វ៉ាស៊ីនតោន ៖ ក្នុងគោលបំណងធ្វើទំនើបកម្មជើងហោះហើរ និងស្តារសេដ្ឋកិច្ចឡើងវិញ Malaysia Aviation Group ហៅកាត់ MAG ដែលជាក្រុមហ៊ុនមេរបស់ Malaysia Airlines ថ្មីៗនេះបានប្រកាសទិញយន្តហោះថ្មីចំនួន ៣០ គ្រឿងថែមទៀត ជាប្រភេទយន្តហោះ Boeing 737 MAX ដែលនឹងចែកចាយនៅឆ្នាំ ២០២៩។

នាយកគ្រប់គ្រង MAG លោក Izham Ismail និយាយថា ក្រុមហ៊ុនលោកបានយល់ព្រមទិញយន្តហោះពីក្រុុមហ៊ុន Boeing របស់អាមេរិកចំនួន ៣០គ្រឿង ក្នុងនោះមានយន្តហោះធុន 737 MAX 8 ចំនួន ១៨ គ្រឿង និងយន្តហោះ 737 MAX 12 ចំនួន ១២ គ្រឿង។ ប៉ុន្តែ MAG បានបដិសេធមិនបង្ហាញតម្លៃនៃកិច្ចព្រមព្រៀងនេះ។

ក្រុមហ៊ុនអាកាសចរណ៍ម៉ាឡេស៊ីបានតស៊ូជំនះគ្រោះមហន្តរាយធំៗចំនួនពីរក្នុងឆ្នាំ ២០១៤ ហើយបានកាត់បន្ថយការហោះហើររបស់ខ្លួនជាបណ្តោះអាសន្ន បន្ទាប់ពីត្រូវបានស៊ើបអង្កេតកាលពីឆ្នាំមុនដោយអាជ្ញាធរអាកាសចរណ៍ស៊ីវិលម៉ាឡេស៊ី ដែលបានរកឃើញបញ្ហាសុវត្ថិភាព និងការថែទាំសំខាន់ៗមួយចំនួន។

នៅក្នុងខែកុម្ភៈ ឆ្នាំ ២០២២ MAG បានយល់ព្រមជួលយន្តហោះ Boeing 737 MAX 8 ថ្មីចំនួន ២៥ គ្រឿងពីក្រុមហ៊ុន Air Lease Corporation សម្រាប់ការដឹកជញ្ជូននៅឆ្នាំ ២០២៦។ ហើយគិតមកទល់ល់ពេលនេះ យន្តហោះចំនួន ៧គ្រឿងទទួលបានហើយ ហើយនៅសល់ប៉ុន្មានគ្រឿងទៀត នឹងមកដល់ក្នុងរយៈពេល ១៨ខែបន្ទាប់៕

ប្រភព ៖ រ៉យទ័រ ប្រែសម្រួល ៖ ឈឹម ទីណា