សម្តេចធិបតី ហ៊ុន ម៉ាណែត សម្រេចធ្វើសំណង់លូមូលបេតុងសម្រាប់នគរបាលព្រំដែនប៉ុស្តិ៍វាលធំ និងប៉ុស្តិ៍ជ័យឃ្លាំង ក្នុងស្រុកស្នួល ខេត្តក្រចេះ
(ភ្នំពេញ)៖ ដូចការសន្យា សម្តេចធិបតី ហ៊ុន ម៉ាណែត បានសម្រេចធ្វើសំណង់លូមូលបេតុង ជូននគរបាលព្រំដែន ប៉ុស្តិ៍វាលធំ និងប៉ុស្តិ៍ជ័យឃ្លាំង ក្នុងស្រុកស្នួល ខេត្តក្រចេះ ។
តាមរយៈបណ្ដាញសង្គមនាព្រឹកថ្ងៃទី១៨ ខែមីនា ឆ្នាំ២០២៥ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញវីដេអូ ភ្ជាប់ជាមួយសំណេរថា ធ្វេីជូនតាមសន្យា ។
សំណង់លូមូលបេតុង សម្រាប់នគរបាលព្រំដែន ប៉ុស្តិ៍វាលធំ និងប៉ុស្តិ៍ជ័យឃ្លាំង ស្ថិតក្នុងស្រុកស្នួល ខេត្តក្រចេះ ដែលបាន សន្យាធ្វើជូន កាលថ្ងៃទី៣០ ខែកក្កដា ឆ្នាំ២០២៤ ក្នុងពេល ធ្វើដំណើរចុះពិនិត្យ សកម្មភាពជួសជុលផ្លូវ របស់កងវិស្វកម្មអគ្គ បញ្ជាការ និងស្ថានភាពជីវភាពរស់នៅរបស់ប្រជាពលរដ្ឋ តាម បណ្ដោយព្រំដែនកម្ពុជា-វៀតណាម ។
សម្ដេចធិបតី សូមអរគុណដល់កងវិស្វកម្មអគ្គបញ្ជាការ ដែលបានជួយកសាងនូវសំណង់ទាំងនេះបានយ៉ាងឆាប់រហ័ស ដើម្បីសម្រួលដល់ការបំពេញភារកិច្ច របស់បងប្អូននគរបាលព្រំដែន នៅប៉ុស្តិ៍ទាំងពីរខាងលើ ។
សូមរំលឹកថា សម្តេចធិបតីនាយករដ្ឋមន្ត្រី បានចុះពិនិត្យការជួសជុលផ្លូវនៅតាមបណ្តោយព្រំដែន កម្ពុជា - វៀតណាម ក្នុងភូមិសាស្ត្រខេត្តក្រចះ និងខេត្តមណ្ឌលគីរី កាលពីថ្ងៃ ទី៣០ ខែកក្កដា ឆ្នាំ២០២៤ ។
ក្នុងឱកាសនោះ សម្តេចធិបតី ក៏បានជួបសំណេះសំណាល ដោយសាមញ្ញជាមួយបងប្អូន អ៊ំពូមីង តាយាយនៅផ្សារកាបី ឃុំក្រញ៉ូងសែនជ័យ ស្រុកស្នូល ខេត្តក្រចេះ ហេីយក៏បានបន្តចុះជួបដោយផ្ទាល់ សាកសួរសុខទុក្ខកងកម្លាំងដែលកំពុងប្រចាំការ នៅតាមគោលដៅការពារព្រំដែនគោកទាំងនៅខេត្តក្រចេះ នៅច្រកទ្វារជ័យឃ្លាំង និងបន្តមកដល់ខេត្តមណ្ឌលគីរី នៅច្រកទ្វារឡាប៉ាខេ ។
សម្ដេចធិបតី ហ៊ុន ម៉ាណែត បានគូសបញ្ជាក់ថា កម្លាំងដែលអាចការពារបូរណភាពទឹកដី ជាពិសេស តាមបណ្តោយព្រំដែន ប្រកបដោយប្រសិទ្ធភាព និងចីរភាពយូរអង្វែងបំផុត គឺប្រជាជន មិនមែនកងកម្លាំងប្រដាប់អាវុធទេ ។
ហេតុដូច្នេះ ការកសាង អភិវឌ្ឍន៍សេដ្ឋកិច្ច និងសង្គម រួមទាំងការកសាងហេដ្ឋារចនាសម្ព័នតភ្ជាប់ ក៏ដូចជាការលើកកម្ពស់ជីវភាពរស់នៅរបស់ប្រជាពលរដ្ឋនៅតាមបណ្តោយព្រំដែនគឺជាការចាំបាច់ ៕
ដោយ ៖ វណ្ណលុក
