បរទេស៖ មន្ត្រីអ៊ីស្រាអែល និងប្រភពទីពីរ ដែលដឹងរឿងនេះ បានទម្លាយឲ្យដឹងថា អ៊ីស្រាអែលកំពុងរៀបចំផែនការបញ្ជូនទ័ព ៥ម៉ឺននាក់ នៅក្នុងកងពលធំៗ ចំនួន៥រួមគ្នា ទៅវាយលុកចូលតំបន់ហ្គាហ្សា ទ្រង់ទ្រាយដ៏ធំពុំធ្លាប់មាន ដើម្បីបោសសម្អាត និងកាន់កាប់តំបន់ទាំងមូល នេះបើតាមការចុះផ្សាយ របស់ទីភ្នាក់ងារព័ត៌មាន CNN នៅថ្ងៃអង្គារនេះ។

ប្រភពថា នេះគឺជាសេណារីយ៉ូ ដែលរដ្ឋាភិបាលអ៊ីស្រាអែល បង្កើនសម្ពាធលើក្រុមហាម៉ាស់ ដោះលែងចំណាប់ខ្មាំង នៅសេសល់ប្រមាណ៥៩នាក់ទៀត ដោយអះអាងថា មិនមានការចរចាបញ្ចប់សង្គ្រាម អ្វីទាំងអស់។

ផែនការនេះត្រូវបានទម្លាយ ក្រោយពេលគណៈរដ្ឋមន្ត្រីអ៊ីស្រាអែល កាលពីថ្ងៃអាទិត្យ បានបង្កើតទីភ្នាក់ងារមួយ ជួយសម្រួលដល់ប្រជាជនប៉ាឡេស្ទីននៅក្នុងតំបន់នោះ ដែលចង់ចូលរួមក្នុង “ការផ្ទេរ ដោយស្ម័គ្រចិត្ត” ទៅកាន់ប្រទេសទីបី។

នាយករដ្ឋមន្ត្រីអ៊ីស្រាអែល លោក Benjamin Netanyahu ចាត់ទុកការលុបបំបាត់សមត្ថភាពយោធា និងអភិបាលកិច្ចរបស់ក្រុមហាម៉ាស ជាគោលដៅសង្គ្រាមដ៏សំខាន់ ខណៈដែលលោកប្តេជ្ញាថា នឹងសម្រេចបាន “ជ័យជម្នះ ដាច់ខាត”។

មន្ត្រីជំនិតរបស់លោកនាយករដ្ឋមន្ត្រីអ៊ីស្រាអែលជឿជាក់ថា ប្រធានាធិបតីអាមេរិក Donald Trump នឹងគាំទ្រសកម្មភាពយោធាទ្រង់ទ្រាយធំ របស់អ៊ីស្រាអែល ជាងអតីតប្រធានាធិបតី Joe Biden ដែលធ្លាប់បានផ្អាកការផ្ទេរសព្វាវុធមួយចំនួន ទប់ស្កាត់ការវាយលុកដ៏ធំ របស់អ៊ីស្រាអែល ទៅកាន់ផ្នែកភាគខាងត្បូង នៃតំបន់ Gaza ដែលមានប្រជាជនច្រើន៕

ប្រភពពី CNN ប្រែសម្រួល៖ សារ៉ាត