កម្ពុជា-ថៃ រួមគ្នាជំរុញវិស័យទេសចរណ៍ និងពាណិជ្ជកម្ម
បន្ទាយមានជ័យ´៖ មន្រ្តីជាន់ខ្ពស់នៃរដ្ឋបាលខេត្តបន្ទាយមានជ័យ និងមន្រ្តីការទូតនៃប្រទេសថៃបានយល់ស្របគ្នាក្នុងការធ្វើសកម្មភាពនានាបម្រើឱ្យវិស័យទេសចរណ៍នៃប្រទេសទាំងពីរ ដែលមានព្រំដែនជាប់គ្នា។
បន្ទាយមានជ័យ ជាខេត្តភាគខាងលិចប្រទេស ដោយមានព្រំដែនជាប់នឹងប្រទេសថៃ ។ឆ្នាំ២០២៥ ក៏ជាខួប៧៥ឆ្នាំនៃចំណងការទូតរវាងប្រទេសទាំងពីរ។ នៅសាលាខេត្តកាលពីថ្ងៃទី១៧ ខែមីនា ឆ្នាំ២០២៥ ក្នុងសវនាការរួមរវាង ឯកឧត្តម អ៊ុ រាត្រី អភិបាលខេត្តបន្ទាយមានជ័យជាមួយ ឯកឧត្តម ទុល ត្រៃសូរ៉ាត់ ( Tull TRAISORAT ) ឯកអគ្គរាជទូតថៃប្រចាំកម្ពុជា វិស័យទេសចរណ៍និងពាណិជ្ជកម្មបានក្លាយជាប្រធានបទក្នុងកិច្ចសន្ទនា។
មន្រ្តីនៃប្រទេសទាំងពីរយល់ដូចគ្នាថា វិស័យទេសចរណ៍ជាវិស័យអាទិភាព ខណៈតួលេខមូលនៃលំហូរចរាចរជនជាតិថៃនិងភ្ញៀវអន្តរជាតិ ដែលបានឆ្លងចេញចូលប្រទេសថៃនិងកម្ពុជាតាមច្រកទ្វារព្រំដែនអន្តរជាតិរវាងប្រទេសទាំងពីរនាពេលកន្លងមកមានប្រមាណជាង២លាននាក់ ។មន្រ្តីជាន់ខ្ពស់ទាំងពីរបានអះអាងនូវការអនុវត្តគោលដៅរួម គឺជំរុញកំណើនភ្ញៀវពី៣លានទៅ៤លាននាក់សម្រាប់ពីពេលនេះ និងបន្តទៅមុខ។
ឯកឧត្ដម ទុល ត្រៃសូរ៉ាត់ បានបញ្ជាក់ពីទិសដៅរួមគ្នានេះ ពីព្រោះ វិស័យទេសចរណ៍ក៏ជាផ្នែកមួយយ៉ាងសំខាន់ក្នុងវិស័យពាណិជ្ជកម្មផងដែរ ។ជាប្រភពចំណូលដោយមិនប្រើទុនច្រើន។ចំណុចនេះឯកឧត្តម អ៊ុ រាត្រី អភិបាលខេត្តបន្ទាយមានជ័យបានគាំទ្រ និងបានបញ្ជាក់ថា វិស័យទេសចរណ៍ ជាឧស្សាហកម្មគ្មានផ្សែងហើយក៏ជាប្រភពចំណូលថវិកាជាតិយ៉ាងសំខាន់ទៀតផង។
ជាការកត់សម្គាល់ខេត្តបន្ទាយមានជ័យជាខេត្តមានតំបន់ទេសចរណ៍ច្រើនគួរសម ហើយក៏ជាខេត្តតភ្ជាប់ទៅកាន់តំបន់អង្គរខេត្តសៀមរាប ។
ខែមករា ឆ្នាំ២០២៥ កន្លងទៅច្រកអន្តរជាតិប៉ោយប៉ែត មានភ្ញៀវអន្តរជាតិចូលតាមច្រកនេះចំនួន១៨៣.៦៣៩នាក់ និងភ្ញៀវទេសចរចេញចំនួន១៨៦.២២១នាក់៕
ដោយ៖គៀន ច័ន្ទហ៊ីន
