មន្ទីរដែនដីខេត្តកំពត នឹងខិតខំពន្លឿនការចេញបណ្ណកម្មសិទ្ធិឱ្យបានចប់រួចរាល់ក្នុងឆ្នាំ២០២៥នេះ
កំពត៖វិញ្ញាបនបត្រសម្គាល់ម្ចាស់អចលនវត្ថុ ឬ ដែលនិយាយរត់មាត់ថា បណ្ណកម្មសិទ្ធិ ចំនួន ៣ ១៦០បណ្ណ ត្រូវបានប្រគល់ជូនប្រជាពលរដ្ឋចំនួន១ ៦៥៩គ្រួសារជាម្ចាស់កម្មសិទ្ធ នៅភូមិចំនួនបី ក្នុងឃុំចំនួនពីរ នៃស្រុកឈូក ខេត្តកំពត ខណៈមន្រ្តី នៃមន្ទីរជំនាញអះអាងថា នឹងខិតខំពន្លឿនការងារចេញបណ្ណកម្មសិទ្ធិក្នុងខេត្តឱ្យបានចប់រួចរាល់ទាំងអស់ក្នុងឆ្នាំ២០២៥នេះ។
កាលពីព្រឹកថ្ងៃទី១៤ ខែមីនា ឆ្នាំ២០២៥ ក្នុងបរិវេណវត្តអង្គល្បើក មានរៀបចំពិធីប្រគល់វិញ្ញាបនបត្រសម្គាល់ម្ចាស់អចលនវត្ថុ ឬ បណ្ណកម្មសិទ្ធិ ចំនួន ៣ ១៦០បណ្ណ ជូនដល់ប្រជាពលរដ្ឋចំនួន១ ៦៥៩គ្រួសារជាម្ចាស់កម្មសិទ្ធ មកពីភូមិចំនួនបី ក្នុងឃុំចំនួនពីរ នៃស្រុកឈូក ខេត្តកំពតក្រោមអធិបតីភាព ឯកឧត្តម ម៉ៅ ធនិន អភិបាលខេត្តកំពត ។
ជម្រាបជូនឯកឧត្តមអភិបាលខេត្តកំពត , លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់និងសុរិយោដីខេត្តកំពត បានលើកឡើងថា ក្រោមការដឹកនាំគាំទ្រ និងចង្អុលបង្ហាញដោយផ្ទាល់របស់ឯកឧត្តម សាយ សំអាល់ ឧបនាយករដ្ឋមន្រ្តី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ម៉ៅ ធនិន អភិបាលខេត្តកំពត លើឧបករណ៍បច្ចេកទេសក្នុងការជំរុញការងារចុះបញ្ជីដីធ្លី មន្ទីរនឹងខិតខំពន្លឿនការងារចេញបណ្ណកម្មសិទ្ធិក្នុងខេត្តឱ្យបានចប់រួចរាល់ទាំងអស់ក្នុងឆ្នាំ២០២៥នេះ។
ថ្លែងទៅកាន់ប្រជាពលរដ្ឋរាប់ពាន់គ្រួសារដែលមកចូលរួម ឯកឧត្តម ម៉ៅ ធនិន បានគូសរំលេចថា ក៏ដូចជាសម្ដេចតេជោ ហ៊ុន សែន ដែរក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា លោកបានគិតគូជានិច្ចពាក់ព័ន្ធនឹងការចុះបញ្ជីដីធ្លីមានលក្ខណៈជាប្រព័ន្ធ ។សម្តេចធិបតីបានដាក់ចុះចេញនូវយន្តការ ក៏ដូចជាការចង្អុលបង្ហាញដោយផ្ទាល់មកកាន់អាជ្ញាធររាជធានី-ខេត្ត និងមន្ទីរជំនាញត្រូវពន្លឿនក្នុងការចុះវាស់វែង និងចេញបណ្ណកម្មសិទ្ធិជូនពលរដ្ឋក្នុងមូលដ្ឋានរបស់ខ្លួនឱ្យបានឆាប់រហ័សបំផុត។ ឯកឧត្តមអភិបាលខេត្តបានបន្តថា ការពន្លឿននៃការចេញបណ្ណកម្មសិទ្ធិដីធ្លីឱ្យបានឆាប់រហ័សនេះសំដៅឱ្យប្រជាពលរដ្ឋដែលមានដីធ្លីច្បាស់លាស់ទាំងអស់ទទួលបាននូវការគ្រប់គ្រងដីធ្លីដោយស្របច្បាប់ ហើយក៏បានជួយកាត់បន្ថយនូវវិវាទដីធ្លីដែលកើតឡើងដោយការកាន់កាប់ដីធ្លីមិនច្បាស់លាស់។ឯកឧត្តមក៏បានផ្តាំផ្ញើដល់ប្រជាពលរដ្ឋដែលទទួលបានបណ្ណកម្មសិទ្ធិនាពេលនេះ សូមរក្សាទុកនូវបណ្ណនេះឱ្យបានត្រឹមត្រូវ៕
ដោយ៖ សិលា សារិន
