វ៉ាស៊ីនតោន ៖ មេដឹកនាំអ៊ុយក្រែននិយាយថា ចំនួនអ្នករងរបួសនៅក្នុងការវាយប្រហាររបស់រុស្ស៊ីលើទីក្រុង Sumy កាលពីថ្ងៃចន្ទ បានកើនឡើងដល់ ៩០ នាក់ក្នុងនោះមានកុមារ ១៧ នាក់។

ជាមួយគ្នានេះ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយក្នុងវីដេអូបង្ហោះនៅលើបណ្តាញសង្គមថា មានអ្នករងរបួសជាច្រើន ហើយគិតមកទល់ពេលនេះ យើងដឹងថា មានប្រហែល ៩០ នាក់ហើយ រួមទាំងកុមារ ១៧ នាក់។

លោកប្រធានាធិបតី ហ្សេលេនស្គី បន្ថែមថា សាលារៀន និងអគារលំនៅឋានស្ថិតនៅចំណុចកណ្តាលនៃការវាយប្រហាររបស់រុស្ស៊ីចុងក្រោយនេះ លោកថា ជាសំណាងល្អ ដែលក្មេងៗមិនមាននរណាម្នាក់គ្រោះថ្នាក់ដល់អាយុជីវិត។

មេដឹកនាំសម័យសង្គ្រាមរូបនេះ បានបញ្ជាក់ទៀតថា ជារៀងរាល់ថ្ងៃ និង យប់ រុស្ស៊ីបានបាញ់មីស៊ីល និងវាយប្រហារដោយយន្តហោះដ្រូនប្រឆាំងប្រទេសរបស់យើង ហើយសង្គ្រាមកើតឡើងស្ទើររាល់ថ្ងៃនេះ បានបង្កការខាតបង់ ការឈឺចាប់ និងការបំផ្លិចបំផ្លាញ ដែលអ៊ុយក្រែនមិនចង់ជួបទាល់តែសោះ។

ទោះបីជាប្រធានាធិបតីអាមេរិក លោក ដូណាល់ ត្រាំ ជំរុញឱ្យបញ្ចប់ជម្លោះយ៉ាងឆាប់រហ័សក៏ដោយ ក៏ការវាយប្រហារនៅតែបន្តកើតមានក្នុងប្រទេសអ៊ុយក្រែន រួមទាំងនៅតំបន់ Sumy ដែលជាប់ព្រំដែនរុស្ស៊ី។

តួយ៉ាង ការវាយប្រហារថ្មីនេះ កើតឡើងចំថ្ងៃដែលរុស្ស៊ីកំពុងជួបចរចាជាមួយអាមេរិកនៅប្រទេសអារ៉ាប៊ីសាអូឌីត ស្តីពីបទឈប់បាញ់ក្នុងសង្គ្រាមអ៊ុយក្រែន។ រុស្សីបានកាន់កាប់ផ្នែកខ្លះនៃតំបន់ Sumy នៅពេលចាប់ផ្តើមការលុកលុយពេញទំហឹងប្រឆាំងអ៊ុយក្រែននៅឆ្នាំ ២០២២៕

ប្រភព ៖ AFP ប្រែសម្រួល ៖ ឈឹម ទីណា