តាកែវ៖ ព្រឹត្តិការណ៍បុណ្យទន្លេលើកទី៩ ដែលខេត្តតាកែវធ្វើជា​ម្ចាស់​ផ្ទះ​នឹងរៀបចំឡើង​ពីថ្ងៃទី២១-២៣ ខែមីនា នៅ​​បឹង​តាកែវ​​ខេត្ត​តា​កែវ​។ សម្ដេចមហាបវធិបតី ហ៊ុន ម៉ាណែត នាយករដ្ឋមន្ដ្រីកម្ពុជា និង​លោក​ជំទាវបណ្ឌិត នឹងចូលរួមក្នុង​ពិធី​បើក​​ព្រឹត្តិការណ៍នេះ នា​ថ្ងៃទី២២ ខែមីនា ។

តាមរយៈកិច្ចប្រជុំគណៈកម្មការអន្តរក្រសួងកាលពីព្រឹកថ្ងៃចន្ទទី១៧ ខែមីនា ឆ្នាំ២០២៥ ដឹកនាំដោយឯកឧត្តម ហួត ហាក់ រដ្ឋមន្រ្តីក្រសួង​ទេសចរណ៍ ឯកឧត្តម វ៉ី សំណាង អភិបាលខេត្តតាកែវដើម្បីត្រួតពិនិត្យ​មើលវឌ្ឍនភាពការងារត្រៀមរៀបចំ បុណ្យទន្លេលើកទី៩ ឆ្នាំ២០២៥ បានគូសរំលេចថា ក្នុងព្រឹត្តិការណ៍ប្រចាំឆ្នាំនៅខេត្តតាកែវលើកនេះ នឹងមានរៀបចំកីឡា១០ប្រភេទចូលរួម ក្នុងនោះមាន៖១. កីឡាជិះ​កង់ចម្ងាយ៧៥គីឡូម៉ែត្រ ភ្នំពេញ-តាកែវ, ២.កីឡារត់កម្សាន្តមហាជន ១ ២០០​នាក់, ៣.កីឡា អុកចត្រង្គ មហាជន, ៤. កីឡាកម្សាន្ត រែក បាយខុម លោតម៉ឹក, ៥.កីឡាបាល់ទះ មហាជន, ៦. កីឡាប៉ូល​(បេតង់)​មហាជន, ៧. កីឡាទូកកានូកាយ៉ាក មហាជន, ៨.ការបង្ហោះ​គោមរួមគ្នា៥០០គោម, ៩.កីឡាគុនខ្មែរ, និង១០.កីឡាសម្ដែង​ប៉ារ៉ា​ប៉ូទ័រ ។

ឯកឧត្តម វ៉ី សំណាង អភិបាលខេត្តតាកែវ បានរាយការណ៍​ជូន​អង្គ​ប្រជុំថា ទីតាំងត្រៀមរៀបចំពិធីបុណ្យទន្លេលើកទី៩ នៅ​សួន​ច្បារ​មាត់បឹងតាកែវ រដ្ឋបាលខេត្តបានរៀបចំសន្តិសុខ សណ្ដាប់ធ្នាប់ សម្អាតទីតាំង ទីតាំងស្ដង់ពិព័រណ៍ ទីតាំង​លែងកម្សាន្ត និងជិះទូកបាន​ត្រៀមរួចរាល់អស់ហើយ ពិសេសការត្រៀមស្វាគមន៍វត្តមានដ៏ខ្ពង់ខ្ពស់​សម្ដេច​មហាបវរធិបតី ហ៊ុន ម៉ាណែត នាយករដ្ឋមន្រ្តី និងលោកជំទាវ​បណ្ឌិត ពេជ ចន្ទមុន្នី។

ចំណែកឯកឧត្តមរដ្ឋមន្រ្តីក្រសួងទេសចរណ៍ បានបង្ហាញនូវក្តីរំពឹងថា ព្រឹត្តិការណ៍បុណ្យទន្លេលើកទី៩ នឹងជំរុញ​ការអភិវឌ្ឍ និងកំណើនសេដ្ឋកិច្ច​ជាតិ៕
ដោយ៖តាកែវ