កង់បេរ៉ា ៖ កងទ័ពអូស្ត្រាលី នៅថ្ងៃចន្ទនេះ ទើបទទួលបានយានបាញ់រ៉ុក្តែតចល័តចម្ងាយឆ្ងាយ ហៅកាត់ HIMARS ចំនួន ២ គ្រឿងដំបូង ក្នុងចំណោម ៤២ គ្រឿង ដែលបញ្ជាទិញពីក្រុមហ៊ុនផលិតសព្វាវុធអាមេរិក Lockheed Martin ខណៈការផលិតប្រព័ន្ធបាញ់រ៉ុក្តែតពហុគោលដៅ ហៅកាត់ GMLRS នឹងចាប់ផ្តើមនៅក្នុងប្រទេសអូស្ត្រាលីក្នុងឆ្នាំ ២០២៥។

យានបាញ់រ៉ុក្តែត HIMARS នេះ មានសមត្ថភាពវាយប្រហារគោលដៅសត្រូវក្នុងចម្ងាយជាង ៥០០ គីឡូម៉ែត្រ។ HIMARS បានដើរតួនាទីសំខាន់ខ្លាំង ក្នុងការជួយអ៊ុយក្រែនប្រយុទ្ធតតាំងជាមួយកងទ័ពរុស្ស៉ី និងអាចដណ្ដើមបានទឹកដីរបស់ខ្លួនមកវិញ នៅលើសមរភូមិនាពេលកន្លងមក។

ផ្អែកតាមសេចក្តីរាយការណ៍របស់កាសែត China Daily រដ្ឋមន្ត្រីការពារជាតិអូស្រ្តាលី លោក Richard Marles និយាយថា អូស្ត្រាលីនឹងចំណាយលើវិស័យការពារជាតិជាង ៦០០ លានដុល្លារអាមេរិក ដើម្បីបង្កើនសមត្ថភាពយោធារបស់ខ្លួន រួមទាំងការផលិតអាវុធឈានមុខ កម្មវិធីអភិវឌ្ឍនាវាមុជទឹក និង នាវាចម្បាំង។

លោក Marles បានគូសបញ្ជាក់ថា បច្ចុប្បន្នអូស្រ្តាលីបាននឹងកំពុងផ្តោតសំខាន់លើតម្រូវការបង្កើនសមត្ថភាពវាយប្រហាររយៈចម្ងាយឆ្ងាយ និងយានបាញ់រ៉ុក្តែត HIMARS ដែលនឹងអនុញ្ញាតឱ្យអូស្រ្តាលីអាចចល័តកងកម្លាំងការពារជាតិរបស់ខ្លួននៅក្នុងតំបន់។

រីឯរដ្ឋមន្ត្រីឧស្សាហកម្មការពារជាតិអូស្រ្តាលី លោក Pat Conroy ក៏បានអះអាងផងដែរថា អូស្ត្រាលីនឹងទទួលបានគ្រាប់មីស៊ីល Precision Strike ដែលមានសមត្ថភាពវាយប្រហារក្នុងចម្ងាយ ៥០០ គីឡូម៉ែត្រ សម្រាប់ប្រើប្រាស់នៅក្នុងយាន HIMARS នៅឆ្នាំនេះ។

អូស្ត្រាលី និងសម្ព័ន្ធមិត្តសន្តិសុខរបស់សហរដ្ឋអាមេរិកផ្សេងទៀត កំពុងស្ថិតក្រោមសម្ពាធពីលោកប្រធានាធិបតី Donald Trump ក្នុងការបង្កើនការចំណាយលើវិស័យការពារជាតិ។

ជាការឆ្លើយតប ប្រមុខការពារជាតិអូស្រ្តាលីរូបនេះ បានសង្កត់ធ្ងន់ថា ថវិកាសហព័ន្ធ នឹងត្រូវបង្កើនរហូតដល់ ៦,៦៦ ពាន់លានដុល្លារអាមេរិក សម្រាប់វិស័យការពារជាតិក្នុងរយៈពេល ៤ ឆ្នាំខាងមុខនេះ៕

ប្រភព ៖ AFP និង China Daily ប្រែសម្រួល ៖ ឈឹម ទីណា