កម្ពុជា-ចិន បង្កើនកិច្ចសហប្រតិបត្តិការលើវិស័យទេសចរណ៍ ដើម្បីទាក់ទាញទេសចរ ចិន ឱ្យមានកំណើនជាលំដាប់នៅកម្ពុជា
(ភ្នំពេញ)៖ កម្ពុជា ចិន ជួបពិភាក្សាការងារផ្លាស់ប្តូរទស្សនៈស៊ីជម្រៅអំពីការបង្កើតកិច្ចសហប្រតិបត្តិការរួមគ្នារវាងស្ថាប័នទាំងពីរ ដើម្បីជំរុញនិងអភិវឌ្ឍទេសចរណ៍ កម្ពុជា ចិន ដែលរួមមានការរៀបចំទស្សនកិច្ចដកស្រង់ និងផ្លាស់ប្តូរបទពិសោធន៍ ចាប់ពីកម្រិតថ្នាក់ដឹកនាំ និងកម្រិតបច្ចេកទេស និងការពង្រឹងសមត្ថភាពមន្ត្រីរាជការ ព្រមទាំងការរួមគ្នាផ្សព្វផ្សាយសក្តានុពលទេសចរណ៍កម្ពុជា ទៅកាន់ប្រជាជនចិន ដើម្បីទាក់ទាញប្រជាជនចិនឱ្យអញ្ជើញមក កម្សាន្តនៅកម្ពុជា ច្រើនឡើងជាលំដាប់ ។
កិច្ចពិភាក្សានេះធ្វើឡើង រវាង ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និង លោក Zhen Zhanmin អនុប្រធានបណ្ឌិត្យសភាវិទ្យាសាស្ត្រសង្គមចិន Chinese Academy of Social Sciences (CASS) ដែលត្រូវបានចាត់ទុកជាធនាគារខួរក្បាលរបស់ប្រទេសចិន នាថ្ងៃទី២៤ ខែមីនា ឆ្នាំ២០២៥ ។
ឯកឧត្តមរដ្ឋមន្ត្រី ហួត ហាក់ បានអរគុណចំពោះកិច្ចសហប្រតិបត្តិការ លើវិស័យទេសចរណ៍ និងរៀបចំឱ្យមានកិច្ចសហការ ផ្សព្វផ្សាយយ៉ាងទូលំទូលាយទប់ស្កាត់នូវព័ត៌មានមិនពិតពីកម្ពុជា ដែលកម្ពុជា ជាគោលដៅមានសន្តិសុខ និងសុវត្ថិភាពល្អសម្រាប់អ្នកទេសចរ និងអ្នកវិនិយោគទាំងអស់ រួមទាំងប្រជាពលរដ្ឋចិនផងដែរ តួយ៉ាង ការផ្សព្វផ្សាយព័ត៌មានមិនពិតពីកម្ពុជា ដែលអាចជះឥទ្ធិពលមិនល្អពីប្រទេសកម្ពុជា ។ កន្លងមកក្រសួងទេសចរណ៍ និងស្ថានទូតចិននៅកម្ពុជា បានសហការយ៉ាងជិតស្និទ្ធិ ដើម្បីផ្តល់កិច្ចការពារ សុខសុវត្ថិភាព និងសន្តិសុខដល់អ្នកទេសចរ និងប្រជាពលរដ្ឋចិននៅកម្ពុជា ៕
ដោយ ៖ ហេង សម្បត្តិ+ ថេត វិចិត្រ
