ខេត្តបាត់ដំបង គ្រោងនឹងបញ្ចប់ការវាស់វែងដីធ្លីធ្វើប្លង់កម្មសិទ្ធនៅត្រឹមខែកក្កដាខាងមុខ
បាត់ដំបង៖មន្រ្តីជំនាញនៃរដ្ឋបាលខេត្តបាត់ដំបង បានអះអាងថា គិតចាប់ផ្តើមពីថ្ងៃទី១ ខែមករាឆ្នាំ២០២៤ រហូតមកដល់ ថ្ងៃទី១៧ ខែមីនា ឆ្នាំ២០២៥ ក្បាលដីដែលត្រូវវាស់វែងបង្ហើយមានចំនួនជាង ៧ម៉ឺនក្បាលដី ដែលគ្រោងនឹងបញ្ចប់ការវាស់វែងនៅត្រឹមខែកក្កដាខាងមុខ។
ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុជូនដល់ប្រជាពលរដ្ឋរស់នៅក្នុងភូមិបឹងបី និង ភូមិព្រែកអាំ ក្នុងឃុំរបស់មង្គល ស្រុកមោងឫស្សី ខេត្តបាត់ដំបងកាលពីព្រឹកថ្ងៃទី១៩ ខែមីនា ឆ្នាំ២០២៥ក្រោមវត្តមានឯកឧត្តម សុខ លូ អភិបាលខេត្តបាត់ដំបង ,លោក សួន សុភា ប្រធានមន្ទីររៀបចំដែនដី នគរូបនីយកម្ម សំណង់ និង សុរិយោដីខេត្តបានជម្រាបឯកឧត្តមអភិបាលខេត្តថា ការងារចុះបញ្ជីដីធ្លីក្នុងខេត្តបាត់ដំបងបានរៀបចំជាក្រុមចុះបញ្ជីចំនួន១១ក្រុម និងមានកម្លាំងសរុបចំនួន២២០នាក់។លោកបន្តថា ការអនុវត្តការងារចុះបញ្ជីបង្ហើយក្បាលដីបានអនុវត្តចាប់ផ្តើមពីថ្ងៃទី១ ខែមករា ឆ្នាំ២០២៤ រហូតមកដល់ថ្ងៃទី១៧ ខែមីនា ឆ្នាំ២០២៥ សម្រេចបានការវាស់វែងចំនួន ១៨៧ ៧១៤ក្បាលដី។ក្បាលដីដែលត្រូវវាស់វែងបង្ហើយមានចំនួន ៧៩ ៣៣៧ក្បាលដីទៀត ដែលគ្រោងនឹងបញ្ចប់ការវាស់វែងនៅត្រឹមខែកក្កដាឆ្នាំ២០២៥ខាងមុខ ។
ក្នុងឱកាសនេះដែរ ឯកឧត្តម សុខ លូ អភិបាលខេត្តបាត់ដំបង បានលើកឡើងថា ក្រោមការដឹកនាំប្រកបដោយចក្ខុវិស័យរបស់សម្ដេចធិបតី ហ៊ុន ម៉ាណែត នាយករដ្ឋមន្រ្តីបានផ្ដោតនូវការយកចិត្តទុកដាក់ខ្ពស់ទៅលើការវាស់វែងនិងការចេញប្លង់កម្មសិទ្ធិដីធ្លីជូនប្រជាពលរដ្ឋឱ្យបានឆាប់រួចរាល់ ដើម្បីឈានទៅបញ្ចប់នូវទំនាស់ដីធ្លី។
ឯកឧត្តមអភិបាលខេត្តបាត់ដំបង ក៏បានអំពាវនាវដល់ប្រជាពលរដ្ឋដែលគ្មានដីពិតប្រាកដសូមទៅដាក់ពាក្យស្នើសុំដីសម្បទាន ពីរាជរដ្ឋាភិបាលតាមរយៈគោលនយោបាយកម្មវិធីផ្តល់ដីការពារព្រៃ ដើម្បីរួមគ្នាអភិវឌ្ឍដោយចីរភាព និងត្រូវចៀសវាងការចូលទន្រ្ទានកាន់កាប់ដីព្រៃ និងការរំលោភលើដីចំណីផ្លូវជាដើម៕
អត្ថបទ-រូបភាព៖ អ៊ុក សំអាន បប.
