ឯកឧត្តម តឹករ៉េត សំរេច ៖ ការងារហិរញ្ញវត្ថុសាធារណៈ ពិតជាចាំបាច់ក្នុងការចូលរួមពង្រឹង ដើម្បីធានាបាននូវប្រសិទ្ធភាពនៃការប្រើប្រាស់ថវិកាជាតិ
(ព្រះសីហនុ)៖ ឯកឧត្តម តឹករ៉េត សំរេច រដ្ឋលេខាធិការប្រចាំការ ក្រសួងរៀបចំដែនដី នគរូបនីយកម្ម និងសំណង់ បានគូសបញ្ជាក់ថា បន្ទាប់ពីការចូលរួមអនុវត្តនូវសមរភូមិនៃការបង្កើតនូវបរិយាកាសមិនមានវិវាទ យ៉ាងហ្មត់ចត់ និងគ្រោងទៅបញ្ចប់នាពេលដ៏ខ្លីខាងមុខ ការងារបន្ទាប់របស់ក្រសួងរៀបចំដែនដី នគរូបនីយកម្ម និងសំណង់ គឺ ការងាររៀបចំដែនដី និងនគរូបនីយកម្ម ដើម្បីឈានទៅបង្កើតរបៀងសេដ្ឋកិច្ចទាំង ៨ ឱ្យមានប្រសិទ្ធភាព ដែលកិច្ចការទាំងនេះទាមទារឱ្យមានការគិតគូរ និងរៀបចំផែនការថវិកាឱ្យបានត្រឹមត្រូវ និងឆ្លើយតបទៅនឹងការអនុវត្តថវិកាដំណាក់កាលទី៤ គឺគណនេយ្យភាពសមិទ្ធកម្ម។
ឯកឧត្តម ក៏បានបញ្ជាក់ផងដែរថា ការងារហិរញ្ញវត្ថុសាធារណៈពិតជាមិនមែនជាការងារសាមញ្ញ និងងាយស្រួលនោះឡើយ ដូចនេះការចូលរួមនិងសហការអនុវត្តរបស់គ្រប់តួអង្គពាក់ព័ន្ធពិតជាចាំបាច់ក្នុងការចូលរួមពង្រឹង ដើម្បីធានាបាននូវប្រសិទ្ធភាពនៃការប្រើប្រាស់ថវិកាជាតិ សំដៅដល់ការពង្រឹង និងការចូលរួមប្រមូលចំណូលសេវាសាធារណៈរបស់ក្រសួង ការពង្រឹងប្រសិទ្ធភាពចំណាយ តាមរយៈការអនុវត្តថវិកាកម្មវិធី និងការអនុវត្តយន្តការតាមដាន និងវាយតម្លៃជាដើម ។
នេះជាប្រសាសន៍លើកឡើងរបស់ឯកឧត្តម តឹករ៉េត សំរេច តំណាងឯកឧត្តមឧបនាយករដ្ឋមន្រ្តី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ ក្នុងពិធីបើកសិក្ខាសាលាផ្សព្វផ្សាយ និងដាក់ឱ្យអនុវត្តគោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ រៀបចំឡើងនៅសណ្ឋាគារសុខាខេត្តព្រះសីហនុ នាព្រឹកថ្ងៃទី២៨ ខែមីនា ឆ្នាំ២០២៥។
ឯកឧត្តមរដ្ឋលេខាធិការប្រចាំការ មានប្រសាសន៍បន្ថែមថា ក្រសួងរៀបចំដែនដី នគរូបនីយកម្ម និងសំណង់ បានរួមចំណែកយ៉ាងសកម្មក្នុងការអនុវត្តគោលនយោបាយ ផែនការយុទ្ធសាស្រ្តនិងកម្មវិធីនយោបាយរបស់រាជរដ្ឋាភិបាល ក្នុងនោះការងារកែទម្រង់រដ្ឋបាលសាធារណៈ ការងារកែទម្រង់ហិរញ្ញវត្ថុសាធារណៈ ការងារកែទម្រង់វិមជ្ឈការនិងសហវិមជ្ឈការ និងថ្មីៗនេះ បានបន្ថែមការងារកែទម្រង់ប្រព័ន្ធយុត្តិធម៌ និងការកែទម្រង់ប្រព័ន្ធច្បាប់បន្ថែមទៀតផងដែរ ។ លើសពីនេះ មានសមិទ្ធផលជាច្រើនទៀតក្នុងក្របខណ្ឌនៃការងារកែទម្រង់នេះ ដែលក្រសួងបានខិតខំសម្រេចបាន រួមមានជាអាទិ៍ ការខិតខំប្រមូលនិងបង្កើនសេវាសាធារណៈថ្មីៗ ដែលជាចំណែកក្នុងការអនុវត្តយុទ្ធសាស្ត្រកៀរគរចំណូលរបស់រាជរដ្ឋាភិបាល ការរៀបចំនិងគ្រប់គ្រងប្រព័ន្ធហិរញ្ញវត្ថុសាធារណៈផ្ទៃក្នុងក្រសួង និងការត្រួតពិនិត្យនិងវាយតម្លៃលើការងារថវិកា ដើម្បីធានាប្រសិទ្ធភាពនៃការអនុវត្តថវិកាស្របតាមច្បាប់ និងគតិយុត្តិនានា។
ជាមួយគ្នានេះ ឯកឧត្តម បានថ្លែងនូវការកោតសរសើរ និងវាយតម្លៃខ្ពស់ក្រុមការងារកែទម្រង់ហិរញ្ញវត្ថុសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ ដែលតែងតែបុរេសកម្ម និងសកម្មលើការងាររបស់ខ្លួនប្រកបដោយស្មារតីទទួលខុសត្រូវ និងបានជំរុញឱ្យក្រសួងរៀបចំដែនដី នគរូបនីយកម្ម និងសំណង់ ក្លាយជាក្រសួងឈានមុខគេមួយក្នុងការចូលរួមអនុវត្តនិងសម្រេចបាននូវសមិទ្ធផលជាច្រើន ។ ដោយក្នុងនោះគោលការណ៍ណែនាំស្តីពីការគ្រប់គ្រងហិរញ្ញវត្ថុសាធារណៈរបស់ក្រសួងរៀបចំដែនដី នគរូបនីយកម្ម និងសំណង់ គឺជាឯកសារដ៏មានសារៈសំខាន់ដែលនឹងក្លាយជាមគ្គុទេសក៍សម្រាប់ចង្អុលបង្ហាញ ណែនាំ និងតម្រង់ទិសអំពីយន្តការការងារតាមបែបបទ និងនីតិវិធីហិរញ្ញវត្ថុដល់គ្រប់អង្គភាពថវិកាក្រោមអាណាព្យាបាលរបស់ក្រសួង ៕
ដោយ / គ្រី សម្បត្តិ
