(ភ្នំពេញ)៖ កាលពីថ្ងៃទី១៧-១៨ ខែមីនា ឆ្នាំ២០២៥ ឯកឧត្តម ទូច យ៉ារ៉ាន់ឌី អនុរដ្ឋលេខាធិការក្រសួងប្រៃសណី​យ៍ និងទូរគមនាគមន៍ បានអញ្ជើញជាអធិបតីក្នុងសិក្ខាសា​លា​ស្តីពី “ប្រព័ន្ធគ្រប់គ្រងសាកលវិទ្យាល័យ”ដោយមាន​ការ​អញ្ជើញចូលរួមពីក្រុមការងារជំនាញ និងបណ្តាសាកលវិទ្យា​ល័យ​ចំនួន ៣៧ ដែលក្នុងនោះមានគ្រឹះស្ថានរដ្ឋចំនួន ១៩ និងឯកជនចំនួន ១៨។

សិក្ខាសាលានេះរៀបចំឡើង ក្នុងគោលបំណងបញ្ជ្រាបការ​យល់​ដឹង​ពី​ប្រព័ន្ធគ្រប់គ្រងសាកលវិទ្យាល័យ ដោយផ្ដល់​ឱ​កាស​ឱ្យគ្រប់សាកលវិទ្យាល័យទាំងអស់ដែល​មានចំណាប់​អារម្មណ៍អាចធ្វើការស្នើសុំប្រព័ន្ធយកទៅប្រើប្រាស់។ ប្រព័ន្ធ​នេះនឹងចូលរួមចំណែកពង្រឹងអភិបាលកិច្ចនៅក្នុងគ្រឹះស្ថានឧត្តមសិក្សា ក៏ដូចជាការកសាងមូលដ្ឋានគ្រឹះសម្រាប់​ប្រព័ន្ធ​ឧត្តមសិក្សាទំនើប។ ក្នុងនោះដែរ “ប្រព័ន្ធគ្រប់គ្រងសាកល​វិទ្យា​ល័យ​”មានមុខងារស្នូលចំនួន៣ សំខាន់ៗរួមមាន៖

១. ប្រព័ន្ធគ្រប់គ្រងសាកលវិទ្យាល័យ ដែលមានឈ្មោះថា “សាកលវិទ្យាល័យ” ដែលផ្តល់ភាពងាយស្រួលក្នុងការគ្រ​ប់​គ្រងព័ត៌មានរបស់និស្សិត រៀបចំឆ្នាំសិក្សា កាលវិភាគសិក្សា ពេលវេលានិងថ្នាក់របស់និស្សិត រៀបចំមុខវិជ្ជាសម្រាប់សិស្ស​និស្សិតអាចចុះឈ្មោះតាមរយៈអនឡាញ ការធ្វើការវាយ​តម្លៃ​ទៅលើសិស្សនិងគ្រូ ការផ្តល់ព័ត៌មាននិងជូនដំណឹងដល់​សិស្ស​តាមរយៈប្រព័ន្ធ គ្រប់គ្រងនិងតាមដានការចុះ​កម្ម​សិក្សា​របស់និសិ្សត ការដាក់ពិន្ទុនិងចំណាត់ថ្នាក់ ចេញព្រឹត្តិ​បត្រពិន្ទុ វិញ្ញាបនបត្រ ទាញយករបាយការណ៏និស្សិត និង​របាយការណ៏ផ្សេងៗ។

២. ប្រព័ន្ធគ្រប់គ្រងការសិក្សា ដែលមានឈ្មោះថា “រៀន” ជាប្រព័ន្ធដែលអនុញ្ញាតឲ្យសិស្សនិស្សិត រៀនសូត្រលើប្រព័ន្ធ​តាមរយៈអនឡាញ ធ្វើកិច្ចការសាលា តាមដានកាលវិភាគ ពិន្ទុប្រលង ចំណាត់ថ្នាក់ តាមដានវត្តមាន ព្រឹត្តិបត្រពិន្ទុ ទទួល​បានព័ត៌មានផ្សេងៗពីការសិក្សាតាមរយៈប្រព័ន្ធ ពិនិត្យ​មើល និងទាញយក ID CARD និងការស្នើរសុំឯកសារ​ផ្សេងៗ​។ លើសពីនេះទៀត សិស្សនិស្សិត ឬអាណាព្យាបាល​សិស្សអាចទូទាត់ថ្លៃសិក្សា តាមរយៈប្រព័ន្ធ KHQR ដែលជា​ទំនើបកម្មក្នុងយុគសម័យឌីជីថល។

៣. ប្រព័ន្ធបណ្ណាល័យ ដែលមានឈ្មោះថា “បណ្ណាល័យ” ជាប្រព័ន្ធដែលអនុញ្ញាតឲ្យឧត្តមសិក្សាគ្រប់គ្រងធនធានបណ្ណាល័យ ប្រកបដោយប្រសិទ្ធភាព ក្នុងការប្រើប្រាស់តាមរយៈអនឡាញ និងគ្រប់គ្រងសៀវភៅ ការពិនិត្យលើការខ្ចីនិងប្រគល់សងត្រលប់មកវិញ ក៏ដូចជាការស្វែងរកសៀវភៅអេឡិចត្រូវនិច ការគ្រប់គ្រងព័ត៌មាននិងរបាយការណ៏របស់អ្នកប្រើប្រាស់ ជាពិសេសការជូនដំណឹងដោយស្វ័យប្រវត្តិអំពីកាលបរិច្ឆេទកំណត់ការសងសៀវភៅត្រលប់មកវិញយឺត ជាដើម៕

ដោយ ៖ ង៉ាន់ ទិត្យ