ហ៊្សេរុយសាឡឹម ៖ រដ្ឋបាលនាយករដ្ឋមន្រ្តីអ៊ីស្រាអែល លោក Benjamin Netanyahu កាលពីថ្ងៃពុធ បានប្រកាសចាប់ផ្តើមប្រតិបត្តិការយោធាជើងគោកនៅតំបន់ហ្គាហ្សាជាលើកដំបូង មួយថ្ងៃបន្ទាប់ពីយោធាអ៊ីស្រាអែលបានទម្លាក់គ្រាប់បែកផ្តាច់ជីវិតមនុស្សជាង ៤០០នាក់នៅហ្គាហ្សា ក្រោយបទឈប់បាញ់ពីរខែដ៏ផុយស្រួយជាមួយក្រុមហាម៉ាសដួលរលំ។

កងកម្លាំងការពារអ៊ីស្រាអែល (IDF) និយាយថា កងទ័ពពួកគេបានចាប់ផ្តើមប្រតិបត្តិការយោធាថ្មើរជើង ឬជើងគោកទ្រង់ទ្រាយធំសាជាថ្មីទៀតនៅភាគកណ្តាល និងភាគខាងត្បូងនៃតំបន់ហ្គាហ្សាស្ទ្រីប ក្នុងគោលបំណងពង្រីកតំបន់សន្តិសុខ ដោយកងទ័ពបានសម្រុកចូលច្រករបៀង Netzarim ដែលជាតំបន់ពុះចែកភាគខាងជើង និងខាងត្បូងជ្រោយហ្គាហ្សា។

ជាមួយគ្នានេះ រដ្ឋមន្ត្រីការពារជាតិអ៊ីស្រាអែល លោក Israel Katz បានចេញការព្រមានចុងក្រោយទៅក្រុមហាម៉ាស ដោយតម្រូវឲ្យពួកគេដោះលែងចំណាប់ខ្មាំងនៅសេសសល់ជាបន្ទាន់។ អ៊ីស្រាអែលនិយាយថា ក្រុមហាម៉ាសនៅមានចាប់ចំណាប់ខ្មាំងចំនួន ៥៩នាក់ទៀតនៅក្នុងដៃ ហើយនោះក្នុងមាន២៤នាក់ត្រូវគេជឿថា នៅមានជីវិតនៅឡើយ។

បើតាមសេចក្តីរាយការណ៍របស់កាសែត The Guardian នាយករដ្ឋមន្ត្រីអ៊ីស្រាអែល លោក Benjamin Netanyahu បាននិយាយថា ការវាយលុកថ្មីៗនឹងនៅតែបន្តរហូតយកឈ្នះទាំងស្រុងលើក្រុមហាម៉ាស ហើយចំណាប់ខ្មាំង ៥៩នាក់ទៀតត្រូវបានដោះលែង។

បូករួមទាំងតួលេខអ្នកស្លាប់ចុងក្រោយ ធ្វើឲ្យចំនួនមនុស្សបាត់បង់ជីវិតនៅតំបន់ហ្គាហ្សា ដោយសារសង្គ្រាមរវាងអ៊ីស្រាអែល និងក្រុមហាម៉ាស់ ចាប់តាំងពីថ្ងៃទី៧ ខែតុលា ឆ្នាំ២០២៣មក កើនឡើងដល់ ៤៩.៥៤៧នាក់ ខណៈ ១១២.៦០៣នាក់ទៀតរងរបួស និង ១.៩លាននាក់រត់ភៀសខ្លួន៕

ប្រភព ៖ CNN និង The Guardian ប្រែសម្រួល ៖ ឈឹម ទីណា