បរទេស៖ ក្នុងពេលស្បថចូលកាន់តំណែង ជានាយករដ្ឋមន្ត្រីថ្មី របស់ប្រទេសកាណាដា លោក Mark Carney បាននិយាយថា ប្រទេសនេះនឹងមិនក្លាយជាផ្នែកមួយ នៃសហរដ្ឋអាមេរិក ជាដាច់ខាត ទោះបីតម្លៃណាក៏ដោយ។

លោក Mark Carney និយាយថា ប្រទេសកាណាដានឹង «មិនដែល» ត្រូវបានស្រូបចូល ទៅក្នុងសហរដ្ឋអាមេរិក ដោយលោកប្រកាសបដិសេធការគំរាមកំហែង ដាក់បញ្ចូល របស់ប្រធានាធិបតី Donald Trump ។ លោក Carney បាននិយាយបន្ទាប់ពីស្បថចូលកាន់តំណែង ជានាយករដ្ឋមន្ត្រីកាណាដា ថា «មិនថាតាមរបៀបណាក៏ដោយ រូបរាង ឬ ទម្រង់ណាមួយក៏ដោយ មិនអាចក្លាយជាផ្នែកមួយ នៃសហរដ្ឋអាមេរិក» ជាការថ្លែងនៅពេលមានក្តីសង្ឃឹមថា រដ្ឋាភិបាលរបស់លោក Mark Carney អាចស្វែងរកវិធី «ដើម្បីធ្វើការរួមគ្នា» ជាមួយរដ្ឋបាល Trump ។

យ៉ាងណាក៏ដោយ លោក Mark Carney ធ្លាប់បាននិយាយថា លោកនឹងមិនជួបលោក Donald Trump នោះទេ បើមិនផ្លាស់ប្តូរបំណងបំពានអធិបតេយ្យភាព របស់ប្រទេសកាណាដា។ ក្រៅពីចង់បាន កាណាដា ជារដ្ឋទី៥១ របស់សហរដ្ឋអាមេរិក លោក Trump បានផ្តើមដាក់ពន្ធបន្ថែមលើទំនិញកាណាដា ហើយកាណាដា ក៏វាយបកវិញ ដោយការបន្ថែមពន្ធទំនិញអាមេរិក ដូចគ្នា ខណៈដែលសង្គ្រាមពាណិជ្ជកម្មរវាងប្រទេសក្បែរខាងទាំងពីរ កំពុងផ្ទុះខ្លាំង៕

ប្រភពពី AFP ប្រែសម្រួល៖ សារ៉ាត