ភ្នំពេញ៖ បុណ្យទន្លេលើកទី៩ឆ្នាំ២០២៥ បានប្រារព្ធនៅមាត់បឹងតាកែវ ក្រុងដូនកែវ ខេត្តតាកែវ ក្រោមប្រធានបទ “គុណតម្លៃ នៃទន្លេ៖ ផ្សារភ្ជាប់​វប្បធម៌ និងទេសចរណ៍ធម្មជាតិ”។ពិធីប្រចាំឆ្នាំនេះបានប្រារព្ធរយៈពេលបីថ្ងៃ​ចាប់ពី​ថ្ងៃទី២១ ដល់ថ្ងៃទី ២៣ ខែមីនា ឆ្នាំ២០២៥ ។ការរៀបចំបុណ្យទន្លេ គឺដើម្បី​លើកកម្ពស់តម្លៃនៃផលិតផលក្នុងស្រុក ជំរុញសេវាកម្ម​ទេសចរណ៍ និងផ្សព្វផ្សាយ​តំបន់​សក្តានុពលទេសចរណ៍​នៅខេត្តជាប់ដងទន្លេក្នុង​ព្រះរាជាណាចក្រកម្ពុជា។

តើបុណ្យទន្លេចាប់ផ្តើមពីពេលណាមកនិងនៅខេត្តណាខ្លះ? ខាងក្រោមនេះគឺជាការកត់ត្រាដោយ AMS Apsara ៖

បុណ្យទន្លេបានចាប់ផ្តើមធ្វើជាលើកដំបូងនៅឆ្នាំ២០១៥ ។ការប្រារព្ធនេះ​តាមរយៈ​សំណើរបស់​ក្រសួង​ទេសចរណ៍ ដែល​កាលណោះឯកឧត្តម ថោង ខុន ជារដ្ឋមន្រ្តី និងរាជរដ្ឋា​ភិបាលកម្ពុជាដឹកនាំដោយ​សម្ដេចអគ្គ​មហា​សេនាបតីតេជោ ហ៊ុន សែន ជានាយករដ្ឋមន្រី្ត ។រាជរដ្ឋាភិបាលបានកំណត់យកបុណ្យទន្លេត្រូវ​ធ្វើ​ឡើងក្នុង​សប្ដាហ៍ទី១ ឬសប្ដាហ៍ទី២ នៃខែមីនា​ជារៀងរាល់ឆ្នាំ។ រាជរដ្ឋា​ភិបាលក៏​បានផ្ដល់​សិទ្ធិឱ្យរដ្ឋមន្ត្រីក្រសួង​ទេសចរណ៍អាចចេញប្រកាស​កំណត់​លម្អិត រាល់វិធាន និងនីតិវិធីនៃការរៀបចំបុណ្យទន្លេ។

បុណ្យទន្លេលើកទី១ បានប្រារព្ធនៅខេត្តក្រចេះក្រោមប្រធានបទ «ទេសចរណ៍​តាមដងទន្លេ សម្រាប់ការអភិវឌ្ឍ​សហគមន៍​»ចាប់ពីថ្ងៃទី១៣ ដល់ថ្ងៃទី១៥ ខែមីនា ឆ្នាំ២០១៥ ។

បុណ្យទន្លេលើកទី២ ប្រារព្ធនៅខេត្តកំពង់ចាម និងខេត្តត្បូងឃ្មុំ ក្រោម​ប្រធានបទ​​ «ទន្លេស្អាត សហគមន៍ល្អ និងការអភិវឌ្ឍ​ទេសចរណ៍»ចាប់ថ្ងៃទី១១ ដល់ថ្ងៃទី១៣ ខែមីនា ឆ្នាំ២០១៦ ។

បុណ្យទន្លេលើកទី៣ ប្រារព្ធនៅខេត្តស្ទឹងត្រែងក្រោមប្រធានបទ «ទន្លេ៖ ផ្សារភ្ជាប់​ប្រជាជន ទេសចរណ៍ វប្បធម៌ និង​បរិស្ថាន » ចាប់ពីថ្ងៃទី២៤ ដល់ទី២៦ ខែមីនា ឆ្នាំ២០១៧ ។

បុណ្យទន្លេលើកទី៤ ប្រារព្ធនៅក្រុងតាខ្មៅ ខេត្តកណ្តាល ក្រោមប្រធានបទ «ទន្លេនៃសន្តិភាព មិត្តភាព និងនិរន្តរភាព​ទេសចរណ៍»ចាប់ពីថ្ងៃទី៨ ដល់ថ្ងៃទី១១ ខែមីនា ឆ្នាំ២០១៨។

បុណ្យទន្លេលើកទី៥ ប្រារព្ធនៅខេត្តកំពង់ឆ្នាំងក្រោមប្រធានប​ទ «ទន្លេ៖ ផ្សារភ្ជាប់​សន្តិភាព ប្រជាជន និងទេសចរណ៍»ចាប់ពីថ្ងៃទី ១៥ ដល់១៧ ខែ មីនា ឆ្នាំ២០១៩។

បុណ្យទន្លេលើកទី៦ ប្រារព្ធនៅខេត្តបាត់ដំបង ក្រោមប្រធានបទ «ទន្លេនៃ​សន្តិភាព និងទន្លេនៃវិបុលភាព» ចាប់ពីថ្ងៃទី១៣ ដល់ថ្ងៃទី១៥ ខែមីនា ឆ្នាំ២០២០ ។
ដោយឡែកក្នុងឆ្នាំ២០២១ និងឆ្នាំ២០២២ បុណ្យទន្លេមិនត្រូវបានប្រារព្ធទេ​ដោយសារវិបត្តិកូវីដ-១៩។

បន្ទាប់មកបុណ្យទន្លេលើកទី៧ បានប្រារព្ធឡើងវិញនៅខេត្តកំពង់ធំ ក្រោម​ប្រធានបទ «ទន្លេរបស់យើងដើម្បីបច្ចុប្បន្ន និងអនាគត» ចាប់ពីថ្ងៃទី៨ ដល់ថ្ងៃទី១០ ខែមីនា ឆ្នាំ២០២៣ ។

រីឯបុណ្យទន្លេលើកទី៨ នៅខេត្តសៀមរាបក្រោមប្រធានបទ «ទន្លេដើម្បីសន្តិភាព និងការអភិវឌ្ឍ»ចាប់ពីថ្ងៃទី១៥ ដល់ថ្ងៃទី១៧ ខែកុម្ភៈ ឆ្នាំ២០២៤។

ចំណែកបុណ្យទន្លេលើកទី៩ឆ្នាំ២០២៥ ប្រារព្ធនៅខេត្តតាកែវ ពីថ្ងៃទី២១-២៣ ខែមីនាក្រោមប្រធានបទ” “គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍​ធម្មជាតិ”។

គោលបំណង​នៃការរៀបចំពិធីបុណ្យទន្លេ គឺដើម្បីជំរុញលើកតម្លៃ និងផ្សព្វផ្សាយ​សក្តានុពល​ទេស​ចរណ៍ខេត្តនានា តាមដងទន្លេ ជាពិសេស លើកទឹកចិត្តដល់​ប្រជាជន នៅតាមបណ្តាខេត្តទាំងនោះឱ្យចូលរួម​យ៉ាង​សកម្ម ក្នុងការអភិវឌ្ឍ​ទីក្រុងជាប់ដងទន្លេ ការងារ​អភិវឌ្ឍទេសចរណ៍សហគមន៍៕
ដោយ៖មុនី