(កំពង់ធំ)៖ យុវជនទាំងអស់ត្រូវរួមគ្នាការពារ អភិរក្ស និងអភិវឌ្ឍវប្បធម៌ខ្មែរ ដើម្បីបន្តជាអ្នកស្នងវេននៃជាតិ ដោយក្លាយជាមហាអំណាចមួយនៃវប្បធម៌។ ប្រទេស​កម្ពុជា មានប្រវត្តិសាស្ត្រ វប្បធម៌ និងអរិយធម៌ ដ៏ឈ្លាសវៃ ដែលបានបន្សល់ទុកដោយបុព្វបុរសជាច្រើនសតវត្សរ៍មកហើយ។ បច្ចុប្បន្ននេះ សិល្បៈ វប្បធម៌ និងបេតិកភ័ណ្ឌទាំង​អរូបី និងរូបី ត្រូវបានរក្សាទុក និងអភិរក្ស ដើម្បីរក្សាអត្ត​សញ្ញាណ​ជាតិ ។

ក្នុងនាមជាកូនខ្មែរ យុវជនគ្រប់រូបត្រូវសហការគ្នាការពារ​និង​អភិរក្សវប្បធម៌ ដោយមិនត្រឹមតែទុកចិត្តលើការអភិរក្ស​បេតិកភ័ណ្ឌប៉ុណ្ណោះទេ ប៉ុន្តែថែមទាំងជាកម្លាំងសំខាន់ក្នុង​ការជំរុញការចូលរួមវិស័យសិល្បៈ និងវប្បធម៌ក្នុងកំណើន​សេដ្ឋកិច្ច។

នេះគឺជាប្រសាសន៍លើកឡើងរបស់ ឯកឧត្តម នួន ផារ័ត្ន អភិបាលខេត្តកំពង់ធំ ក្នុងពិធីអបអរសាទរទិវាវប្បធម៌ជាតិ លើកទី ២៧ ឆ្នាំ២០២៥ ក្រោមប្រធានបទ «យុវជន ដើម្បី​វប្បធម៌ជាតិ» ដែលប្រព្រឹត្តទៅនៅថ្ងៃទី ២៦ ខែមីនា ឆ្នាំ ២០២៥ នៅសាលប្រជុំមន្ទីរវប្បធម៌ និងវិចិត្រសិល្បៈ​ខេត្តកំពង់ធំ។

ឯកឧត្តម នួន ផារ័ត្ន បន្តថា កិច្ចអភិរក្ស ការពារ និងអភិវឌ្ឍ​វប្ប​ធម៌​ជា​ការងារដែលត្រូវអនុវត្តជាបន្តបន្ទាប់ ដោយទាម​ទារ​ឱ្យមានការខិតខំប្រឹងប្រែង និងការសហការជាក្រុម ដើម្បីបន្តបង្កើតបរិយាកាសវប្បធម៌រីកចម្រើន សម្រាប់ជំនាន់ក្រោយៗ ៕

ដោយ ៖ ប៊ុនរដ្ឋា