សមរាត្រីថ្ងៃទី២ នៅខេត្តសៀមរាប ទាក់ទាញអ្នកទស្សនាជាងបីម៉ឺននាក់,ខណៈថ្ងៃទី១ ជាងពីរម៉ឺននាក់
ភ្នំពេញ៖នាព្រឹកថ្ងៃទី២២ ខែមីនា ឆ្នាំ២០២៥នេះ ដែលជាថ្ងៃទីពីរនៃព្រឹត្តិការណ៍សមរាត្រី ឬ ព្រះអាទិត្យរះចំកណ្ដាលកំពូលប្រាសាទ ទាក់ទាញភ្ញៀវជាតិ អន្តរជាតិទៅទស្សនាតាំងពីព្រឹកព្រលឹមចំនួនជាង៣៧ ០០០នាក់ ខណៈថ្ងៃទី១ កាលពីថ្ងៃទី២១ ខែមីនា មានអ្នកទស្សនាជាងពីរម៉ឺននាក់ ។
សូមជម្រាបថា ព្រឹត្តិការណ៍សមរាត្រី នៅប្រាសាទអង្គរវត្តនឹងកើតទៅរយៈពេលបីថ្ងៃចាប់ពីថ្ងៃទី២១ដល់ទី២៣ ខែមីនា ឆ្នាំ២០២៥ នាប្រាសាទអង្គរវត្ត។គឺជាព្រឹត្តិការណ៍ដ៏អស្ចារ្យសម្រាប់មនុស្សជាតិ។
នៅថ្ងៃទី២២ ខែមីនា ដែលជាថ្ងៃទី២នៃព្រឹត្តិការណ៍សមរាត្រីទាក់ទាញអ្នកទៅទស្សនាតាំងពីព្រឹកព្រលឹមចំនួនជាង៣៧ ០០៣នាក់ ។ក្នុងនោះភ្ញៀវជាតិចំនួន ៣៣ ៥០០ នាក់ និងទេសចរបរទេស ចំនួន៣ ៥០៣ នាក់។ដោយឡែកសម្រាប់ថ្ងៃទី១ នៃព្រឹត្តិការណ៍សមរាត្រី ឬព្រះអាទិត្យរះចំកំពូលប្រាសាទអង្គរវត្ដនាព្រឹកថ្ងៃទី២១ ខែមីនា បានទាក់ទាញអ្នកទេសចរចម្រុះជាតិសាសន៍ទៅទស្សនាប្រមាណជាង ២ម៉ឺននាក់ ក្នុងនេះភ្ញៀវទេសចរបរទេសជិត ៤ ០០០នាក់។
សូមជម្រាបថា សមរាត្រីប្រាសាទអង្គរវត្ត (Equinox Angkor) ជាបាតុភូតព្រះអាទិត្យរះចំកំពូលកណ្តាលនៃប្រាសាទអង្គរ។ព្រឹត្ដិការណ៍នេះ កើតឡើងចំនួន២ដង ជារៀងរាល់ឆ្នាំ គឺសមរាត្រីរដូវប្រាំង កើតឡើងនៅថ្ងៃទី២១ ខែមីនា និងសមរាត្រីរដូវវស្សា កើតឡើងនៅថ្ងៃទី២២ ខែកញ្ញា។
អង្គរវត្ត គឺជាអច្ឆរិយវត្ថុដ៏ពិសិដ្ឋ មានរចនាប័ទ្មល្អឥតខ្ចោះ បង្កប់នូវឃ្លាំងពុទ្ធិ អាថ៌កំបាំងនៃគតិបណ្ឌិតដែលមិនចេះរីកស្ងួត ក្បួនច្បាប់វិទ្យាសាស្ត្រ តារាសាស្ត្រ ទស្សនវិជ្ជាខ្មែរ និងការត្រាស់ដឹង ចាក់ធ្លុះជ្រួតជ្រាបច្បាស់អំពីជម្រៅនៃច្បាប់ធម្មជាតិ និងទំនាក់ទំនងនៃដំណើរគោរចនៃប្រព័ន្ធផែនដីនិងចក្រវាឡ ដែលមានខ្លឹមសារនិងទស្សនៈអប់រំយ៉ាងជ្រាលជ្រៅមហិមា៕
ដោយ៖មុនី
រូបភាព៖មន្ទីរព័ត៌មានខេត្តសៀមរាប
