វ៉ាស៊ីនតោន ៖ មហាសេដ្ឋីពិភពលោក និងជាប្រធាននាយកដ្ឋានប្រសិទ្ធភាពរដ្ឋាភិបាល (DOGE) លោក Elon Musk បានអះអាងថា សកម្មជនឆ្វេងនិយមចង់បញ្ចប់ជីវិតរបស់លោក និងបំផ្លាញក្រុមហ៊ុន Tesla របស់លោក។ នេះបើតាមការចេញផ្សាយរបស់សារព័ត៌មាន RT។

លោក Musk ដែលបច្ចុប្បន្នមានតួនាទីជាទីប្រឹក្សារបស់ប្រធានាធិបតីអាមេរិក លោក Donald Trump បានចោទប្រកាន់ថា សកម្មជនឆ្វេងនិយមកំពុងលួចឃុបឃិតគ្នាប៉ន់ប៉ងសម្លាប់គាត់ និងបំផ្លិចបំផ្លាញក្រុមហ៊ុន Tesla ដើម្បីបញ្ឈប់កិច្ចខិតខំប្រឹងប្រែងរបស់គាត់ ក្នុងការកាត់បន្ថយបុគ្គលិក និងអំពើពុករលួយរបស់សហព័ន្ធអាមេរិក។

ប្រតិកម្មប្រឆាំងនឹងសកម្មភាពរបស់លោក Musk បានកើនឡើងក្នុងពេលប៉ុន្មានសប្តាហ៍ថ្មីៗនេះ ជាមួយនឹងការតវ៉ា និងការវាយប្រហារលើទ្រព្យសម្បត្តិ ដែលទាក់ទងនឹង Tesla។

លើសពីនេះ បាតុកម្មតវ៉ានៅខាងក្រៅក្រុមហ៊ុនឡានអគ្គិសនី Tesla របស់លោក Elon Musk បានរីករាលដាលដល់ ៥ប្រទេស រួមមាន សហរដ្ឋអាមេរិក, កាណាដា, អង់គ្លេស, អាល្លឺម៉ង់ និង ព័រទុយហ្គាល់ នេះបើតាមការចុះផ្សាយរបស់ទីភ្នាក់ងារព័ត៌មាន BBC៕

ប្រភព ៖ RT និង BBC ប្រែសម្រួល ៖ ឈឹម ទីណា