(ខេត្តកណ្តាល)៖ ក្រសួងរៀបចំដែនដី នគរូបនីយកម្ម និង សំណង់ សម្រេចជ្រើសរើសយកស្រុកពញាឮ ជាស្រុកដំបូ ងគេក្នុង​ការ​សិក្សាគម្រោង អភិវឌ្ឍន៍ និងកែលម្អសួនច្បារសា ធារណៈ លំហ​បៃតង និងបឹងធម្មជាតិ ពិសេសតំបន់​ប្រវត្តិ​សាស្ត្រ​ភ្នំព្រះរាជ​ទ្រព្យ​។

នេះបើយោងតាមកិច្ចប្រជុំនារសៀលថ្ងៃទី១៤ ខែមីនា ឆ្នាំ២០២៥ ​​ដឹកនាំដោយ ឯកឧត្តម ឈឿន បុណ្ណារ័ត្ន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និង ឯកឧត្តម គួច ចំរើន អភិបាល​ខេត្ត​កណ្តាល ពិនិត្យពិភាក្សា សំណើ​សុំកិច្ចសហការសម្របសម្រួលរៀបចំកិច្ចពិភាក្សា និង​ធ្វើបទ​បង្ហាញស្តីពី គម្រោងរៀបចំកែលម្អរមណីយដ្ឋាន​ភ្នំព្រះ​រាជទ្រព្យ និងលំហសាធារណៈនានា ស្ថិតនៅក្នុងភូមិសាស្ត្រ​ខេត្តកណ្តាល នៅសាលប្រជុំសាលាខេត្តកណ្តាល។

ឯកឧត្តម ឈឿន បុណ្ណារ័ត្ន មានប្រសាសន៍ថា៖ ខេត្តកណ្តាល​ជា​ខេត្តគោលដៅមួយក្នុងចំណោមរាជធានីខេត្តដទៃទៀត ក្នុង​ការ​អនុវត្តនូវលំហបៃតងនៅទីសាធារណៈ ដោយកំណត់យក​ស្រុកពញាឮ ជាស្រុកដំបូងគេបង្អស់ ក្នុងការបង្កើតនូវ​លំហ​បៃតងនៅទីសាធារណៈ ដែលអាចបង្កើតនូវដង្ហើមបៃតង កំណើនសេដ្ឋកិច្ចនៅទីនោះផ្ទាល់ តាមរយៈការទាក់ទាញ​ភ្ញៀវទេសចរណ៍ ដោយផ្សារភ្ជាប់ទីសាធារណៈ មានរបៀប​រៀបរយ អនាម័យ និងបង្កើតភាពស៊ីវិល័យជូនប្រជាពលរដ្ឋ ពិសេសបង្កើតអោយមានប្រាក់ចំណូលជូនប្រជាពលរដ្ឋនៅតំបន់នោះផងដែរ។

ឯកឧត្តមរដ្ឋលេខាធិការ បន្តថា៖ ការសិក្សាគម្រោងនេះ មាន​គោល​បំណង រៀបចំទីតាំងឱ្យមានសណ្តាប់ធ្នាប់ និងរបៀបរៀប​រយឡើងវិញ។ រក្សាប្រពៃណីវប្បធម៌ក្នុងតំបន់ រៀបចំបរិស្ថានឱ្យ​មានផាសុខភាព ជួយលើកកម្ពស់ជីវភាពប្រជាជន និងរបៀង​សេដ្ឋកិច្ចនៅក្នុងតំបន់។

ឯកឧត្តម គួច ចំរើន បានណែនាំដល់អភិបាលស្រុកពញាឮ មន្ទីរ​ជំនាញពាក់ព័ន្ធ ត្រូវធ្វើការសហការជាមួយក្រុមការងារ​របស់​ក្រសួងរៀបចំដែនដី នគររូបនីយកម្ម និងសំណង់ ក្នុង​ការសិក្សាកំណត់ទីតាំងឱ្យបានច្បាស់លាស់ និងសហការ​ឱ្យ​បានល្អ ធ្វើយ៉ាងណាឱ្យគម្រោង អភិវឌ្ឍន៍ និងកែលម្អសួន​ច្បារ​សាធារណៈ លំហបៃតង និងបឹងធម្មជាតិ នៅស្រុកពញាឮ ទទួល​បានលទ្ធផលល្អ ដើម្បីជាប្រយោជន៍របស់ប្រជាពល​រដ្ឋនៅក្នុងតំបន់ ពិសេសសម្រាប់ថ្ងៃអនាគតផងដែរ។

ជាមួយគ្នានេះដែរ ឯកឧត្តមអភិបាលខេត្តកណ្ដាល បានណែនាំ​ដល់អភិបាលក្រុង-ស្រុកទាំងអស់ ត្រូវរកទីតាំងសម្រាប់ក្រុង-ស្រុក​របស់ខ្លួន ដើម្បីបង្កើតនូវគម្រោង អភិវឌ្ឍន៍ និងកែលម្អ​សួន​ច្បារសាធារណៈ លំហបៃតង និងបឹងធម្មជាតិ នៅតាម​ក្រុង​ស្រុករៀងៗខ្លួន៕

ដោយ ៖ ង៉ាន់ ទិត្យ