សម្តេចតេជោ ហ៊ុន សែន បង្ហាញសារកំពុងមានទុក្ខធ្ងន់
(ភ្នំពេញ)៖ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃកម្ពុជា បានបង្ហាញសារ កំពុងមានទុក្ខធ្ងន់ ដោយម្ខាងភរិយា គឺសម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ត្រូវវះកាត់ និងបងប្រុសសន្លប់ មិនដឹងខ្លួន ២៤ម៉ោងមកហើយ ។ សម្ដេចតេជោ បង្ហាញដូច្នេះ នៅលើបណ្ដាញសង្គមហ្វេសប៊ុក នៅព្រឹកថ្ងៃទី២៥ ខែមីនា ឆ្នាំ២០២៥ ។
សម្ដេចតេជោ បានសរសេរថា ពេលនេះ ខ្ញុំពិតជា កំពុងមានទុក្ខធ្ង ន់ម្ខាងភរិយា ត្រូវវះកាត់។ បើទោះជាឆ្លងផុតដំណាក់ការគ្រោះថ្នាក់មកដល់សុវត្តិភាពហើយក៏ដោយ តែក្នុងឋានៈជាស្វាមី នៅតែមានកង្វល់ ព្រោះមិនអាចនៅកំដរ និងមើលថែទាំភរិយាបាន។ រឿងធ្ងន់ជាងនេះ គឺបងប្រុសទី១ មិនអាចឆ្លងផុតពីការលាចាកលោក ក្នុងពេលខ្លីខាងមុខនេះបានឡើយ។ ក្នុងក្រុមគ្រួសារ បានត្រៀមទទួលការឈឺចាប់ ដែលមិនអាចជៀសវាងបាននេះរួចហើយ ។
សម្ដេចបញ្ជាក់ថា ម្ខាងភរិយា ម្ខាងបងប្រុស ក្នុងពេលតែមួយ និងនៅកន្លែងខុសគ្នា ។ ភរិយាខ្ញុំ ជំរុញឱ្យខ្ញុំប្រញាប់ទៅមើលបងប្រុស និងក្នុងករណី បងប្រុសចែកឋានក្នុងពេលឆាប់ គ្រប់កម្មវិធី ច្បាស់ជាមិនមានវត្តមានភរិយាខ្ញុំឡើយ ។
សម្ដេចតេជោ បន្ថែមថា រឿងចម្លែក សូមជួយមើលរូបថតបងប្រុសខ្ញុំ ដែលរូបថតតែមួយសន្លឹក តែពេលថតចូលក្នុងទូរសព្វ័ មានរូបប្លែកពីគ្នា នៅត្រង់រូបមួយសន្លឹក មានទឹកភ្នែក ដូចជាយំ ហាក់បង្ហាញនូវការមិនអស់ចិត្ត ឬនៅអាឡោះអាល័យអ្វីមួយ ។
សម្ដេចក៏បានសម្ដែងនូវសេចក្ដីអាឡោះអាល័យថា៖ ពេលនេះ ទោះចង់សួរគាត់ ក៏សួរមិនបានដែរ ព្រោះគាត់ សន្លប់មិនដឹងខ្លួន ២៤ ម៉ោងរួចមកហើយ។ មិនដឹងថា អ្នកវិទ្យាសាស្ត្របកស្រាយរបៀបណា? និងអ្នកអបីយជំនឿ បកស្រាយរបៀបណា ៕
ដោយ ៖ វណ្ណលុក
