ប៉ុន្តែបែរជាមានវិទ្យុបរទេសមួយចំនួន ចោទប្រកាន់​ថា ជារឿងអត់ប្រយោជន៍ទៅវិញ ។ សម្ដេច ក៏បានទទួលយក​ទស្សនៈរបស់អ្នកដែលលើកឡើងបែបនេះ ប៉ុន្តែសម្ដេច ក៏មាន​ការយល់ឃើញមួយផ្នែកទៀត គឺថា ការរៀបចំអង្គរសង្រ្កាន្ត នៅ​ឆ្នាំ២០២៥នេះ គឺជាការបង្កើត ព្រឹត្តិការណ៍ទេសចរណ៍​មួយ​ទៀត ដើម្បីទាក់ទាញ និងជំរុញវិស័យទេសចរណ៍ ដែល​នឹង​ជួយ​លើកកម្ពស់ជីវភាពប្រជាជន នៅក្នុងខេត្តសៀមរាប ហើយ​ការរៀបចំព្រឹត្តិការណ៍ទេសចរណ៍នេះ មិនមែន​ដើម្បី​ពង្វក់​យុវ​ជន កុំឱ្យគិតពីបញ្ហាសង្គម ឬក៏ដើម្បីបង្កើនប្រជាប្រិយភាពរបស់​រាជរដ្ឋាភិបាលនោះទេ ។

ដោយឡែកបើតាមឯកឧត្តម សុខ សប្បាយណា ប្រធានក្រុម​ការ​ងារប្រតិបត្តិអង្គរសង្ក្រាន្ដ បានបញ្ជាក់ឱ្យដឹងថា ព្រឹត្តិការណ៍​អង្គរសង្ក្រាន្ដ ឆ្នាំ២០២៥ ក្រោមប្រធានបទ “ស្នាមញញឹមសាទរ សង្ក្រាន្ដឆ្នាំថ្មី” មានទ្រង់ទ្រាយធំជាងមុន ធ្វើឡើងក្នុងគោល​បំណងផ្តល់ឱកាសឱ្យពាណិជ្ជករ សហគ្រិន អាជីវករ ផលិត​ផលពាណិជ្ជកម្ម ផលិតផលសិប្បកម្ម និងសេវាកម្មនានា ទទួល​បានប្រយោជន៍ធុរកិច្ចពីកំណើនទេសចរណ៍ ហើយក៏ដើម្បី​ជួប​ជុំយុវជន និងមហាជន ចូលរួមអបអរសាទរពិធីបុណ្យចូលឆ្នាំថ្មី​ប្រពៃណីជាតិខ្មែរ ជាមហាគ្រួសារខ្មែរ ។

ប្រធានក្រុមការងារប្រតិបត្តិអង្គរសង្ក្រាន្ដរូបនេះ បានបន្ថែមថា ដោយទទួលបានសេចក្ដីទុកពីសម្ដេចបវរធិបតី ហ៊ុន ម៉ាណែត នាយករដ្ឋមន្រ្តី ដល់ ស.ស.យ.ក. រៀបចំព្រឹត្តិការអង្គសង្ក្រាន្ដ​ឆ្នាំ២០២៥ នេះ នឹងមានកម្មវិធីចំនួន ៣៨, ក្រុមការងារ៣៤ និងយុវជនស្ម័គ្រចិត្តប្រមាណ ៥០០០នាក់ ដើម្បីធ្វើយ៉ាងឱ្យ​ព្រឹត្តិការព៍នេះ ប្រព្រឹត្តទៅដោយរលូន និងមានភាពទាក់ទាញ ហើយកម្មវិធីពិសេសថ្មីមួយ នៃព្រឹត្តិការណ៍អង្គរសង្រ្កាន្ត​ក្នុង​ឆ្នាំនេះ គឺមានឈ្មោះថា ចង្វាក់បេះដូងអង្គរ ( Angkor comes to life) គឺជាការសម្តែងទស្សនីយភាពរយៈពេល ៣ថ្ងៃ ដែលនឹ​ង​បង្ហាញពីភាពប្រសព្វគ្នា នៃការរម្លឹក ធ្វើឱ្យរស់រវើក និងផ្សារ​ភ្ជាប់ជីវិត នៃមរតកបេតិកភណ្ឌអរូបី នៅលើទីតាំងនៃមរតក​បេតិកភណ្ឌ និងផ្តល់ឱកាសដ៏ពិសេសជូនប្រជាពលរដ្ឋ “មួយ​ដងក្នុងមួយជីវិត” ក្នុងការទស្សនាការសម្តែងក្នុង​បរិវេណ​ប្រា​សាទ​អង្គរវត្ត ដែលនឹងបង្កើតជាការចងចាំ ក្តីស្រឡាញ់ និង​អនុស្សាវរីយ៍ដែលមិនអាចបំភ្លេចបាន និងការឈ្វេងយល់ និង​ទទួលបានបទពិសោធបន្ថែមអំពីភាពរុងរឿង ភាពល្បីល្បាញ សម្បូរបែបនៃវប្បធម៌ អរិយធម៌ខ្មែរ ៕

អត្ថបទ ៖ វណ្ណលុក
រូបភាព ៖ វ៉េង លីមហួត និង សួង ពិសិដ្ឋ