កៀវ ៖ រុស្ស៊ី និងអ៊ុយក្រែន នៅថ្ងៃអង្គារ បានព្រមព្រៀងគ្នាបញ្ឈប់ការវាយប្រហារយោធានៅសមុទ្រខ្មៅ និងលើទីតាំងថាមពល ប្រការនេះនឹងជួយបន្ធូរបន្ថយសម្ពាធលើការនាំចេញកសិផល ដែលជាការលើកទឹកចិត្តជាក់ស្តែងដំបូងសម្រាប់រុស្ស៊ី។

សេតវិមាននិយាយថា ប្រទេសនីមួយៗបានយល់ព្រមធានាឱ្យមានការធ្វើនាវាចរណ៍ប្រកបដោយសុវត្ថិភាព, លុបបំបាត់ការប្រើប្រាស់កម្លាំង និងទប់ស្កាត់ការប្រើប្រាស់នាវាពាណិជ្ជកម្មសម្រាប់គោលបំណងយោធានៅក្នុងសមុទ្រខ្មៅ។

រីឯវិមានក្រឹមឡាំងនិយាយថា កិច្ចព្រមព្រៀងបញ្ឈប់ការវាយប្រហារនៅសមុទ្រខ្មៅអាចចូលជាធរមានបាន លុះត្រាតែមានការដកការរឹតបន្តឹងលើវិស័យកសិកម្មរបស់ខ្លួន។

ចំណែកប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី និយាយថា វាលឿនពេកក្នុងការប្រាប់ថាតើកិច្ចព្រមព្រៀងនេះ នឹងដំណើរការឬអត់ ប៉ុន្តែវាជាជំហានត្រឹមត្រូវ។

លោក ហ្សេលេនស្គី បានប្រាប់សន្និសីទសារព័ត៌មានក្នុងទីក្រុងកៀវថា កិច្ចពិភាក្សានេះក៏បានជជែកផងដែរ អំពីការនាំយកភាគីទីបីឲ្យជួយត្រួតពិនិត្យបទឈប់បាញ់នាពេលអនាគត។

បើតាមមេដឹកនាំអ៊ុយក្រែនរូបនេះ ប្រទេសតួកគីដែលបានរក្សាទំនាក់ទំនងជាមួយភាគីទាំងពីរ អាចនឹងដើរតួជាអ្នកតាមដានស្ថានការណ៍នៅសមុទ្រខ្មៅ ហើយថា ប្រទេសមួយទៀតនៅមជ្ឈិមបូព៌ាក៏នឹងអាចត្រួតពិនិត្យកិច្ចព្រមព្រៀងថាមពលផងដែរ៕

ប្រភព ៖ AFP ប្រែសម្រួល ៖ ឈឹម ទីណា