ប្រកួតកីឡាសិស្សមធ្យមសិក្សា ជើងឯករាជធានីភ្នំពេញ ឆ្នាំសិក្សា ២០២៤-២០២៥ បិទបញ្ចប់ដោយជោគជ័យ
(ភ្នំពេញ)៖ ការប្រកួតការប្រកួតកីឡាសិស្សមធ្យមសិក្សា ជើងឯករាជធានីភ្នំពេញ ឆ្នាំសិក្សា២០២៤-២០២៥ ដែលដំណើរការប្រកួតលើ៧ប្រភេទកីឡារយៈពេល៩ថ្ងៃ ដោយគិតចាប់តាំងពីថ្ងៃទី១១ ខែមីនា ឆ្នាំ២០២៥មក បានបិទបញ្ចប់ដោយជោគជ័យ ។
លោក ស្រេង សេង ប្រធានការិយាល័យកីឡា រាជធានីភ្នំពេញ បានឱ្យដឹងថា ៧ប្រភេទកីឡាដែលចូលរួមប្រកួតរួមមាន៖ ប្រភេទកីឡាបាល់ទាត់ ២៩ ក្រុម ក្នុងនោះ យុវនារី ០២ ក្រុម .ប្រភេទកីឡាបាល់ទះ ២៨ ក្រុម ក្នុងនោះ យុវនារី ១0 ក្រុម.ប្រភេទកីឡាបាល់បោះ ២៩ ក្រុម ក្នុងនោះ យុវនារី ១០ ក្រុម.ប្រភាទកីឡាអត្តពលកម្ម ៣៤ ក្រុម យុវជន យុវនារី.ប្រភេទកីឡាប៉េតង់ ១០ ក្រុម ០៥ ក្រុម យុវនារី.ប្រភេទកីឡាវាយកូនឃ្លី ៨ ក្រុម យុវជន.ប្រភេទកីឡាវាយសី ៨ ក្រុម ០២ ក្រុម យុវនារី . ដែលមានប្រិភូដឹកនាំ គ្រូបង្វឹក កីឡាករ កីឡាការិនី សរុបចំនួន ២១០១ នាក់ នារី ៤៩៨ នាក់ ។
លោក អ៊ុក ចន្ថា អនុប្រធានមន្ទីរអប់រំ យុវជន និងកីឡា រាជធានីភ្នំពេញ បានចាត់ទុកសកម្មភាពចូលរួមរបស់ថ្នាក់ដឹកនាំដែលបានបញ្ជូនក្រុមចូលរួមក្នុងការប្រកួតកីឡាសិស្សមធ្យមសិក្សា ជើងឯករាជធានីភ្នំពេញ ឆ្នាំសិក្សា ២០២៤-២០២៥នេះ ជាកាយវិការ និងការយកចិត្តទុកដាក់ ពិថ្នាក់ដឹកនាំអង្គភាព ចូលរួមក្នុងការកសាងធនធានមនុស្ស និងអភិវឌ្ឍ វិស័យកីឡានៅរាជធានីភ្នំពេញ និងជំរុញដល់ យុវជន យុវនារី ឱ្យចូលរួមហាត់ និងលេងកីឡាទៅតាមប្រភេទ ដែលពួកគេចូលចិត្ត និងចូលរួមកាត់បន្ថោយនូវអំពើរឧបាយមុខ ដែលបង្ករឡើងនៅក្នុងសង្គម ។
មួយវិញទៀត ការ ហាត់ និងលេងកីឡា ជាកត្តាចាំបាចដែលនាំមកនូវ ការស្គាល់ យល់គ្នា និងស្រលាញ់ចូលចិត្តគ្នា ទៅវិញទៅមក ធ្វើ ឱ្យសង្គមជាតិយើង មានការឯកភាព និងសាមគ្គីភាព ដ៏រឹងមាំក្នុងការកសាង និងការពារជាតិយើងចាប់ពីយុវជនត ទៅ។ ហើយដើម្បីចូលរួមអភិវឌ្ឍវិស័យកីឡា ស្របតាមមុំមួយនៃយុទ្ធសាស្ត្របញ្ចកោណរបស់រាជរដ្ឋាភិបាល ដែលកំពុងឈានឆ្ពោះទៅរកកម្រិតមួយ ឱ្យស្របនិងការវិវត្តន៍និងរីកចម្រើនរបស់ប្រទេសជាតិ ។
ទន្ទឹមគ្នានេះដែរ កម្ពុជាកំពុងត្រៀមខ្លួនជាស្រេច ក្នុងការបណ្តុះបណ្តាលថ្នាល ដើម្បីសម្រិតសំរាំង កីឡាករ កីឡាការិនី ត្រៀមចូល រួម ក្នុងការធ្វើជាម្ចាស់ផ្ទះកីឡាយុវជនអាស៊ី ឆ្នាំ២០២៩ នាពេលខាងមុខ ។
ក្នុងនាមមន្ទីរអប់រំយុវជននិងកីឡាធានីភ្នំពេញ លោកបានអំពាវនាវដល់ឯកឧត្តម លោកជំទាវ លោក លោកស្រី ទាំងអស់ មេត្តាចូលរួមបង្ការ ជំងឺឆ្លងផ្សេងៗ មិនត្រូវធ្វេសប្រហែស ផងដែរ គឺយើង ត្រូវលាងសម្អាតដៃ ជាប្រចាំ ពាក់ម៉ាសក្នុងករណីមានផ្សែងធូលី ឲ្យបានខ្ជាប់ខ្ជួន ។ ទន្ទឹមនេះដែរ យើងក៏ត្រូវចូលរួមគ្រប់សកម្មភាព របស់រដ្ឋបាលរាជធានីភ្នំពេញ ដើម្បីរួមចំណែកអភិវឌ្ឍន៍ រាជធានីភ្នំពេញ ឲ្យកាន់តែមានសោភ័ណភាព និង រីកចម្រើនឡើងសម្រាប់កិត្តិនាមប្រទេសយើង ។
ក្នុងឱកាសនេះដែរលោក អ៊ុក ចន្ថា សូមណូមពរឲ្យកីឡាករ កីឡាការិនី ដែលទទួលបានជ័យលាភីនាពេលនេះទាំងអស់ត្រូវ យកចិត្តទុកដាក់បន្តបង្កើនសមត្ថភាព ដោយត្រូវបន្តហ្វឹកហាត់ ដើម្បីត្រៀមចូលរួមប្រកួតថ្នាក់ជាតិ និងកម្មវិធី ផ្សេងៗ របស់សហព័ន្ធកីឡាជាតិ នាពេលខាងមុខ ក្នុងការអភិវឌ្ឍន៍វិស័យកីឡាយើង ឱ្យរីកចម្រើន៕
រូបភាព ៖ ជីម ភារ៉ា
អត្ថបទ ៖ ជាវ ចន្ធូ
