(ភ្នំពេញ)៖ ក្រុមអ្នកស្រាវជ្រាវនៃរដ្ឋបាលជលផល និង អង្គការ WWF កាលពីថ្ងៃទី១១ ខែមីនា ឆ្នាំ២០២៥ បានរកឃើញកូន​ផ្សោត​ថ្មីមួយក្បាលទៀតទើបតែកើតនៅអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ។

ក្រសួងកសិកម្ម រុក្ខាប្រមាញ់ និងនេសាទបានឱ្យដឹងនៅថ្ងៃទី​១២ ខែមីនា ឆ្នាំ២០២៥នេះថា តាមរយៈការពិនិត្យរបស់​ក្រុម​អ្នកស្រាវជ្រាវ គឺគេបានរកឃើញកូនផ្សោតមួយក្បាលនេះ​បាន​កើតពីមេរបស់វាដែលមានលេខកូដ១២៣ និងស្ថិតនៅក្នុងក្រុម​សត្វផ្សោតពេញវ័យចំនួន៣ក្បាលផ្សេងទៀត។

គួរបញ្ជាក់ថា ការរកឃើញកូនផ្សោតថ្មីមួយក្បាលនេះ គឺជាកូន​ផ្សោតទី៥ ដែលបានកើតនៅដើមឆ្នាំ២០២៥នេះ។

សត្វផ្សោតទន្លេមេគង្គ ត្រូវចាត់ថ្នាក់ក្នុងបញ្ជីក្រហមរបស់អង្គការ IUCN ជាប្រភេទសត្វជិតផុតពូជ និងកំពុងត្រូវបានការពារ និង​អភិរក្សយ៉ាងតឹងរឹង ដោយច្បាប់ស្តីពីជលផល និងអនុក្រឹត្យស្តី​ពីការ បង្កើតតំបន់គ្រប់គ្រងនិងការពារ​សត្វផ្សោតទន្លេមេគង្គ នៃ ព្រះរាជាណាចក្រកម្ពុជា។

ក្រសួងកសិកម្ម រុក្ខាប្រមាញ់ និងនេសាទ បានថ្លែងអំណរគុណ​ដល់​បងប្អូនឆ្នាំទន្លេ អាជ្ញាធរមូលដ្ឋាន និងប្រជាពលរដ្ឋ ដែល​បាន​ចូលរួមថែរក្សានិងការពារធនធានជលផលដ៏កម្រ​និង​មាន​តម្លៃនេះ។ ប្រសិនបងប្អូនប្រជានេសាទ បានប្រទះឃើញសត្វ​ផ្សោត ពិសេសកូនផ្សោត សូមផ្តល់ព័ត៌មានមកសមត្ថកិច្ច​ជល​ផល ដែលមានលេខទូរស័ព្ទ៖ ០១២ ៨៩៧ ៩៤៣ ០១១ ៣៥៥ ៨៨៣ ០៩៩ ៧៩១ ៩១៩ ០៩២ ៩១៨ ១៤៤ និង ០១៧ ៨១៨ ៣៨២ ៕

ដោយ ៖ ម៉ាដេប៉ូ