បរទេស ៖ ប្រធានាធិបតីស្តីទី កូរ៉េខាងត្បូង បាននិយាយ នៅថ្ងៃពុធនេះថា មនុស្សយ៉ាងហោចណាស់ ចំនួន១៨នាក់ ត្រូវបានសម្លាប់ នៅក្នុងការផ្ទុះឆេះព្រៃ ដ៏អាក្រក់បំផុតមួយ ក្នុងប្រទេសកូរ៉េខាងត្បូង ជាមួយនឹងអណ្តាតភ្លើង បង្កការខូចខាតមិនធ្លាប់មាន ពីមុនមក។

អគ្គិភ័យជាង១០កន្លែង បានកើតឡើងដំបូង កាលពីចុងសប្តាហ៍ ខណៈភ្លើងដ៏ធំ បានឆាបឆេះពេញភូមិ បំផ្លាញទាំងប្រាសាទប្រវត្តិសាស្ត្រ ផងដែរ។ រដ្ឋាភិបាលបានបង្កើនការប្រកាសអាសន្ន ដល់កម្រិតខ្ពស់បំផុតរបស់ខ្លួន ហើយបានប្រកាសពី “ការឆ្លើយតបថ្នាក់ជាតិពេញលេញ” ដើម្បីគ្រប់គ្រងភ្លើង។

មន្ត្រីក្រសួងសុវត្ថិភាព បានប្រាប់ AFP ថា «មនុស្សចំនួន ១៨ នាក់បានស្លាប់ នៅក្នុងភ្លើងឆេះព្រៃ…បន្ថែមលើនេះ មនុស្ស៦នាក់ បានរងរបួសធ្ងន់ និង ១៣នាក់ រងរបួសស្រាល»។

អាកាសធាតុស្ងួត និងខ្យល់បក់ខ្លាំង បានបង្អាក់កិច្ចខិតខំប្រឹងប្រែង ដើម្បីទប់ស្កាត់ភ្លើង ដោយរដ្ឋាភិបាលបានចាត់វិធានការដ៏កម្រ ក្នុងការជម្លៀសអ្នកទោស រាប់ពាន់នាក់ ចេញពីមណ្ឌលឃុំឃាំង នៅតាមបណ្តាខេត្ត ដែលរងផលប៉ះពាល់។

កាលពីថ្ងៃអង្គារ អាជ្ញាធរបានចេញការប្រកាសអាសន្នសម្រាប់ភូមិ Hahoe Folk ដែលជាតំបន់បេតិកភណ្ឌពិភពលោក ចុះបញ្ជីដោយអង្គការយូណេស្កូ ពេញនិយមដោយអ្នកទេសចរ ខណៈដែលភ្លើងបានខិតជិតមកដល់។

ប្រធានាធិបតីស្តីទីកូរ៉េខាងត្បូង លោក Han Duck-soo បាននិយាយថា «ភ្លើងឆេះព្រៃដែលឆេះរយៈពេលប្រាំថ្ងៃ ជាប់ៗគ្នា នៅក្នុងតំបន់ Ulsan និងតំបន់ Gyeongsang កំពុងបង្កការខូចខាត ដែលមិនធ្លាប់មានពីមុនមក»៕

ប្រភពពី AFP ប្រែសម្រួល៖សារ៉ាត