ប៉ារីស ៖ ប្រទេសបារាំងមានផែនការធ្វើទំនើបកម្មមូលដ្ឋានទ័ពអាកាសដ៏សំខាន់មួយនៅជាប់ព្រំដែនជាមួយប្រទេសអាល្លឺម៉ង់ ក្នុងគោលបំណងធ្វើជាម្ចាស់ផ្ទះយន្តហោះចម្បាំង Rafale ដែលបំពាក់មីស៊ីលនុយក្លេអ៊ែរ។

មូលដ្ឋានទ័ពអាកាស Luxeuil-Saint-Sauveur នៅភាគខាងកើតប្រទេសបារាំង បានក្លាយជាឃ្លាំងស្តុកទុកអាវុធនុយក្លេអ៊ែរចាប់តាំងឆ្នាំ ២០១១មក ពោលគឺនៅពេលដែលយន្តហោះចម្បាំងនៅទីនោះ បានដកចេញទៅកាន់ទីតាំងផ្សេងទៀត។

ប្រធានាធិបតីបារាំង លោក Emmanuel Macron បាននិយាយនៅថ្ងៃអង្គារថា មូលដ្ឋានទ័ពអាកាស Luxeuil នឹងទទួលបាននូវការធ្វើទំនើបកម្មតាមរបៀបដែលមិនធ្លាប់មានពីមុនមក ដើម្បីដើរតួនាទីពេញលេញរបស់វាឡើងវិញ នៅក្នុងការរារាំងអាវុធនុយក្លេអ៊ែររបស់ប្រទេសបារាំង។

លោកប្រធានាធិបតី Macron បានប្រកាសថា នៅឆ្នាំ ២០៣៥ មូលដ្ឋាន Luxeuil នឹងក្លាយជាមូលដ្ឋានដំបូងគេ ដែលធ្វើជាម្ចាស់ផ្ទះយន្តហោះចម្បាំង Rafale ជំនាន់ចុងក្រោយ និងមីស៊ីលនុយក្លេអ៊ែរលឿនជាងសំឡេងរបស់វា។ មិនត្រឹមតែប៉ុណ្ណោះ មូលដ្ឋាននេះក៏នឹងបង្កើនចំនួនបុគ្គលិកយោធា និងស៊ីវិលទ្វេដងដល់ជិត ២.០០០នាក់។

បើតាមសេចក្តីរាយការណ៍ពីសារព័ត៌មាន RT រដ្ឋាភិបាលបារាំងគ្រោងនឹងចំណាយប្រាក់ ១.៦៤ ពាន់លានដុល្លារ ដើម្បីធ្វើទំនើបកម្មមូលដ្ឋាន និងបង្កើនល្បឿនការបញ្ជាទិញយន្តហោះចម្បាំង Rafale។

លោកប្រធានាធិបតី Macron បានគូសបញ្ជាក់ថា ប្រទេសបារាំងបានរកឃើញខ្លួនឯងនៅក្នុង “ពិភពលោកដ៏គ្រោះថ្នាក់ និង មិនប្រាកដប្រជា” ចាប់តាំងពីអរិភាពបានផ្ទុះឡើងរវាងរុស្ស៊ី និង អ៊ុយក្រែន កាលពីឆ្នាំ ២០២២។ ការប្រកាសរបស់មេដឹកនាំបារាំងរូបនេះ ធ្វើឡើងបន្ទាប់ពីអធិការបតីអាល្លឺម៉ង់ លោក Friedrich Merz បានស្នើថា បារាំងអាចពង្រីកឃ្លាំងអាវុធនុយក្លេអ៊ែររបស់ខ្លួន ដើម្បីការពារអាល្លឺម៉ង់ និងសមាជិកសហភាពអឺរ៉ុបផ្សេងទៀត។

ប្រទេសរុស្ស៊ីបានថ្កោលទោសកម្មវិធី “យោធា” របស់សហភាពអឺរ៉ុបថា ជាការមិនប្រុងប្រយ័ត្ន និងកើនឡើងភាពតានតឹង។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកកាសែតនៅដើមខែនេះថា វោហាសាស្ត្រ និងផែនការប្រឈមមុខដាក់គ្នា ដែលឥឡូវនេះកំពុងលេចឡើងនៅទីក្រុងប្រ៊ុចសែល និងក្នុងរដ្ឋធានីអឺរ៉ុបផ្សេងទៀត អាចនឹងរារាំងដល់ការស្វែងរកដំណោះស្រាយដោយសន្តិវិធីក្នុងសង្គ្រាមអ៊ុយក្រែន៕

ប្រភព ៖ RT ប្រែសម្រួល ៖ ឈឹម ទីណា