កំពត៖ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរង​កងយោធពលខេមរភូមិន្ទ និងជាមេបញ្ជាការកងរាជ​អាវុធហត្ថលើ​ផ្ទៃប្រទេសក្នុងសប្ដាហ៍នេះបានអញ្ជើញចូលរួមបញ្ចុះបឋមសីលាបើកការដ្ឋានសាងសង់បញ្ជាការដ្ឋានកងរាជអាវុធហត្ថខេត្តកំពត ។

ក្នុងឱកាសនេះឯកឧត្តមនាយឧត្តមសេនីយ៍ សៅ សុខា បានកោត​សរសើរដល់កងកម្លាំងអាវុធហត្ថខេត្តកំពតទាំងអស់ ដែលបាន​អនុវត្តភារកិច្ចតួនាទីបានល្អ ទទួលបានការជឿទុកចិត្តពីថ្នាក់​ដឹកនាំខេត្ត និងប្រជាពលរដ្ឋ។ ឯកឧត្តមបាន​បន្តថា អាវុធហត្ថ​បានធ្វើកំណែទម្រង់ដោយផ្អែកលើគោលការណ៍ចំនួន៤ ដើម្បី​បង្កើនគុណភាព នៃការប្រតិបត្តិតួនាទី និងភារកិច្ច​ឱ្យកាន់តែប្រសើរ។

នៅក្នុងឱកាសនោះដែរ ឯកឧត្តម ម៉ៅ ធនិន អភិបាលខេត្តកំពត ក៏បាន​កោតសរសើរចំពោះកិច្ចខិតខំ​ប្រឹង​ប្រែងរបស់​កងរាជអាវុធហត្ថ ក្នុងការថែរក្សាបាននូវសុវត្ថិភាព សន្តិសុខ សណ្តាប់ធ្នាប់ល្អ  និងផ្តល់​ជូននូវភាពកក់ក្តៅដល់ពលរដ្ឋ និងភ្ញៀវទេសចរ ដែលមកសម្រាក​លម្ហែខេត្តកំពត។ ឯកឧត្តមបានលើកទឹកចិត្តឱ្យកម្លាំងអាវុធហត្ថ បន្តកិច្ច​ការងាររបស់​ខ្លួនឱ្យកាន់តែប្រសើរថែមទៀត។

តាមរបាយការណ៍របស់លោកឧត្តមសេនីយ៍ត្រី ចាប សុទ្ធាវុឌ្ឍន៍ មេបញ្ជាការកងរាជអាវុធហត្ថខេត្តកំពតបានឱ្យដឹងថា សំណង់​បញ្ជាការដ្ឋានអាវុធខេត្តសាងសង់ឡើងតាមគំរូប្លង់ឯកភាពតែមួយក្នុងក្របខ័ណ្ឌទូទាំងប្រទេស ក្នុងនោះអគារសេនាធិការនេះមានទទឺង១២ម៉ែត្រ បណ្តោយ ៥៦ម៉ែត្រ កម្ពស់៣ជាន់ មានផ្ទៃក្រឡា ២០១៦ម៉ែត្រ​ការ៉េ  ត្រូវប្រើពេលសាងសង់ ១៥ខែ និងចំណាយចំនួន ២ ៦០០​លានរៀល ដោយមិនគិតបញ្ចូលគ្រឿងបំពាក់នៅឡើយ ៕
ដោយ៖ សិលា សារិន