បរទេស៖ លោកប្រធានាធិបតីសហរដ្ឋអាមេរិក Donald Trump បានប្រកាសថា លោកសម្រេចតំឡើងពន្ធ ២៥ភាគរយ លើរថយន្តនាំចូលសហរដ្ឋអាមេរិកទាំងអស់ ចាប់ពីថ្ងៃទី២ ខែមេសា ឆ្នាំ២០២៥ ដោយរំពឹងថា នឹងបង្កើនចំណូលពន្ធបាន ១០០ពាន់លានដុល្លារអាមេរិក ជាប្រចាំឆ្នាំ។

យោងតាមការចុះផ្សាយ របស់ទីភ្នាក់ងារព័ត៌មាន Yahoo សេតវិមានបានអះអាង កាលពីថ្ងៃពុធថា ការតំឡើងពន្ធនេះ គឺនឹងបង្កើនការផលិតឡាន របស់បណ្តាក្រុមហ៊ុនក្នុងស្រុក។ ប៉ុន្តែ បណ្តាមេដឹកនាំបរទេស បានចេញមកប្រតិកម្មភ្លាមៗ រិះគន់ចំពោះវិធានការនេះ ដោយបារម្ភថា ជាសញ្ញាបញ្ឆេះសង្គ្រាមពាណិជ្ជកម្មកាន់តែខ្លាំង ដែលអាចនឹងធ្វើឲ្យខូចខាត ដល់កំណើនសកល។

នាយករដ្ឋមន្ត្រីប្រទេសកាណាដា លោក Mark Carney បាននិយាយថា «នេះគឺជាការវាយប្រហារដោយផ្ទាល់»។ ប្រធានគណៈកម្មការអឺរ៉ុប លោកស្រី Ursula von der Leyen បានសម្តែងការសោកស្តាយចំពោះការសម្រេចចិត្ត របស់សហរដ្ឋអាមេរិក។

ប្រភពបានបន្តថា ការតំឡើងពន្ធនេះ នឹងធ្វើឲ្យតម្លៃឡានបរទេស លក់ដូរ នៅសហរដ្ឋអាមេរិក នឹងកើនឡើង ដល់១,២៥០០ដុល្លារ ក្នុងមួយគ្រឿង ដែលនឹងរុញដោលអតិផរណា កាន់តែខ្លាំង ក្នុងសហរដ្ឋអាមេរិក។ ភ្លាមៗ ភាគហ៊ុន នៅក្នុងក្រុមហ៊ុនរថយន្តអាមេរិក បានធ្លាក់ចុះ ប៉ុន្តែ ក៏មានកើនឡើងដែរ។ ក្រុមហ៊ុន General Motors ធ្លាក់ចុះប្រហែល ៣% ក្នុងការជួញដូរ កាលពីថ្ងៃពុធ។ ប៉ុន្តែ ភាគហ៊ុនរបស់ក្រុមហ៊ុន Ford បានកើនឡើងបន្តិច។ ភាគហ៊ុននៅក្នុងក្រុមហ៊ុន Stellantis ដែលជាម្ចាស់ក្រុមហ៊ុន Jeep និង Chrysler បានធ្លាក់ចុះជិត ៣.៦% ។

បើតាមក្រសួងពាណិជ្ជកម្ម បានឲ្យដឹងថា សហរដ្ឋអាមេរិកបាននាំចូលរថយន្តពីបរទេស ជិត៨លានគ្រឿង តម្លៃ២៤៤ពាន់លានដុល្លារអាមេរិក កាលពីឆ្នាំ២០២៤។ មិចស៊ិក ជប៉ុន និង កូរ៉េខាងត្បូង គឺជាប្រទេសនាំរថយន្ត ទៅសហរដ្ឋអាមេរិកច្រើនជាងគេ។ គ្រឿងបន្លាស់រថយន្តនាំចូលវិញ មានតម្លៃ ច្រើនជាង១៩៧ពាន់លានដុល្លារអាមេរិក ក្នុងនោះ មិចស៊ីក កាណាដា និងចិន គឺជាប្រទេសនាំចូលទៅក្នុងសហរដ្ឋអាមេរិកច្រើនជាងគេ។ គ្រឿងបន្លាស់រថយន្ត ក៏ត្រូវបានលោក Donald Trump គ្រោងតំឡើងពន្ធផងដែរ អាចនៅក្នុងខែឧសភា ឆ្នាំ២០២៥ នេះបើតាមទីភ្នាក់ងារព័ត៌មាន BBC៕

ប្រភពពី Yahoo ប្រែសម្រួល៖ សារ៉ាត