អភិបាលខេត្តកំពង់ចាម ជំរុញឱ្យយកចិត្តទុកដាក់ថែរក្សាឱ្យបាននូវសន្តិសុខ សណ្តាប់ធ្នាប់សាធារណៈ និងការអនុវត្តគោលនយោបាយភូមិឃុំ សង្កាត់ មានសុវត្ថិភាព
កំពង់ចាម៖ អភិបាលខេត្តកំពង់ចាមបានជំរុញដល់អាជ្ញាធរពាក់ព័ន្ធទាំងអស់ត្រូវថែរក្សាឱ្យបាននូវសន្តិសុខសណ្តាប់ធ្នាប់សាធារណៈ។ជាពិសេសគឺ សុខសន្តិភាព និងការអនុវត្តគោលនយោបាយភូមិឃុំ សង្កាត់ មានសុវត្ថិភាព ។ឯកឧត្តម អ៊ុន ចាន់ដា ថ្លែងបែបនេះក្នុងកិច្ចប្រជុំដកបទពិសោធន៍ការងារផ្សព្វផ្សាយ និងការអនុវត្តរគោលនយោបាយ «ភូមិ-ឃុំ-សង្កាត់មានសុវត្ថិភាព» ប្រាំខេត្តនៅសាលាខេត្តកំពង់ចាមកាលពីព្រឹកថ្ងៃទី១៧ ខែមីនា ឆ្នាំ២០២៥ ក្រោមវត្តមានឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ និងឯកឧត្តម ខ្លូត ផន ប្រធានក្រុមប្រឹក្សាខេត្ត ។
ចំពោះមុខប្រតិភូមកពីខេត្តចំនួនបួនផ្សេងដែលមានខេត្តកំពង់ចាមជាម្ចាស់ផ្ទះ ឯកឧត្តម អ៊ុន ចាន់ដា អភិបាលខេត្តកំពង់ចាមបានថ្លែងថា ដើម្បីសម្រេចបាន នូវចក្ខុវិស័យរយៈពេលខ្លី រយៈពេលមធ្យម និងរយៈពេលវែង ខេត្តត្រូវធ្វើការងាររួមមាន ទី១-ត្រូវថែរក្សាឱ្យបាននូវសន្តិសុខសណ្តាប់ធ្នាប់សាធារណៈ ,ទី២-ត្រូវពង្រឹងគុណភាព ទាំងប្រសិទ្ធភាពនៃការផ្តល់សេវាសាធារណៈ ,ទី៣-ត្រូវជំរុញក្នុងការអភិវឌ្ឍការចាប់ដៃគូវិនិយោគ ដើម្បីផ្តល់នូវ ឱកាសការងារជូនប្រជាពលរដ្ឋរបស់យើង ឱ្យទទួលបានសេដ្ឋកិច្ចបន្ថែម ទី៤-គឺត្រូវចូលរួម គ្រប់កម្មវិធីកែទម្រង់របស់រាជរដ្ឋាភិបាល ជាពិសេសគឺ កំណែទ្រមង់វិមជ្ឈការ និងវិសហមជ្ឈការ ដែលជាការងាររបស់យើងទាំងអស់គ្នា ។
ខេត្តចំនួនដែលមកចូលរួមមាន ខេត្តព្រៃវែង ព្រះវិហារ ពោធិសាត់ និងខេត្តរតនគីរី ។ឯកឧត្តម យុន ឈុន្នី រដ្ឋលេខាធិការក្រសួងមហាផ្ទៃ ក៏បានជំរុញដល់មន្ត្រីរដ្ឋបាលថ្នាក់ក្រោមជាតិ ឱ្យបន្តកិច្ចសហការ ផ្តល់នូវការគាំទ្រ និងចូលរួមអនុវត្តផែនការយុទ្ធសាស្ត្រ ស្តីពីការអនុវត្ត គោលនយោបាយ «ភូមិ-ឃុំ-សង្កាត់មានសុវត្ថិភាព» របស់រាជរដ្ឋាភិបាលឱ្យកាន់តែសកម្ម ឱ្យទទួលបានជោគជ័យថ្មីៗបន្ថែមទៀត ដើម្បីដំណើរការអភិវឌ្ឍសេដ្ឋកិច្ច សង្គមកិច្ចនៅមូលដ្ឋាន និងឈានទៅបង្កើនល្បឿននៃការកាត់បន្ថយភាពក្រីក្រ ព្រមទាំងរួមចំណែកក្នុងការអនុវត្ត ប្រកបដោយជោគជ័យនូវគោលដៅអភិវឌ្ឍន៍ប្រកបដោយចីរភាព ៕
ដោយ៖លី ពៅ
