សៀមរាប៖ រដ្ឋបាលខេត្តសៀមរាប កាលពីរសៀលថ្ងៃទី១២ ខែមីនា ឆ្នាំ២០២៥​ បានរៀបចំពិធីដង្ហែ អបអរសាទរ​ពាន​រង្វាន់ជ័យលាភី​អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខា​ភិបាល​ប្រចាំឆ្នាំ២០២៤ ។

សូមជម្រាបថា រាជរដ្ឋាភិបាល​កម្ពុជាសម្រេចទទួលស្គាល់ជ័យលាភី អង្គភាពផ្តល់សេវាសាធារណៈគំរូក្នុងវិស័យ​អប់រំ  និង វិស័យសុខា​ភិបាលប្រចាំឆ្នាំ២០២៤ ដល់មន្ទីរពេទ្យបង្អែកខេត្តសៀមរាប​ចំណាត់ថា្នក់លេខ២ និង វិទ្យាល័យចំណេះទូទៅ និងបច្ចេកទេសពួក និង សាលាមតេ្តយ្យសិក្សាធនធានអង្គរ ចំណាត់ថា្នក់លេខ៧ ។ពិធីអបអរសាទរបានប្រព្រឹត្តទៅ​ក្រោម​វត្តមានឯកឧត្តម តោ គឹមស៊ាន តំណាងឯកឧត្តម លី សំរិទ្ធ ប្រធានក្រុមប្រឹក្សាខេត្ត និងលោកស្រី ម៉ននី រងី្ស អភិបាលរង​ខេត្តតំណាងឯកឧត្តម ប្រាក់ សោភ័ណ អភិបាលខេត្ត ។

លោកស្រី ម៉ននី រងី្ស បានបញ្ជាក់ថា ជោគជ័យដែលយើងទទួល​បាននាពេលនេះ គឺពិតជាបាននំាមកនូវកិត្តិយស​ដ៏ធំធេង​សម្រាប់​វិស័យ​អប់រំ និងវិស័យសុខាភិបាលនៅខេត្តសៀមរាប ដែលកន្លងមក​ក្រុមការងាររាជរដ្ឋាភិបាលចុះមូលដ្ឋានខេត្ត ក្រុង ស្រុក ឃុំ សង្កាត់ រដ្ឋបាលខេត្ត   បានយកចិត្តទុកដាក់ខ្ពស់និង​ចាត់ទុកជាវិស័យអាទិភាព ជាពិសេសបានជួយ​ឧបត្ថម្ភគាំទ្រគ្រប់រូបភាពដល់វិស័យទាំងពីរ ក្នុងគោលបំណងជំរុញកុមារដែលជាទំពាំងស្នងឬស្សី និងយុវជនដែល​ជា​សសរទ្រូងរបស់ប្រទេសជាតិ ឱ្យការសិក្សាប្រកបដោយគុណភាព និងមានសមត្ថភាព ព្រមទាំងបន្តពង្រឹងប្រតិបត្តិការលើ​ប្រព័ន្ធសុខា​ភិបាល​ឱ្យកាន់តែមានប្រសិទ្ធភាព ដោយផ្ដោតពិសេសលើការផ្ដល់​សេវាសុខភាពមានគុណភាព សុវត្ថិភាព ស័ក្តិសិទ្ធភាព និង សមធម៌ជូនប្រជាពលរដ្ឋ ៕
ដោយ៖​ប៊ុន​រដ្ឋា