កំពង់ចាម៖បន្ទាប់ពីដំណើរសាងសង់រួចរាល់នូវអគារមណ្ឌលសុខភាពពាមកោះស្នា ព្រមទាំងហេដ្ឋារចនាសម្ព័ន្ធសំខាន់​ៗសម្រាប់​បម្រើសេវាសុខាភិបាល ជូនប្រជាជនតាមដងទន្លេយ៉ាងហោចចំនួនបីឃុំ តម្លៃជាង១៤ម៉ឺនដុល្លារអាមេរិក​ បាន​ប្រារព្ធពិធី​សម្ពោធ​ជាផ្លូវការកាលពីព្រឹកថ្ងៃទី១៩ ខែមីនា ឆ្នាំ២០២៥ ក្រោមអធិបតីភាពឯកឧត្តមសន្តិបណ្ឌិត នេត សាវឿន ឧប​នាយក​រដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ចាម ។

អគារមណ្ឌលសុខភាពពាមកោះស្នា ស្ថិតក្នុងឃុំពាមកោះស្នា ស្រុកស្ទឹងត្រង់ ខេត្តកំពង់ចាម។មណ្ឌលសុខភាព​ពាម​កោះស្នា នឹង​ត្រូវបាន​ប្រើប្រាស់​ជាបង្អែកសម្រាប់ប្រជាពលរដ្ឋ៣ឃុំតាមដងទន្លេ ។ក្នុងនោះមាន ឃុំពាមកោះស្នា ព្រះអណ្តូង និង​ឃុំខ្ពបតាងួន ។

ជម្រាបជូនគណៈអធិបតី ,ឯកឧត្តម អ៊ុន ចាន់ដា អភិបាលខេត្តកំពង់ចាមបានមានប្រសាសន៍ថា នៅឆ្នាំ២០២៤ក្រោមការ​យកចិត្តទុកដាក់ពីលោកជំទាវ លាង វួចឆេង ហ៊ុនណង ដោយលោកជំទាវបានមើលឃើញពីការលំបាក​ក្នុងការផ្តល់សេវា ដោយអគារមណ្ឌលសុខភាព គ្មានបន្ទប់គ្រប់គ្រាន់ សម្រាប់ផ្តល់សេវាសុខាភិបាលជូនប្រជាជន ។ដោយមានបំណងចង់​ពង្រីកសេវាឱ្យបានច្រើនបន្ថែមទៀតដើម្បីជាបង្អែកសម្រាប់ប្រជាជននៃបីឃុំ តាមមាត់ទន្លេ មាន ៖ឃុំពាមកោះស្នា ព្រះអណ្តូង និងឃុំខ្ពបតាងួន ទើបលោកជំទាវ លាង វួចឆេង ហ៊ុនណង បានសម្រេចចិត្តសាងសង់អគារថ្មីមួយខ្នង ,ទទឹង ១៣ម៉ែត្រ បណ្តោយ ១៩ម៉ែត្រ មាន ៨បន្ទប់ មានវេរ៉ង់ដាខាងមុខ សម្រាប់រថយន្តគិលានសង្គ្រោះដឹកអ្នកជំងឺឡើង-ចុះ ព្រមទាំង។បានចាក់សាប ទំហំ ២,៦០ម៉ែត្រគុណ ៤,១០ម៉ែត្រ សម្រាប់ដាក់ខ្យុសធ្វើពីដែកប្រក់ក្បឿង ចំនួនមួយខ្នង, ឃ្លាំងដាក់សម្ភារៈមួយខ្នងទំហំ ៣,៦០ម៉ែត្រ គុណ៤ម៉ែត្រ, រោងដាក់ឡានមួយខ្នងទំហំ៥ម៉ែត្រ គុណ៨,២០ម៉ែត្រ, ធ្វើ​របងព័ទ្ធជុំវិញមានខ្លោងទ្វារ បំពាក់ស្លាកមណ្ឌលសុខភាព។សរុបចំណាយថវិកា ១៤៥.៦៧៨,៨៩ដុល្លារអាមេរិក ។

តាមរយៈសមិទ្ធផលនេះឯកឧត្តមអភិបាលខេត្តបានណែនាំដល់មន្ទីរសុខាភិបាលខេត្តឱ្យពង្រឹងគុណភាពសេវា​វេជ្ជសាស្ត្រ​អមនិងការធ្វើរោគវិនិច្ឆ័យ និងពង្រីកសេវាបន្ថែម តាមរយៈការរៀបចំបន្ថែមបុគ្គលិកឱ្យបានចំនួន១២នាក់ព្រមទាំង មានវេជ្ជបណ្ឌិតមួយនាក់ប្រចាំការនៅមណ្ឌលសុខភាពនេះផង។

ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី បានចាត់ទុកថា ការសាងសង់​មណ្ឌល​សុខភាពនៅទីនេះ គឺជា​គំរូមួយជាវីរភាពមួយ រួមចំណែកជាមួយរាជរដ្ឋាភិបាល ក្នុងការជួយពង្រឹងវិស័យសុខាភិបាល និងវិស័យសុខុមាលភាព ពីព្រោះវិស័យនេះ គឺជាវិស័យអាទិភាព នៅក្នុងកម្មវិធីនយោបាយយុទ្ធសាស្ត្របញ្ចកោណ ដីណាក់កាលទីមួយ របស់រាជរដ្ឋាភិបាលនីតិកាលទី៧នៃរដ្ឋសភា។

ឆ្លៀតក្នុងឱកាសនោះដែរ ឯកឧត្តមសន្តិបណ្ឌិត នេត សាវឿន និងប្រតិភូអមដំណើរ បានអញ្ជើញបញ្ជាគ្រឿងចក្រ​បើកការ​ដ្ឋានសាងសង់សំណង់ទ្វារទឹកព្រែកតាយី ស្ថិតក្នុងឃុំពាមកោះស្នា ស្រុកស្ទឹងត្រង់ ខេត្តកំពង់ចាម ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានឱ្យដឹងថា សំណង់ទ្វារទឹកព្រែកតាយីនេះ គឺជាសមិទ្ធផលប្រវត្តិ សាស្ត្រថ្មី ១ទៀត នៅលើទឹកដីឃុំពាមកោះស្នា ដែលជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។ សំណង់នេះ មានលទ្ធភាពស្តុកទឹកប្រមាណ ៤៥០.០០០ម៉ែត្រគីប ដែលមានប្រជាពលរដ្ឋ អ្នកទទួលផលចំនួន ៤ភូមិ គឺ ៖ ភូមិពាមក្នុង ដីលើ ពាមក្រៅ និងភូមិទួលរការ នៃឃុំពាមកោះស្នា ស្មើនឹង ១.៦៤៥គ្រួសារ និងមានលទ្ធភាពស្រោចស្រពបន្ថែមលើផ្ទៃដីបង្កបង្កើនផលដំណាំស្រូវប្រាំងចំនួន ៤២២ហិកតា និងដំណាំរួមផ្សំចំនួន ១២ហិកតា ៕