(ភ្នំពេញ)៖ ប្រាក់រង្វាន់លើកទឹកចិត្តរបស់រាជរដ្ឋាភិបាលកម្ពុជា ស្នើនិងទឹកប្រាក់ដុល្លារអាមរិកចំនួនជាង១លាន២សែនដុល្លារអាមេរិក នារសៀលថ្ងៃទី១៩ ខែមីនា ឆ្នាំ២០២៥ ត្រូវបានផ្តល់​ជូនម្ចាស់ជ័យលាភី ដែលដណ្តើមបានមេដាយមាស ប្រាក់ សំរិទ្ធ ពីការប្រកួតកីឡាសាកលវិទ្យាល័យអាស៊ីអាគ្នេយ៍ លើក​២១ កីឡាសិស្សមធ្យមអាស៊ីអាគ្នេយ៍លើកទី១៣ ជើង​ឯក​កម្រិតពិភពលោក កម្រិតអាស៊ី និងកម្រិតអាស៊ីអាគ្នេយ៍ ។

ពិធីប្រគល់ទទួលនេះ បានប្រារពធ្វើឡើង នៅមជ្ឈបណ្ឌល​ជាតិ​ហ្វឹក​ហ្វឺនកីឡា ក្រោមអធិបតីភាព ឯកឧត្តម បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួង អប់រំ យុវជន និងកីឡា។

ឯកឧត្តម ប៉ុន សុខ អគ្គនាយក នៃអគ្គនាយកដ្ឋានកីឡា បាន​ថ្លែងបញ្ជាក់ថា ប្រភេទកីឡា ដែលដណ្តើមបាន​មេដាយ​មាន​ចំនួន ១១ប្រភេទ រួមមាន៖ កីឡាប៉េតង់ ការ៉ាតេ ចំបាប់ កាយ​សម្ព័ន្ធ កីឡាហែលទឹកពាក់ជើងទា កាយវប្បកម្ម យុទ្ធគុនចម្រុះ វ៉ូវីណាម ជីជីតស៊ូ តេក្វាន់ដូWT និងយូដូ។ ក្នុងនោះ​មាន​កីឡាករ​កីឡាការិនីសរុបចំនួន ១៦៣នាក់ កីឡាករ៩៦នាក់ និង​កីឡា​ការិនី ៦៧នាក់ និងគ្រូបង្វឹក សរុប ៥៣នាក់ .គ្រូបង្វឹកធំចំនួន ២៥ នាក់ និងគ្រូជំនួយ ២៨នាក់ ដោយសរុបរួមទាំងកីឡាករ កីឡាការិនី គ្រូបង្វឹក និង គ្រូជំនួយ សរុបរួម ២១៦នាក់។ ចំពោះថវិការាជរដ្ឋាភិបាលដែលត្រូវបានផ្តល់ជូនម្ចាស់ជ័យលាភីជាការលើកទឹកចិត្តសរុបជាទឹកប្រាក់ចំនួន ៤,៩៨៤,៩០០,០០០ រៀលគត់ បើគិតជាដុលារសរុប ១,២៤៦,២២៥ ដុល្លារអាមេរិក។

ឯកឧត្តម បណ្ឌិតសភាចារ្យ ហង់ជួន ណារ៉ុន តំណាងឱ្យ​រាជរដ្ឋាភិ​បាលកម្ពុជា បានសម្តែងនូវការវាយតម្លៃខ្ពស់ និង​ថ្លែងអំណរគុណដល់កីឡាករកីឡាការិនី និងគ្រូបង្វឹកទាំង​អស់ដែលបានប្រឹងប្រែងអស់កម្លាំងចិត្តប្រកួតដណ្តើមបានមេដាយជូនកម្ពុជាពីការប្រកួតកម្រិតអន្តរជាតិ។

ឯកឧត្តម បានរំលេចបន្ថែមទៀតថា ការផ្តល់ការលើកទឹកចិត្ត​របស់​សម្តេចតេជោកន្លងមកនេះ គឺបានជួយទៅដល់ការ​លើក​ទឹកចិត្តឱ្យកីឡាករកីឡាការិនីរបស់យើងខិតខំប្រឹងប្រែង ក្នុង​នោះក្រសួងអប់រំយុវជននិងកីឡាក៏បានដាក់ចេញនូវវិធានការកំណែទម្រង់កែលម្អរចនាសម្ព័ន្ធ និងផ្តល់ប្រាក់ឧបត្ថម្ភជូនដល់​សហព័ន្ធកីឡាជាតិ ពិសេស ផ្តល់ឱកាសឱ្យកីឡាករកីឡាការិនី​បានចេញទៅប្រកួតអន្តរជាតិទាំងក្នុងស្រុកនិងក្រៅស្រុក អ៊ីចឹង​ហើយទើបធ្វើឱ្យអត្តពលិកយើងមានសមត្ថភាពដណ្តើមបានមេដាយច្រើន ដែលចំនួនមេដាយទទួលបាននេះ លើសថវិកា​ដែលក្រសួងអប់រំយុវជននិងកីឡាមាន ទើបតម្រូវស្នើសុំបន្ថែម​ពីក្រសួងសេដ្ឋកិច្ចនិងហិរញ្ញវត្ថុ ហើយ ថវិកាយូបន្តិចតែគ្រប់​ភាគីពាក់ព័ន្ធប្រឹងប្រែងពន្លឿនដើម្បីផ្តល់ជូនម្ចាស់ជ័យលាភី។

ឯកឧត្តម បានបញ្ជាក់ទៀតថា ប្រាក់រង្វាន់តែត្រូវបានផ្តល់​ជូន​ម្ចាស់ជ័យលាភីទាំងអស់គឺការផ្តល់ជូនដោយមានតម្លាភាព ដោយផ្តល់តាមគណនេយ្យម្ចាស់ជ័យលាភីដោយផ្ទាល់លើកលែងតែអ្នកដែលគ្មានគណនេយ្យឬបើកមិនទាន់។ ឯកឧត្តម ឧបនាយករដ្ឋមន្រ្តី រដ្ឋមន្រ្តីក្រសួងអប់រំយុវជននិងកីឡា បានជំរុញឱ្យកីឡាករកីឡាការិនីដែលទទួលបានជ័យលាភីសូមប្រឹងប្រែហ្វឹកហាត់ដុះខាតសមត្ថភាពត្រៀមការប្រកួតអន្តរជាតិនានា ពិសេស គឺស៊ីហ្គេម លើកទី៣៣ នៅប្រទេសថៃ ក្នុង​ឆ្នាំ២០២៥ ។ ជាមួយគ្នានោះ ឯកឧត្តម ក៏បានផ្តល់អនុសាសន៍​បន្ថែមដល់ថ្នាក់ដឹកនាំសហព័ន្ធកីឡាជាតិត្រូវសម្លឹងមើល និង​រៀបចំផែនការឱ្យបានល្អចំពោះអត្តពលិកថ្នាល ត្រូវស្វែង​រក​ធនធានថ្នាលមានសក្កានុពលយកមកហ្វឹកហាត់បំប៉នត្រៀមកីឡាអូឡាំពិកយុវជនអាស៊ីលើកទី៤ ឆ្នាំ២០២៩ ដែលកម្ពុជា ទទួលធ្វើជាម្ចាស់ផ្ទះ។

សូមបញ្ជាក់ដែរថា ១១ប្រភេទកីឡានេះ ដណ្តើមបានមេដាយ គិត​ចាប់ពីឆ្នាំ២០២៣និង២០២៤ ពីការប្រកួតកីឡាសាកល​វិទ្យាល័យអាស៊ីអាគ្នេយ៍ លើកទី២១ កីឡាសិស្សមធ្យមអាស៊ី​អាគ្នេយ៍លើកទី១៣ ជើងឯកកម្រិតពិភពលោក កម្រិតអាស៊ី និងកម្រិតអាស៊ីអាគ្នេយ៍ ។ មេដាយសរុបដែលដណ្តើមមាន​ចំនួន ១៦០គ្រឿង មេដាយមាស៣១គ្រឿង ប្រាក់៤៩គ្រឿង និងមេដាយសំរិទ្ធ៨០គ្រឿង សរុបជាទឹកប្រាក់ចំនួន ៤,៩៨៤,៩០០,០០០ រៀលគត់ បើគិតជាដុលារសរុប ១,២៤៦,២២៥ ដុល្លារអាមេរិក៕

រូបភាព ៖ ជីម ភារ៉ា
អត្ថបទ ៖ ជាវ ចន្ធូ