ឯកឧត្តម វង សូត ដឹកនាំសមាជិក សមាជិការដ្ឋសភា ចុះពិនិត្យ​មើលការបង្កបង្កើនផលដំណាំពោតរបស់សហគមន៍កសិកម្មជីរោទ៍រុងរឿង ខេត្តត្បូងឃ្មុំ

(ខេត្តត្បូងឃ្មុំ)៖ ឯកឧត្តម វង សូត អនុប្រធានទី២រដ្ឋសភា និង​សមាជិក សមាជិការដ្ឋសភាមណ្ឌលខេត្តត្បូងឃ្មុំ បានអញ្ជើញ​ចុះពិនិត្យការបង្កបង្កើនផលដំណាំពោតរបស់សហគមន៍កសិកម្មជីរោទ៍រុងរឿង និងជួបសំណេះសំណាលជាមួយ​សមាជិក​សហគមន៍ ៥០គ្រួសារ ស្ថិតនៅក្នុងភូមិកំពង់ឫស្សី ឃុំជីរោទិ៍ទី១ ស្រុកត្បូងឃ្មុំ ខេត្តត្បូងឃ្មុំ នាព្រឹកថ្ងៃសុក្រ ទី២១ ខែមីនា ឆ្នាំ២០២៥ ។

លោកប្រធានសហគមន៍កសិកម្មជីរោទ៍រុងរឿង បានឲ្យដឹងថា សហគមន៍បានផ្តួចផ្តើម រួមគ្នាបង្កើតឡើងនៅឆ្នាំ២០២២ ដោយមានការសម្របសម្រួលពីមន្ទីរកសិកម្មខេត្ត អាជ្ញាធរឃុំ ស្រុក ។ បច្ចុប្បន្ន សហគមន៍ មានថ្នាក់ដឹកនាំក្រុមប្រឹក្សាភិបាល ៥រូប ក្នុងនោះស្រី ២រូប គណៈកម្មាធិការត្រួតពិនិត្យ ៣រូប និងមានសមាជិកសរុប ៣៥នាក់ ក្នុងនោះស្រី ១២នាក់ មានភាគហ៊ុនសរុបចំនួន ១១០ហ៊ុន ស្មើនឹងទឹកប្រាក់សរុប ១១ ០០០ ០០០រៀល ។ បន្ទាប់ពីបានបង្កើតសហគមន៍ ក្រសួង​កសិកម្ម រុក្ខាប្រមាញ់ និងនេសាទ បានផ្តល់ឃ្លាំងមួយអាច​ស្តុកទុកកសិផលចំនួន ១០០តោន ដែលឃ្លាំងនេះបាន​បម្រើការ​ស្តុកទុកដាក់ពោតរបស់សមាជិកសហគមន៍​យ៉ាងសំខាន់ ។

សហគមន៍កសិកម្ម មានផ្ទៃដីផលិតកម្មកសិកម្មសរុប ១៤០ហ.ត ក្នុងនោះផ្ទៃដីដាំបន្លែ ១០ហ.ត ស្រូវមានផ្ទៃដី ២០ហ.ត និងពោតក្រហមជាដំណាំសក្តានុពលជាងគេ មានផ្ទៃដី១១០ហ.ត បរិមាណផល ២ ០០០តោនក្នុងមួយឆ្នាំ។ សហគមន៍ទិញពោតពីសមាជិកយកទៅសម្លុតក្នុងឡសម្ងួតដែលមានសមត្ថភាពសម្លុតពោត ៤៥តោនក្នុង១ថ្ងៃ រួចផ្គត់ផ្គង់​ទៅក្រុមហ៊ុនប្រមូលទិញពោតក្រហមដូចជា ក្រុមហ៊ុន គ្រីនហ្វីត និងក្រុមហ៊ុន ស៊ីភី តាមរយៈការចុះកិច្ចសន្យាផលិតកម្មកសិកម្ម ក្រោមការសម្របសម្រួលពីមន្ទីរកសិកម្ម រុក្ខាប្រមាញ់ និង នេសាទ ខេត្តត្បូងឃ្មុំ ។

ឯកឧត្តម វង សូត ក៏បានលើកទឹកចិត្តដល់ប្រធានសហគមន៍ និងក្រុមប្រឹក្សាសហគមន៍ ឱ្យខិតខំស្វែងរកទីផ្សារសម្រាប់ កសិផល និងធ្វើផែនការផលិតឱ្យបានច្បាស់លាស់ ដោយ​នាំយក កសិផលរបស់កសិករ ទៅដល់ទីផ្សារគោលដៅចុង​ក្រោយ ដើម្បីបង្កើនប្រាក់ចំណេញ និងរក្សាបាននិរន្តរភាព​ទីផ្សារ។ ស្របពេលជាមួយគ្នានោះ ក៏ត្រូវពង្រីកការដាំដុះដំណាំ​ពោតឲ្យបានច្រើនបន្ថែមទៀត ដើម្បីផ្គត់ផ្គង់ទីផ្សារផងដែរ ៕

ដោយ ៖ ហេង សម្បត្តិ

ហេង សម្បត្តិ
ហេង សម្បត្តិ
ជាការីថត ជាអ្នកយកព័ត៌មាន ក៏ជាអ្នកជំនាញកាត់តវីដេអូ ប្រចាំស្ថានីយវិទ្យុ និងទូរទស្សន៍អប្សរាផងដែរ។ តាមរយៈបទពិសោធន៍ជាច្រើនឆ្នាំលើវិស័យព័ត៌មាន នឹងនាំមកជូនទស្សនិកជននូវព័ត៌មានសម្បូរបែប ប្រកបដោយវិជ្ជាជីវៈ។
ads banner
ads banner
ads banner